Yoshua 10

Bhaamoli bhalepalela

1Paghapetiki mambu ghanihagha Adoni Sedeki, nkolongwa wa Yelusalemu akajowini kubha Yoshua autoliki mateka muchi wa Ai na kuuyonanga nakanope, bhelabhela akabhili ankomiki nkolongwa wa muchi ghonihoghu. Akahengiki bhenibhela ngati moakahengili ku muchi wa Yeliko na nkolongwa wa muchi hoghu. Kabhete bhandu bha ku Gibeoni bhakabhili bhahengiki majetanganelu gha kutama kwa lukwale na Bhaizilaeli, na kubha sajenu bhatama pachilanda jabhu. 2Malobhi ghanihagha ghakapelakili kubha na choghohi chikolongwa namaa kwa bhandu bha ku Yelusalemu hoku, maghambu Gibeoni ukabhili nde muchi ukolongwa pachilanda ja michi jejakabhili na bhakolongwa. Bhelabhela maghambu muchi aghoghu ukabhili ukolongwa kupeta muchi wa Ai, na bhandu bhaki bhokapi bhakabhili bhabhakangamili namaa kwa ngondo. 3Bhela Adoni Sedeki, nkolongwa wa Yelusalemu akalobhiki ujangatilu kuhuma kwaka Hohamu, nkolongwa wa Hebuloni, kwaka Pilamu, nkolongwa wa Yalimuti, kwaka Yafia, nkolongwa wa Lakishi, na kwaka Debili, nkolongwa wa Egiloni. 4Akabhapwaghile, “Muhikaje mnyangatyaje kuulapula muchi wa Gibeoni, maghambu bhandu bha muchi ghonihoghu bhahengiki majetanganelu gha kutama kwa lukwale na Yoshua na bhandu bha Izilaeli.” 5Bhela bhakolongwa nhwanu bha Bhaamoli, yani nkolongwa wa ku Yelusalemu, nkolongwa wa ku Hebuloni, nkolongwa wa ku Yalimuti, nkolongwa wa ku Lakishi na nkolongwa wa ku Egiloni, bhakalombanishi manjolinjoli ghabhu papamu, na kujenda naghu ku Gibeoni, bhakabhekiki likambi kuuyongolota muchi ghonihoghu, na kuulapula.

6Bhela Bhagibeoni bhakatumiki ubholu kwaka Yoshua kulikambi ku Giligali, na kumpwaghila, “Chondi ngawatuleka tepani bhatumika bhaku. Ukwelaje manyata uhikaje kwitu koni kutukengalela! Utujangatyaje, maghambu bhakolongwa bhokapi bha Bhaamoli bhabhatama mu inchi ja itombi bhalombanishi manjolinjoli ghabhu na kuhika kutulapula!”

7Bhela Yoshua akabhokiki ku Giligali papamu na manjolinjoli ghaki ghokapi, bhakabya na bhandu bhokapi bhabhakangamile kwa ngondo. 8Bambo Chapanga akumpwaghili Yoshua, “Ngaubhajoghopa bhandu bhanihabha, maghambu nepani nyomwili kubhabheka pahi ja lujiniku lwaku. Njeta hata jumu wabhu joanawezaje kukushinda wehapa.”

9Bhela Yoshua akajendiki ikilu jokapi kuhuma ku Giligali, na kubhalapula Bhaamoli kwa kupwitukila. 10Bambo Chapanga akabhajeghili Bhaamoli lujoghopu lukolongwa palongi ja Bhaizilaeli, nabhombi bhakaweziki kwa ushindi ukolongwa ku Gibeoni hoku. Bhaizilaeli bhakabhatopwili bhandu bhanihabha kujenda ku indela ja nhwelelu jejijenda ku Beti Holoni koni bhakabhakomaje mbaka kuhika ku indela jejijenda ku Azeka na Makeda. 11Pabhakabhili bhatila palongi ja Bhaizilaeli ku indela jejijenda kunhwelelu wa Beti Holoni mbaka ku Azeka, Bambo Chapanga akabhahomili maganga gha balafu makolongwa kuhuma kunani kumahunde, na bhamaheli bhabhu bhakakomakiki kwa maganga ghanihagha kupeta bhandu bhala bhabhakomakiki kwa mapanga gha Bhaizilaeli.

12Mu lichobha lela Bambo Chapanga paakabhajeghili Bhaamoli mu mabhoku gha Bhaizilaeli, Yoshua akundobhiki Bambo Chapanga palongi ja mihu gha Bhaizilaeli bhokapi, akapwaghaje,

“Wenga lyobha, ujemaje chinunu panani ja Gibeoni,

wenga lubhalamwehi, ujemaje panani ja Libondi la Aiyaloni.”

