Yoshua 8

Muchi wa Ai utolakeka mateka

1Bhela Bambo Chapanga akumpwaghi Yoshua, “Ngawijoghopa, wala ngawihekateka mtima. Ubhatolaje bhandu bhokapi bha ngondo na ujenda nabhu kuulapula muchi wa Ai, lingalyaje, nepani numbekiki nkolongwa wa Ai pahi ja lujiniku lwaku, papamu na bhandu bhaki, muchi waki na inchi jaki jokapi. 2Utendilaje muchi wa Ai na nkolongwa waki ngati moukutendile muchi wa Yeliko na nkolongwa waki. Nambu muweza kutola mateka mali ghabhu papamu na hinyama yabhu ya kudimakika, kwa ndandi jinu mabhete. Ujendaje ukabhabhekaje bhandu bha kujobhalela ku upambala wa kunyuma wa muchi ghonihoghu.”

3Bhela, Yoshua akabhokiki, papamu na manjolinjoli bhaki bhokapi na kujenda kuulapula muchi wa Ai. Yoshua akabhahawili bhandu elufu selasini, bhandu bhabhakangamile nakanopi pachilanda jabhu, na kubhapwaghila bhalongulyaje chikahi cha ikilu. 4Yoshua akabhalaghalakili, akapwaghaje, “Njowanyaje wichu ghanumpwaghila. Impalika kujobhalela kunyuma ja muchi. Ngamwijenda kutali nakanope na muchi ghonihoghu, nambu mabhokapi mkubhaje tayali kubhalapula. 5Nepani papamu na bhandu bha ngondo bhabhabhili na nenga, anatuheghalya muchi, na chikahi bhandu pabhipitaje kunja nahuli kuhika kukomana na tepani, ngati mobhatendili pakutumbula hapa, tepani anatubhatilaje. 6Anabhapita kunja kuhika kutulonda, mbaka patwikubha tubhahutike bhajenda kutali na muchi, maghambu anabhapwaghaje, ‘Bhatutila, ngati mobhatendili pakutumbula hapa.’ Natatu patwikubhaje tubhatila palongi jabhu, 7panihapa mwehapa impalika njinukaje na kubhoka komulihiiki hoku, na kuutola mateka muchi. Bambo Chapanga, Chapanga winu, anaaujeghalaje muchi ghonihoghu pahi ja lujiniku lwinu. 8Pamwikubha muutoliki mateka muchi, muujochaje kwa moto. Ntendaje bhenibhela ngati Bambo Chapanga moandaghalakile. Ndingalyaje, impalika kughakamula mambu ghanundaghalakile.” 9Bhela, Yoshua akabhatumiki bhandu bhanihabha bhajendaje pandu pa kujobhalela, nabhombi bhakabhili bhajobhalela ku upambala wa kolijibhi lyobha wa muchi wa Ai, pachilanda ja muchi wa Beseli na Ai. Nambu Yoshua akaghonili ikilu jeniheji mu likambi la Bhaizilaeli.

