1 Bhakolongwa 5

Solomoni aliandaa kuchenga Nyumba jaka Chapanga

2 Mambu gha Chikahi 2:1-18

1Najombi nkolongwa Hilamu, wa ku muchi wa Tilo, joakabhi nkochi waka Daudi, paakajowini malobhi kubha Solomoni abhi nkolongwa pandu paka tati waki, akabhatumiki bhatumika bhaki kwaka Solomoni. 2Bhela Solomoni akapeliki ubholu aghoghu kwaka Hilamu: 3“Umanyi kwa ndandi ja ngondo yeakakomini tati wangu Daudi kuhuma ku ipambala yokapi, ngacheakaweziki kuchenga nyumba kwa ndandi ja lihina laka Bambo Chapanga, Chapanga waki, mbaka chikahi Bambo Chapanga paakunjangati kubhaweza maadui bhaki. 4Nambu sajenu Bambo Chapanga, Chapanga wangu, ambekihi lukwali kila upambala, njeta adui wala lijambu lihakau. 5Bhela mbala kuchenga Nyumba kwa ndandi ja lihina laka Bambo Chapanga, Chapanga wangu, ngati Bambo Chapanga moakumpwaghi tati wangu Daudi, chikahi paakapwaghiki, ‘Mwana waku joananumbeka pa chitehu cha ukolongwa pandu paku, nde joanachenga Nyumba kwa ndandi ja lihina langu.’ 6Bhela, ubhalaghalakya bhandu bhaku nahuli mielezi ja ku Lebanoni jihekatwaje kwa ndandi jangu. Bhandu bhangu anabhalilomba na bhandu bhaku mu lihengu leniheli, nanatu ananabhalepa bhatumika bhaku ngati mowipwaghilaje. Kwa ndandi umanyi kubha ngachetubhi na mundu jokapi joabhi na umanyi wa kuheketa mikongu ngati mwehapa Bhasidoni.”

7Hilamu paakajowini ubholu waka Solomoni, akahekali namaa, akapwaghike, “Alumbalika Bambo Chapanga lalenu, kwa kumpeke Daudi mwana joabhi na mbulau ya kubhatawala bhandu bha inchi ajeji ngolongwa!” 8Bhela, Hilamu akumpelaki Solomoni ubholu, akapwaghaje, “Nyopalili ubholu ghounetile, nanatu anandenda ghokapi ghaupala mu kukupekeha mikongu ja mielezi na misonobali. 9Bhandu bhangu anabhaheliya mapendi kuhuma ku Lebanoni mbaka ku bahali na kughakonga malundu malundu ghajebhalaje panani ja machi mbaka pandu pawinangihaje. Konihoku, anaghaghopuliwaji, na wehapa anaughajopalyaje. Kwa upambala waku, wehapa wimbekya chilebhi kwa ndandi ja bhandu bha munyumba jangu.”

10Bhela Hilamu akumpeki Solomoni mikongu jokapi ja mielezi na mikongu ja misonobali ngati moakapalile. 11Najombi Solomoni akumpeki Hilamu ingano madebi laki ibheli na elufu alobaini, na mahuta manyahi gha zeituni madebi mia ibheli kila chaka, kwa ndandi ja bhandu bha munyumba jaki.

12Bhela, Bambo Chapanga akumpeki Solomoni mbulau, ngati moakumpwaghile. Pakabhi na majonganu gha lukwali pachilanda jaka Hilamu na Solomoni, na bhokapi bhabheli bhakatendiki majetanganelu.

13Nkolongwa Solomoni akabhongini bhandu elufu selasini kuhuma kila pandu mu inchi ja Izilaeli, nahuli bhatenda lihengu la kujomalakewa. 14Akumbekiki Adonilamu kubha njemalela wabhu. Akabhaghabhiki bhandu bhanihabha mu mapogha ghatatu, bhandu elufu komi mu kila lipogha limu, aghapelakaje mapogha ghanihagha kwa zamu, mwehi ghumu ku Lebanoni na myehi jibheli kunyumba. 15Solomoni akabhi na bhatotola hibwahila elufu sabini, na bhahongola maganga elufu semanini ku hitombi hoku, 16papamu na bhajemalela elufu itatu na mia itatu ambabhu bhakajemalili lihengu leniheli na kubhalongoha bhahengalihengu bhokapi. 17Kwa amuli jaka nkolongwa, bhakahembiki maganga makolongwa na maganga manyahi nakanopi, nahuli ghahonguliwaje kwa ndandi ja kuchengela luhuli lwa Nyumba jaka Bambo Chapanga. 18Bhela, bhenibhela nde mafundi bhaka Solomoni na mafundi bhaka Hilamu na bhandu bha muchi wa Gebali mobhakahongwili maganga na mbau ya kuchengela Nyumba jaka Bambo Chapanga heji.