13Bhela lyobha lakajemiki chinunu, na lubhalamwehi lukajemiki mbaka bhandu bha Izilaeli pabhajomwili kulepa kisasi kwa maadui bhaki. Bho, mambu ghanihagha le ngacheghalembakiki mu chitabu cha Yashali? Bhela lyobha lakajemiki chinunu pachilanda ja mbengu, wala ngachelajombatiki manyata kujibhila kwa lichobha limu. 14Lichobha ngati leniheli ngachelilabhali kubha mangani ja panihapa, au palongi ja machobha ghanihagha, lichobha ambalu Bambo Chapanga akajowanili sauti jaka mundu ngati anana. Ndandi chakaka Bambo Chapanga akabhili abhakomanela bhandu bha Izilaeli.

15Bhela Yoshua akakelawiki kulikambi ku Giligali hoku, papamu na Bhaizilaeli bhokapi.

Joshua abhakoma bhakolongwa nhwanu bha Bhaamoli

16Bhela bhakolongwa nhwanu bhala bhakatiliki, na kujenda kujobhalela mkati ja limbaku la ku Makeda hoku. 17Yoshua paakapwaghakiki kubha bhakolongwa nhwanu habha bhahimaniwi bhakabya bhajobhalile mkati ja limbaku la ku Makeda hoku, 18Yoshua akapwaghike, “Mughahingalyaje maganga makolongwa pundomu wa limbaku leniheli, bhelabhela mbekaje bhalonda pandu panihapa. 19Nambu mwehapa ngamwitama konihoku. Mubhajengalyaje adui bhinu, na kubhalapula kuhumila kunyuma, wala ngamubhaleka bhahikaje mu michi jabhu, maghambu Bambo Chapanga, Chapanga winu, abhajeghili bhandu bhanihabha mumabhoku ghinu.” 20Bhela Yoshua papamu na Bhaizilaeli bhakabhalapwili na kubhayonanga bhandu bhamaheli namaa, na bhachokopi bhabhakahighalile bhakatilili ku michi jabhu jejikabhili na lumatu. 21Paghapetiki ghanihagha bhandu bhokapi bhakakelawiki lukwali kwaka Yoshua kulikambi la ku Makeda hoku.

Njeta mundu hata jumu joakalongile lilobhi lokapi lela panani ja bhandu bha Izilaeli.

22Bhela Yoshua akapwaghike, “Henu, mbohaje maganga gha pundyangu wa limbaku leniheli, na mnetilaje bhakolongwa nhwanu habha kunja ja limbaku koni.” 23Panihapa bhakabhapihiki bhakolongwa nhwanu habha kunja ja limbaku, yani nkolongwa wa Yelusalemu, nkolongwa wa Hebuloni, nkolongwa wa Yalimuti, nkolongwa wa Lakishi na nkolongwa wa Egiloni. 24Pabhakabhili bhabhaletiki bhakolongwa nhwanu habha kwaka Yoshua, Yoshua akabhalohiki bhandu bhokapi bha Izilaeli, na kubhapwaghila manjolinjoli bhakolongwa bha ngondo bhabhakapiti papamu naku, “Muhikaje pambani mbekaje lwaju hinu panani ja hingu ya bhakolongwa abhabha.” Panihapa bhakahikiki na kubheka lwaju yabhu panani ja hingu ya bhakolongwa bhanihabha. 25Yoshua akabhapwaghile, “Ngamwijoghopa, wala ngamwihekateka mtima. Mkubhaje na makili na mkangamalaje. Maghambu aleli nde Bambo Chapanga leanaabhahengilaje adui bhinu bhokapi bhanjenda kukomana nabhu.” 26Bhela, Yoshua akabhalapwili na kubhakoma bhakolongwa nhwanu bhala, na kuhomeka mituhi jabhu panani ja mikongu nhwanu, na kubhaleka pandu panipala koni bhajenjela mbaka pakamihe.

27Chikahi lyobha palakabhili pambipi kujibhila, Yoshua akalaghalakili bhabhohakikaje panani ja mikongu pabhakabhili bhajenjela na kubhalekela mu limbaku lela lebhakabhili bhajobhalile. Bhela pundyangu wa limbaku leniheli bhakabhekiki maganga makolongwa ambaghu ghabhili mbaka lalenu.

Joshua ajitola mateka michi jengi ja Bhaamoli

28Lichobha lela Yoshua paakautoliki mateka muchi wa Makeda, akunkomiki nkolongwa wa muchi ghonihoghu kwa lipanga na bhandu bhaki bhokapi panga kundeka mundu hata jumu. Akuntendili nkolongwa wa ku Makeda ngati moakuntendile nkolongwa wa ku Yeliko.

