1 Bhakolongwa 22

Mlota Mikaya andakali Ahabu

2 Mambu gha Chikahi 18:2-27

1Kwa hyaka itatu ngachepakabhi na ngondo pachilanda ja bhandu bha inchi ja Silia na bhandu bha inchi ja Izilaeli. 2Nambu mu chaka cha katatu, Yehoshafati nkolongwa wa Yuda akahelili kujenda kumbona nkolongwa wa Izilaeli.

3Ahabu akabhi abhapwaghi ihongozi bhabhakabhi pahi jaki, “Bho, ngachemmanyi kubha muchi wa Lamosi Gileadi nde mali ghitu, na tukona ngachetuhengiki chokapi kuukelabhu kwitu kuhuma kwaka nkolongwa wa Silia?” 4Bhela akundaluki Yehoshafati, “Bho, anaujenda le papamu na nepani kukomana ngondo ku Lamosi Gileadi?”

Yehoshafati akamuyangiki nkolongwa wa Izilaeli, “Nepani nde ngati wehapa, bhandu bhangu nde ngati bhandu bhaku, falasi yangu nde ngati falasi yaku.” 5Nambu Yehoshafati akajendali kumpwaghi nkolongwa wa Izilaeli, “Nambu lalenu, undalukya hoti Bambo Chapanga.”

6Bhela, nkolongwa wa Izilaeli akabhabhongini bhalota akanalomi mia nchechi, na kubhalalukila, “Bho, nyenda le kubhalapu bhandu bha muchi wa Lamosi Gileadi, au nganijenda?”

Nabhombi bhakamuyangike, “Ujendaje! Bambo Chapanga anaakujangatya kuuweza muchi wa Lamosi Gileadi.”

7Nambu Yehoshafati akalalukile, “Bho, ngacheabhi mlota waka Bambo Chapanga pambani jotuweza kundalukila?”

8Nkolongwa wa Izilaeli akamuyangiki Yehoshafati, “Abhi mundu jumu ambaju kupetela jombi tuweza kundalukila kubhokana na Bambo Chapanga, nambu nunhakalila kwa ndandi ngachealotela lijambu lambone kubhokana na nepani, nambu kila chikahi anotela mahakau pela. Jombi nde Mikaya mwana waka Imula.”

Yehoshafati akumpwaghile, “Nkolongwa ngacheapalika kupwagha bhenibhela.”

9Bhela, nkolongwa wa Izilaeli akundohiki jumu wa bhatumika bhaki, na kumpwaghila, “Ujombatikaje! Ujenda ukundeta Mikaya mwana waka Imula.”

10Chikahi hechi, nkolongwa wa Izilaeli papamu na Yehoshafati nkolongwa wa ku Yuda bhakabhi bhatami pa itehu yabhu ya kikolongwa mu chibhanja cha kupumundi mahunu, pu ndyangu wa kujingalila mu Samalia, papamu na bhalota bhokapi bhakabya bhalotela palongi yabhu. 11Pachilanda ja bhalota bhanihabha akabhi mlota Sedekia mwana waka Kenaana. Jonihoju akabhi alenganakili manyelu gha choma, na kumpwaghi Ahabu, “Bambo Chapanga apwagha anana, ‘Kwa manyelu aghagha, anaubhalapula na kubhakelabhuha Bhasilia kunyuma mbaka bhayonangikikaje.’ ” 12Bhalota bhangi bhokapi bhakabhi bhalotela chindu chechechi bhakapwaghaje, “Ujendaje ukaulapula muchi wa Lamosi Gileadi, anauwezaje. Maghambu Bambo Chapanga anaakujangatya unkolongwa kuuweza muchi ghonihoghu.”

13Mbolu joakapiti kundoha Mikaya akumpwaghile, “Lingalyaje, bhalota bhokapi kwa papamu bhundotili nkolongwa kubha anaawezaje. Chondi, nukulobha wehapa nanau utenda ngati bhombi, undotilaje nkolongwa ghamboni.”

14Nambu Mikaya akapwaghike, “Chakaka ngati Bambo Chapanga moatamila, ananumpwaghila chela pela Bambo Chapanga cheanambwaghilaje.”

15Bhela, Mikaya paakahikiki palongi jaka nkolongwa, nkolongwa akundalukile, “Bho, tujenda le tukakomana ngondo ku Lamosi Gileadi hoku au ngatwijenda?”

Mikaya akamuyangike, “Ujendaje na ukaulapulaje, maghambu Bambo Chapanga anaakujangatya unkolongwa kuuweza muchi ghonihoghu.”

16Nambu nkolomgwa akumpwaghile, “Bho, nukulapisha mala palenga kubha paulonge na nepani kwa lihina laka Bambo Chapanga, ikupalika umbwaghila uchakaka pela?”