10Yoshua akajumwiki lukela pachibhombu lichobha la kabheli, na kubhabhongana Bhaizilaeli kujenda ku muchi wa Ai, koni akabya papamu na bhazee bha Izilaeli. 11Bhandu bhokapi bha ngondo bhabhakabhili papamu naku, bhakaheghalili na kuhika palongi ja muchi. Bhakabhekiki likambi ku upambala wa kungonde wa muchi wa Ai, napombi pakabhili na libondi pachilanda ja muchi ghonihoghu. 12Yoshua akabhili ajomwili kubhatola akanalomi ngati elufu nhwanu, na kubhabheka bhajobhalyaje pachilanda ja muchi wa Beseli na Ai, upambala wa kolijibhi lyobha wa muchi wa Ai. 13Bhela bhakabhapangiki bhandu na kubha tayali kwa ngondo, lipogha likolongwa la manjolinjoli lakabhekakiki ku upambala wa kungonde wa muchi wa Ai, na bhala bhabhahighalile bhabhakabhi bhandu bha kujobhalela bhakabhekakiki ku upambala wa kolijibhi lyobha wa muchi. Najombi Yoshua akapiti ikilu jeniheji pachilanda ja libondi leniheli. 14Nkolongwa wa muchi wa Ai paakaweni lijambu leniheli, jombi papamu na bhandu bha muchi ghonighola bhakabhokiki manyata lukela pachibhombu, na kujenda kukomana ngondo na bhandu bha Izilaeli, kwa chikahi chechabhekakike, pambipi na libondi la nkoka Yoludani. Nambu ngacheakamanyi kubha kukabhili na bhandu bhabhajobhalile kunyuma ja muchi waki. 15Yoshua papamu na bhandu bha Izilaeli bhakalitendiki ngati bhatehi kulepalela palongi jabhu, na kutumbula kutilila kuchingwenje. 16Bhandu bhokapi bha ngondo bhabhakabhili mkati ja muchi wa Ai bhakalowakiki bhalibhonganaje papamu, nahuli kubhajengalela Bhaizilaeli. Pabhakabhili bhunjengalela Yoshua, bhakabhokiki na kujenda kutali na muchi wabhu. 17Njeta mwanalomi nga jumu joakahighalile mu muchi wa Ai, au mu muchi wa Beseli, jwangakubhajengalela Bhaizilaeli. Bhakajilekiki milyangu ja muchi lipala na kubhajengalela bhandu bha Izilaeli.

18Bhela Bambo Chapanga akumpwaghi Yoshua, “Ujinulaje nkoha ghoubhili mu mabhoku ghaku na kulangiha ku muchi wa Ai, maghambu ananujeghalaje muchi ghonihoghu pahi ja lujiniku lwaku.” Panihapa Yoshua akalangihi nkoha ghoukabhili mu mabhoku ghaki ku upambala wa muchi wa Ai. 19Chikahi pela Yoshua paakatehi bhenibhela, bhandu bhala bhabhakabhili bhajobhalile bhakabhokiki kuhuma pandu pabhajobhalile, bhakajingili mkati ja muchi manyata, na bhakatendiki manyata kuutola mateka muchi na kuujocha kwa moto. 20Bhela chikahi bhandu bha muchi wa Ai pabhalingalili kunyuma, bhakaliweni lyohi kuhuma mu muchi lakakwelaje mbaka kunani kumahunde. Nabhombi ngachebhakabhili na uwezu wa kutilila ku upambala wokapi ghola, maghambu Bhaizilaeli bhabhakabhili bhatila kujenda ku chingwenji bhala, bhakang'anambwiki na kubhatopola bhandu bhala bhabhakabhi bhabhajengalela bhombi. 21Bhela Yoshua na bhandu bhokapi bha Izilaeli pabhakaweni kubha bhandu bha kujobhalela bhala bhajomwili kuutola mateka muchi, na kubha lyohi lakabhili likwela kunani, panihapa bhakang'anambwiki, na kubhalapula bhandu bha ngondo bha muchi wa Ai. 22Bhandu bhala bha kujobhalela bha Izilaeli nabhombi bhakapitiki kunja ja muchi kunyuma jabhu, bhela bhandu bha muchi wa Ai bhakaliweni bheni bhabhili pachilanda ja Bhaizilaeli ipambala yokapi ibheli. Bhaizilaeli bhakabhakomiki bhandu bhokapi bha muchi wa Ai, panga kundeka hata mundu jumu kubha mwomi au joakalamike. 23Nambu nkolongwa wa muchi wa Ai bhakuntoliki mateka koni akabya mwome, na kundeta kwaka Yoshua.

