Yoshua 9

Bhagibeoni bhunkolowa Yoshua

1Bhakolongwa bhokapi bhabhakabhili bhatama ku upambala wa kolijibhi lyobha wa nkoka Yoludani bhakajowini ushinde ghobhakapatiki bhandu bha Izilaeli. Bhakolongwa bhanihabha bhakabhili bhatama ku pandu pa itombi, tutombi na ku uwanda wa Bahali ja Meditelania, mbaka ku Lebanoni ku upambala wa kungonde. Bhakolongwa bhanihabha bhakabhili nde bhakolongwa bha Bhahiti, Bhaamoli, Bhakanaani, Bhapelizi, Bhahivi na Bhayebusi. 2Bhakolongwa bhanihabha bhokapi bhakalombini papamu nahuli kukomana ngondo na Yoshua na bhandu bha Izilaeli.

3Nambu bhenei bha ku Gibeoni, ambabhu nde Bhahivi, pabhajowini panani ja malobhi ghanihagha ghokapi Yoshua ghaakabhili abhahengile bhandu bha ku michi ja Yeliko na Ai, 4bhombi bhakaamwili kunkolowa. Bhakalitendiki ngati bhabholu koni bhakabya na maponda ghabhu ghaghatotwile magunila ghaghalalike na mifuku ja divai jejilalike na jejilokakiki ilaka. 5Mu magholu ghabhu bhakawati magubasi yeikachukine, ingobhu yeilalike, na chilebhi chabhu chakabhi mabumunda ghaghajomiki, na ghaghatumbwili kubha na chikongu. 6Bhela bhakapiti kwaka Yoshua kulikambi ku Giligali kola, na kumpwaghila jombi papamu na bhandu bha Izilaeli, “Tuhuma ku inchi ja kutali, chondi tundobha ntendaje majetanganelu na tepani.”

7Bhela bhandu bha Izilaeli bhakabhapwaghili Bhahivi bhanihabha, “Pangi mtama pambipi na tepani, bho, tepani tuweza bholi kuhenga majetanganelu na mwehapa?”

8Nabhombi bhakumpwaghi Yoshua, “Tepani nde bhatumika bhaku.”

Yoshua akabhalalukile, “Mwehapa nde akanane? Nanamu muhuma kwako?”

9Nabhombi bhakamuyangike, “Bhatumika bhaku tuhumiki ku inchi ja kutali namaa, na tuhikiki pambani maghambu tujowini malobhi gha lihina laka Bambo Chapanga, Chapanga winu, na panani ja mambu ghokapi ghaakahengiki ku Misili hoku. 10Bhelabhela tujowini mambu ghokapi ghaabhahengile bhakolongwa bhabheli bha Bhaamoli bhabhakabhili bhatama ku upambala wa kolipita lyobha wa nkoka Yoludani. Bhakolongwa bhanihabha bhakabhili Sihoni nkolongwa wa ku Heshiboni, na Ogu nkolongwa wa ku Bashani, joakabhili atawala ku Ashitaloti. 11Bhela bhazee bhitu na bhandu bhokapi bhabhatama mu inchi jitu, bhakatupwaghili kubha tutolaje chilebhi kwa ndandi ja mwanja, na kuhika kuhimangana na mwehapa, na kumpwaghila kubha tepani nde bhatumika bhinu, chondi ntendaje majetanganelu na tepani. 12Libumunda aleli lakabhili la moto chikahi patukabhili tulikonga kunyumba jitu, lichobha heli patukabhokiki kuhika pambani, nambu sajenu, lingalyaje, molijomile na ntundu molibhelili na chikongu. 13Mifuku ajeji jakabhili jahenu chikahi patukatwelakili divai, nambu ulingalyaje ntundu mojitatukanile. Ingobhu hitu na magubasi ghitu ilaliki kwa ndandi ja mwanja ulachu wa kuhika pambane.”

