1 Bhakolongwa 21

Nabosi akana kundombase Ahabu ngonda wa mizabibu

1Paghapetiki ghanihagha, Nabosi, kuhuma ku muchi wa Yezileeli, akabhi na ngonda wa mizabibu pambipi na nyumba ja kikolongwa jaka Ahabu, nkolongwa wa ku Samalia. 2Bhela, lichobha limu Ahabu akumpwaghi Nabosi, “Umbekyaje ngonda waku wa mizabibu ndumilaje kubha chijongu cha likolu, kwa ndandi ubhi pambipi na nyumba jangu ja kikolongwa. Ananukupekya ngonda ghongi unyahi nakanopi wa mizabibu au ngati anaupala, ananukulepa mbija jeupala kulengana na ngonda waku.”

3Nambu Nabosi akamuyangiki nkolongwa Ahabu, “Bambo Chapanga na anyepisha kutali kukupeke wehapa upwelelu ghombatiki kuhuma kwa akatati bhangu.”

4Bhela, nkolongwa Ahabu akabhujiki kunyumba jaki, koni ukabya umbina mtima na inyela kwa ndandi jaka Nabosi, wa ku muchi wa Yezileeli, kwa kubha akumpwaghi, “Nganukupekei upwelelu ghombatiki kuhuma kwa akatati bhangu.” Bhela, akaghoni panani ja chitanda, koni akang'ong'utikaji, na akakaniki kula chilebhi. 5Nambu Yezebeli nhwanu waka Ahabu akunjendili na kundalukila, “Bho, maghambu kiki ukubhina mtima anana, na wala ngacheukula chilebhi?”

6Najombi akamuyangike, “Maghambu nakumpwaghi Nabosi, kuhuma ku Yezileeli, ‘Unombasya ngonda waku wa mizabibu, au ngati anaupala, ananukupekya ngonda ghongi wa mizabibu, pandu pa ngonda waku.’ Nambu jombi akambwaghile, ‘Nganukupekehi ngonda wangu wa mizabibu.’ ”

7Yezebeli nhwanu waki, akumpwaghile, “Bho, joatawala mu Izilaeli nde nane? Bho, nga wehapa? Ujumukaje, ukulaje chilebhi! Mtima waku na uhekalyaje. Nepani ananukupekya ngonda wa mizabibu waka Nabosi, kuhuma ku Yezileeli!”

8Bhela, Yezebeli akalembiki baluwa kwa lihina laka Ahabu, akabhekiki muhuli waki panani ja baluwa heji, akajipeliki kwa bhazee na kwa bhandu bhabhabhi na yeu bhabhatamika mu muchi papamu na Nabosi. 9Mu baluwa heji akalembiki anana, “Mtangazaje lichobha la bhandu kukonga kula chilebhi, na mukuntamika Nabosi pandu pa kutopela pachilanda ja bhandu. 10Bhela, mubhatamika bhandu bhabheli bhahakau palongi jaki, nabhombi bhalandilaje kubha Nabosi ampeki masolu Chapanga na nkolongwa. Panihapa mumpiha kunja na kundapu kwa maganga mbaka apotilaje.”

11Bhela, bhazee na bhandu bhabhabhi na yeu bhabhatamika mu muchi waka Nabosi, bhakatendiki ngati Yezebeli moakapwaghi mu baluwa jeakabhapelakile. 12Bhakabhatangizi bhandu kukonga kula chilebhi, na kuntamika Nabosi pandu pa kutopela pachilanda ja bhandu. 13Bhela bhandu bhabheli bhahakau bhala bhakahikiki na kutama palongi jaki, nabhombi bhakuntakili Nabosi palongi ja bhandu, bhakapwaghaje, “Nabosi ampeki masolu Chapanga na nkolongwa.” Bhela bhakumpihiki Nabosi kunja ja muchi na kundapu kwa maganga mbaka akapotile. 14Bhela bhakatumiki ubholu kwaka Yezebeli, kupwagha, “Nabosi alapuliki maganga, na apotili.”