24Bhandu bha Izilaeli pabhakajomwili kubhakoma akanalomi bhokapi bha muchi wa Ai mu mighonda na kuchingwenji kobhakabhi bhabhajengalela, na baada jaka kila jumu wabhu kukomakeka kwa lipanga, Bhaizilaeli bhokapi bhakakelawiki ku muchi wa Ai, na kubhakoma bhandu bhala bhabhakahighalili mkati ja muchi ghonihoghu. 25Bhandu bhokapi bha muchi wa Ai, bhabhakomakiki mu lichobha leniheli bhakabhili akanalomi na akambonba ngati elufu komi na ibheli. 26Kwa ndandi Yoshua ngacheahelihi chiwoku chaki chechikabhili chikamulakili nkoha kujenda ku upambala wa muchi wa Ai chela, mbaka paakajomwili kubhakoma bhandu bhokapi bha muchi ghonihoghu. 27Nambu bhandu bha Izilaeli bhakatoliki hinyama na mali gha muchi ghonihoghu kubha yabhu, ngati Bambo Chapanga moakundaghalakile Yoshua. 28Bhela Yoshua akaujochiki kwa moto muchi wa Ai, na kuutenda kubha lundu lwa mahame mbaka mileli, nawombi ubhili ukebha mbaka lalenu. 29Bhela akunkomiki nkolongwa wa muchi wa Ai na kunhomeka panani ja nkongu na kundeka panipala mbaka pakamihe. Nambu chikahi lyobha palitumbulaje kujibhila, Yoshua akabhalaghalakili bhajibhohaje hyegha jaki panani ja nkongu na kujilekela pundyangu ukolongwa wa kujingalila mu muchi. Panihapa bhakalundiki maganga makolongwa ghamaheli panani ja ntuhi ghonihoghu, ambaghu ghahighalili panihapa mbaka lalenu.

Shelia jisomakeka pa chitombi cha Ebali

30Bhela Yoshua akachengiki chihanja cha kumbokeha nyambiku Bambo Chapanga, Chapanga wa Izilaeli, pa chitombi cha Ebali. 31Yoshua akachengiki chihanja chenihechi, ngati Musa, mtumika waka Bambo Chapanga, moakabhalaghalakili bhandu bha Izilaeli, ngati moilembakike mu chitabu cha Shelia jaka Musa, “Chihanja cha maganga ghangakuhongulewa, ambachu panani jaki njeta chombu cha choma chechitumike kulenganakela.” Panihapa nde pabhakumbokili nyambiku ja kujochakeka kwaka Bambo Chapanga, na nyambiku ya kutama kwa lukwale. 32Konihoku, palongi ja lipogha lokapi la bhandu bha Izilaeli, Yoshua akalembiki nakala ja Shelia jaka Musa panani ja maganga ghanihagha. 33Bhaizilaeli bhokapi papamu na ihongozi bhabhu, bhazee na bhatemula na bhagheni bhokapi bhabhakabhili pachilanda jabhu, bhakajemiki kila upambala kulilingalila Lisanduku la Lulaghilu palongi ja bhapenganyambiku Bhalawi bhabhakabhili bhalitotwili Lisanduku la Lulaghilu laka Bambo Chapanga. Nusu ja bhandu bhanihabha bhakajemiki palongi ja chitombi cha Gelizimu, na nusu jengi jakajemiki palongi ja chitombi cha Ebali, ngati Musa, mtumika waka Bambo Chapanga, moakalaghalakile pakutumbula hapa kubhokana na malaghalakilu gha kubhapengalela bhandu bha Izilaeli. 34Bhela, Yoshua akasomiki malobhi ghokapi gha Shelia, yani mbengalelu na masolu, ngati moilembakike mu Chitabu cha Shelia. 35Yoshua akasomiki kila lilobhi la shelia palongi ja lipogha lokapi la bhandu bha Izilaeli, ngati moakalaghalakiwi na Musa. Akaghasomiki palongi ja bhandu bhokapi papanu na akambomba na bhana, na bhagheni bhokapi bhabhakabhili bhatama papamu nabhu.