29Bhela Yoshua akabhokiki kuhuma ku Makeda akabya papamu na bhandu bhokapi bha Izilaeli mbaka ku muchi wa Libina, na kuulapula. 30Bhelabhela Bambo Chapanga akaubhekiki muchi ghonihoghu wa Libina papamu na nkolongwa wa muchi ghonihoghu pahi ja lujiniku lwa bhandu bha Izilaeli. Yoshua akauyoningi muchi ghonighola na kila mundu joakabhili mkati jaki kwa lipanga, panga kunhighakila mundu hata jumu mkati ja muchi ghonihoghu. Akuntendili nkolongwa wa Libina ngati moakuntendile nkolongwa wa Yeliko.

31Bhela Yoshua akabhokiki ku muchi wa Libina, papamu na bhandu bhokapi bha Izilaeli, na kujenda mbaka ku Lakeshi, bhakauyongalwiti na kuulapula muchi ghonihoghu. 32Bambo Chapanga akaubhekiki muchi ghonihoghu wa Lakishi pahi ja lujiniku lwa bhandu bha Izilaeli, najombi Yoshua akautoliki mateka mu lichobha la kabheli. Joashua akauyoningi muchi ghonihoghu na kila chindu chechikabhili mkati ja muchi ghonihoghu kwa lipanga, ngati moakautendile muchi wa Libina. 33Chikahi chenihechi, Holamu nkolongwa wa Gezeli akakweliki nahuli kujenda kubhajangatila bhandu bha Lakishi, nambu Yoshua akundapwili jombi na bhandu bhaki, panga kunhighakila mundu hata jumu.

34Bhela Yoshua akabhokiki ku muchi wa Lakishi na kujenda ku muchi wa Egiloni, akabhili papamu na bhandu bhokapi bha Izilaeli. Bhakauyongalwiti muchi ghonihoghu na kuulapula. 35Bhakautoliki mateka muchi ghonihoghu mu lichobha lela lela, bhakaulapwili kwa lipanga na kumuyonanga kila mundu joakabhili mkati jaki, ngati moakautendile muchi wa Lakishi.

36Bhela Yoshua papamu na bhandu bhokapi bha Izilaeli, bhakakweliki kuhuma ku muchi wa Egiloni na kujenda ku muchi wa Hebuloni, na kuulapula muchi ghonihoghu. 37Bhakautoliki mateka na kuulapula kwa lipanga, papamu na nkolongwa wa muchi ghonihoghu, ijiji yaki, na kila mundu joakabhili mkati jaki. Njeta mundu hata jumu joakahighalili mkati jaki, ngati mobhakautendile muchi wa Egiloni. Bhakauyoningi nakanopi papamu na kila mundu joakabhili mkati ja muchi ghonihoghu.

38Bhela Yoshua papamu na bhandu bhokapi bha Izilaeli, bhakakelawiki kujenda ku muchi wa Debili, na kuulapula muchi ghonihoghu. 39Bhakautoliki mateka muchi ghonihoghu, nkolongwa wa muchi ghonihoghu, ijiji yaki, na kuulapula kwa lipanga. Bhakamuyoningi kila mundu joakabhili mkati ja muchi ghonihoghu, panga kunhighakila mundu hata jumu. Bhakautendili muchi wa Debili na nkolongwa waki, ngati moakatendile ku michi ja Libina na Hebuloni, na bhakolongwa bhabhu.

40Bhela Yoshua akajitoliki mateka inchi jeniheji jokapi, jakabyaje papamu na inchi ja itombi, pandu pajomu ku upambala wa kunkache, na pandu pa uwanda wa ku upambala wa kolijibhi lyobha, na mihelelu ja itombi, papamu na bhakolongwa bhaki bhokapi. Ngacheakahighalili mundu hata jumu, nambu akayoningi nakanopi kila chindu chechibhili na mbomu, ngati Bambo Chapanga, Chapanga wa Izilaeli, moakalaghalakile. 41Yoshua akabhalapwili bhandu bhokapi kutumbula ku Kadeshi Belinea mbaka ku Gaza, na kuhuma ku inchi ja Gosheni mbaka ku Gibeoni. 42Bhakolongwa bhanihabha bhokapi papamu na inchi yabhu, Yoshua akabhashindiki kwa chikahi chimu, maghambu Bambo Chapanga, Chapanga wa Izilaeli, akabhakomanili bhandu bha Izilaeli. 43Panihapa Yoshua akakelawiki papamu na bhandu bhokapi bha Izilaeli, mbaka ku likambi labhu ku Giligali hoku.