15Chikahi pela Yezebeli paakapatiki ubholu ghonighola kubha Nabosi alapuliki maganga, na apotile, akumpwaghi Ahabu, “Ujumukaje na utola ngonda wa mizabibu waka Nabosi, kuhuma ku Yezileeli, ghoakakaniki kulombesa. Ngacheabhi mwomi kabheti, alapuliki kwa maganga mbaka ajomwi kupotela.” 16Ahabu paakajowini kubha Nabosi apotili, akabhokiki na kuhelela nahuli kuutola ngonda wa mizabibu waka Nabosi.

17Bhela, lilobhi laka Bambo Chapanga lakunhikili Eliya, Mtishibi, kupwagha, 18“Ubhokaje, na uhelalaje ukahimangana na Ahabu nkolongwa wa Izilaeli, joatawala koni akabya ku Samalia. Anaunhimanya mu ngonda wa mizabibu waka Nabosi, jombi apiti kuutola, nahuli kuutenda kubha waki. 19Umpwaghilaje, ‘Bambo Chapanga apwagha anana, bho, ngacheunkomiki mundu na kutola mali ghaki?’ Kabheti umpwaghilaje: Bambo Chapanga apwagha anana, ‘Pandu pala ambapu nakawa yakalambiki mwahi waka Nabosi, bhelabhela nakawa anailamba mwahi waku, ena, mwahi waku wehapa!’ ”

20Bhela, Ahabu akumpwaghi Eliya, “Wehapa wa adui wangu, bho, umbatike?”

Eliya akamuyangike, “Ena, nukupatike. Maghambu wehapa uholalili wamweti kuhenga mahakau palongi jaka Bambo Chapanga. 21Bambo Chapanga akupwaghila, ‘Ananeta mahakau panani jaku. Ananyonanga bhabhelakeka bha kujomulela bha chikambaku bhaka Ahabu mu Izilaeli, akubhi ntumwa au mundu wa kulijeka. 22Bhela ananabhatenda bhandu bha lukolu lwaku bhakubha ngati bhandu bha lukolu lwaka Yeloboamu mwana waka Nebati, na ngati bhandu bha lukolu lwaka Baasha mwana waka Ahiya, kwa ndandi ja mahakau ghaundendili na kubhatenda bhandu bha Izilaeli kutenda mahoku.’ 23Bhelabhela Bambo Chapanga akapwaghiki anana panaji jaka Yezebeli, ‘Nakawa anayunkula Yezebeli pambipi na lumatu lwa muchi wa Yezileeli.’ 24Mundu jokapi jola kuhuma mu lukolu lwaka Ahabu joanawelila kumbwani, nakawa anajunkulaje, na jokapi joanawelila kumighonda, ijuni ya kunani anayunkulaje.”

25Ngachepalabhalili kubha na mundu ngati Ahabu ng'o, joakapangiki mweni kutenda uhakau palongi jaka Bambo Chapanga, akabya achochakewa na Yezebeli, nhwanu waki. 26Akatendiki mahakau kwa kujojabhela imong'umong'u ngati mobhakatendi Bhaamoli ambau pamwandi hapa Bambo Chapanga akabhatopwili palongi ja bhandu bha Izilaeli.

27Nambu, Ahabu paakajowini malobhi ghanihagha, akakachwili ingobhu yaki, akawati magunila na kukonga kula chilebhi. Akaghonili na kuliyekalela magunila, nahuli kuliheleya.

28Bhela, lilobhi laka Bambo Chapanga lakunhikili Eliya, kuhuma ku Tishibi, kupwagha, 29“Bho, uweni ntundu Ahabu moaliheleha palongi jangu? Kwa ndandi alihelihi mweni, nganeti mahakau ghangani chikahi akona mwomi, nambu ananaghaleta kwa bhandu bha lukolu lwaki mu machobha gha utawala waka mwana waki.”