17Panihapa Mikaya akayangike, “Nakabhaweni manjolinjoli bhokapi bha Izilaeli bhapechangana mu itombi ngati mambeleli ghangakubha na mdima. Najombi Bambo Chapanga akapwaghike, ‘Bhandu abhabha ngachebhabhi na bambo wabhu. Mubhalekaje kila mundu ajenda kunyumba jaki kwa lukwali.’ ”

18Nkolongwa wa Izilaeli akumpwaghi Yehoshafati, “Bho, ngachenukupwaghi kubha ngaanoteli ghamboni, nambu mahakau pela?”

19Panihapa Mikaya akajendali kupwagha, “Henu ujowanya lilobhi laka Bambo Chapanga: Nukumbweni Bambo Chapanga atami panani ja chitehu chaki cha ukolongwa, na linjolinjoli lokapi la kunani kumahundi bhajemiki upambala wa chibhoku chaki cha kumalelelu na chibhoku chaki cha kumangeja. 20Najombi Bambo Chapanga akalalukile, ‘Bho, nde nane joanaantenda Ahabu ajetakya kujenda kuulapula muchi wa Lamosi Gileadi, na akahwelila konihoko?’ Kila jumu akayangiki cheaholalyaje. 21Bhela akapitalili lijobhi jumu, akajemiki palongi jaka Bambo Chapanga, akapwaghike, ‘Nepani ananunkoluhaje.’ 22Bambo Chapanga akundaluki lijobhi jola, ‘Kwa indela bhole?’ Akapwaghike, ‘Ananyenda na kubhatenda bhalota bhaki bhokapi bhupwaghila upuhi.’ Bambo Chapanga akumpwaghi lijobhi jola, ‘Wehapa anauweza kunkoloha. Ujenda ukatenda bhenibhela.’ ”

23Bhela, Mikaya akajomuli kupwagha, “Anana nde mokubhelile: Bambo Chapanga abhatendiki bhalota bhaku bhokapi habha bhapwagha upuhi. Bambo Chapanga alaghalakili mahakau ghakupataje.”

24Panihapa, Sedekia mwana waka Kenaana akunheghalili Mikaya na kundapula lighanja mulutukwa, na kundalukila, “Bho, kutumbu lile Roho waka Bambo Chapanga aneka nepani, na kuhika kulonge na wehapa?”

25Mikaya akayangike, “Lingalyaje, lichobha lewijingala mu chumba cha mkati nahuli kujenda kujobhalela, panihapa nde pawimanyaje.”

26Najombi Ahabu nkolongwa wa Izilaeli akabhohiki amuli, “Munkamula Mikaya na munkelabhuha kwaka Amoni, mtawala wa muchi, na kwaka Yoashi mwana waka nkolongwa. 27Mkapwaghaje, ‘Nkolongwa apwagha kubha mumbeka mundu ajoju mu ligeleza, na mumpekya libumunda na machi pela, mbaka panikelabhuka lukwali.’ ”

28Bhela Mikaya akapwaghike, “Ngati anaukelawiki lukwali, bhela umanya Bambo Chapanga ngacheapwaghiki na nepani.” Akajendali kupwagha, “Mwenga mabhandu bhokapi njowanya ghanumpwaghi nkolongwa Ahabu!”

Kupotela kwaka Ahabu

2 Mambu gha Chikahi 18:28-34

29Bhela, Ahabu nkolongwa wa Izilaeli na Yehoshafati nkolongwa wa Yuda, bhakapiti kuulapula muchi wa Lamosi Gileadi. 30Nkolongwa wa Izilaeli akumpwaghi Yehoshafati, “Nepani ananhwata ingobhu yangakubha ya kikolongwa na kujingi mu kukomana ngondo, nambu wehapa uwata ingobhu yaku ya kikolongwa.” Bhela nkolongwa wa Izilaeli akapiti kungondo panga kuwata ingobhu ya kikolongwa.

31Chikahi chenihechi, nkolongwa wa ku Silia akabhili abhalaghalakili bhakolongwa bha manjolinjoli selasini na bhabheli bhajemalela bha magali ghaki gha kuhutakika, akapwaghaje, “Ngamwikomana ngondo na mundu jokapi jola, nchoku wala nkolongwa, nambu pela nkolongwa wa Izilaeli.” 32Chikahi bhakolongwa bha magali gha kuhutakika gha ngondo pabhakumbweni Yehoshafati, bhakapwaghike, “Chakaka ajoju nde nkolongwa wa Izilaeli.” Bhela bhakunjengalili nahuli bhundapulaje, nambu Yehoshafati akalapwili njobhela. 33Bhakolongwa bha magali gha kuhutakika gha ndondo bhala pabhakamanyiki kubha ngacheakabhi nkolonga wa Izilaeli bhakakotwiki kunjengalela. 34Mundu jumu akahutiki upendi waki panga kuholakela, akundapwi nkolongwa wa Izilaeli pandu pa kulombana ingobhu yaki ya choma. Nkolongwa wa Izilaeli akumpwaghi njendeha ligali laki la kuhutakika na falasi, “Ng'anambula ligali na umoha nepani pa ngondo, mbotakiki namaa!”