14Bhela bhandu bha Izilaeli bhakakaghwili pandu pa ilebhi ya bhandu bhanihabha, panga kulalukila lilobhi kuhuma kwaka Bambo Chapanga. 15Panihapa Yoshua akatendiki majetanganelu gha lukwale papamu nabhu, nahuli kubhaleka bhajendalyaje kubha bhomi. Nabhombi ihongozi bha lipogha la Izilaeli bhakajetakili majetanganelu ghanihagha kwa kulapa.

16Mu lichobha la katatu kutumbula pabhajomwi pela kuhenga majetanganelu nabhu, Bhaizilaeli bhakajowini kubha bhandu bhanihabha bhakabhili bhandu bha pambipi jabhu, na bhakabhili bhatama pambipi jabhu. 17Bhela, Bhaizilaeli bhakatumbwili mwanja, na mu lichobha la katatu bhakahikiki ku michi ja bhandu bhanihabha. Michi jeniheji jakabhili Gibeoni, Kefila, Beeloti, na Kiliati Yealimu. 18Nambu Bhaizilaeli ngachebhalapwili, maghambu ihongozi bha lipogha la Izilaeli bhakabhili bhajomwili kubhalapila kwa lihina laka Bambo Chapanga, Chapanga wa Izilaeli. Panihapa lipogha lokapi lakang'ong'utiki panani ja ihongozi bha lipogha habha. 19Nambu ihongozi bhokapi bha lipogha lenilela bhakabhayangiki bhandu, “Tujomwili kubhalapila kwaka Bambo Chapanga, Chapanga wa Izilaeli, bhela ngachetuweza kubhagusa bhandu abhabha kwa sajenu. 20Anatubhahengilaje lijambu aleli, anatubhalekaje bhajendalyaje kubha bhomi, nahuli ngatwihika kulapulika kwa ndandi ja kuheketa kulapa kotuhengike. 21Ihongozi bhakajendalili kupwagha kubha bhabhalekaje bhatamaje, nambu bhakubhaje bhandu bha kuhala hanju na kuteka machi gha lipogha lokapi la Izilaeli.” Ngati ihongozi bha Izilaeli mobhakapwaghile.

22Bhela Yoshua akabhalohiki Bhagibeoni na kubhalalukila, “Bho, maghambu kiki mwehapa mtehi kutukolowa, koni mkapwaghaje, ‘Tepani tutama kutali namaa na mwehapa.’ Na koni mwehapa mtama pambipi pela na tepani? 23Bhela sajenu mwehapa mbili pahi ja masolu, chikahi chokapi anamkubhaje bhatumwa bha kuhala hanju na kuteka machi, kwa ndandi ja nyumba jaka Chapanga wangu.”

24Bhakamuyangiki Yoshua, “Bhatumika bhaku tukapwaghakiki kubha chakaka Bambo Chapanga, Chapanga winu, akundaghalakili mtumika waki Musa abhayonangaje bhenei bhokapi bhabhatama mu inchi jenjenu na kumpekeha mwehapa inchi jenjenu kubha jinu mabhete. Bhela tukabhili na choghoi namaa kwa ndandi ja matamu ghitu, kwa ndandi jinu mwehapa, nde ndandi tepani tuhengiki lijambu lendenu. 25Bhela lingalyaje, tepani sajenu tubhili pahi ja lujiniku lwaku. Henu utuhengilaje lijambu lokapi lela leubhona wehapa kubha lamboni na lelipalika palongi jaku.” 26Bhela Yoshua akabhakengalili kuhuma mu mabhoku gha bhandu bha Izilaeli, nahuli ngabhikomakeka. 27Nambu kutumbula lichobha leniheli, Yoshua akabhatendiki Bhagibeone kubha bhandu bha kuhala hanju na bhandu bha kuteka machi, kwa ndandi ja lipogha lokapi la Bhaizilaeli na kwa ndandi ja chihanja chaka Bambo Chapanga, pandu pala Bambo Chapanga paakapahawile, mbaka lalenu.