35Ngondo jakajendalili muhi jokapi, najombi nkolongwa Ahabu bhakunjeghamakili mkati ja ligali koni akalingalanya Bhasilia. Mwahi kuhuma pa chilonda chaki ukaholwili na kunyila mbaka pahi ja ligali, na pakamihi jaki akapotile. 36Lyobha palakabhi lijibhila, amuli jakabhokiki kulikambi: “Kila mundu abhuja kumbwani jaki, na kila mundu abhuja ku inchi jaki!”

37Bhela nkolongwa Ahabu akapotili na bhakundetiki ku Samalia, nabhombi bhakuntaghiki konihoku. 38Ligali laki la kuhutakika na falasi bhakaligholwili mu litanda la Samalia, pandu ambapu bhakemi pabhajogha, na nakawa yakalambiki mwahi waki, ngati lilobhi laka Bambo Chapanga molakabhi lipwaghike.

39Matendu ghangi ghaka nkolongwa Ahabu, papamu na ghokapi ghaahengiki, nyumba jaki ja kikolongwa jeachengiki na kupamba kwa manyelu gha ndembu, na michi jokapi jeakajichengi lumatu, ilembakiki mu chitabhu cha kombukombu cha bhakolongwa bha Izilaeli. 40Ahabu akataghakiki pandu pabhakataghakiki akahokolu bhaki. Najombi Ahazia mwana waka Ahabu akabhi nkolongwa pandu paki.

Yehoshafati atawala mu inchi ja Yuda

2 Mambu gha Chikahi 20:31-21:1

41Mu chaka cha kachechi cha utawala waka nkolongwa Ahabu wa ku Izilaeli, Yehoshafati mwana waka Asa, akatumbwi kutawala mu inchi ja Yuda. 42Yehoshafati akabhi na hyaka selasini na nhwanu chikahi paakatumbwili kutawala, najombi akatawili koni akabya ku Yelusalemu hoku kwa hyaka ishilini na nhwanu. Lihina laka mabhu waki akalowakiki Azuba, mwali waka Shilihi. 43Mu kila lijambu akajendiki mu indela yaka tati waki Asa, wala ngacheakapiti chihanganyuma. Akahengiki ghaghabhi ghamboni palongi jaka Bambo Chapanga. Hata bhela, pa tutombi twa kujojabhalela imong'umong'u ngachepabhohakike. Bhandu bhakajendali kubhoha nyambiku ya kujochakeka na kuhuwa ubani konihoku. 44Yehoshafati akabhi na lukwali na nkolongwa wa Izilaeli.

45Mambu ghangi gha utawala waka Yehoshafati, uwezu ghoakabhi nau na umanyi waki mu mambu gha ngondo, ghokapi ghalembakiki mu chitabhu cha kombukombu cha bhakolongwa bha Yuda. 46Bhelabhela akanalomi bhabhakabhi bhahimangana kihyegha na akanalomi bhajabhu, bhabhahighalili mu machobha gha utawala waka Asa tati waki, akabhabhohiki mu inchi.

47Kutumbu panihapa ngachekukabhi na nkolongwa mu Edomu. Njemalela wabhu akabhi chiongozi joakahaghuliwi na nkolongwa Yehoshafati.

48Yehoshafati akalenganaki sitima yamaheli ya Talishishi nahuli ijenda ku Ofili kutola zahabu, nambu ngacheikapiti, kwa ndandi sitima yakatunyukini ku Esioni Gebeli hoku. 49Bhela, Ahazia mwana waka Ahabu akumpwaghi Yehoshafati, “Ubhaleka bhatumika bhangu bhatenda mwanja papamu na bhatumika bhaku mu sitima,” nambu Yehoshafati akakanike.

50Pakujomukela, Yehoshafati akapotili, na kutaghakika pandu pabhakataghakiki akahokolu bhaki mu matengeli gha kikolongwa mu muchi waka hokolu waki Daudi, najombi Yeholamu akatawili pandu paka tati waki Yehoshafati.

Ahazia atawala mu inchi ja Izilaeli

51Mu chaka cha komi na saba cha utawala waka Yehoshafati, nkolongwa wa Yuda, Ahazia, mwana waka Ahabu, akatumbwi kutawala mu Izilaeli. Akatawili kwa hyaka ibheli, koni akabya ku Samalia. 52Ahazia akatendiki mahoku palongi jaka Bambo Chapanga, maghambu akajighiki matendu ghaka tati waki na matendu ghaka Yezebeli, mabhu waki, na matendu ghaka Yeloboamu, mwana waka Nebati, joakabhatendiki bhandu bha Izilaeli bhatenda mahoku. 53Akuntumakili na kunjojabhe chapanga Baali, na kuntenda Bambo Chapanga, Chapanga wa Izilaeli, ayomaje, ngati moakahengi tati waki.