Yoshua 7

Mahoku ghaka Akani

1Nambu Bhaizilaeli ngachebhakabhili bhalongwana kubhokana na hindu yela yeyabhohakiki kuyonangeka, ndandi Akani mwana waka Kalimi, nchokolu waka Zabudi, wa lukolu lwaka Zela, wa likabila laka Yuda, akatoliki hindu yakumu yeyalaghalakiwi iyonangikaje. Bhela inyela yaka Bambo Chapanga yakabhelili panani ja bhandu bha Izilaeli. 2Bhela Yoshua akabhatumiki bhandu kuhuma ku Yeliko kujenda ku muchi wa Ai, pambipi na Beta Aveni, upambala wa kolipita lyobha wa Betali, akabhapwaghile, “Mkwelaje kundonda mkajipelelizaje inchi.” Bhela bhakakweliki na kujenda kuupeleleza muchi wa Ai. 3Pabhakelawiki kwaka Yoshua, bhakapwaghike, “Njeta ndandi ja kubhapeleka bhandu bhokapi kujenda kuulapula muchi wa Ai. Ubhatumaje bhandu elufu ibheli au elufu itatu bhakautekaje muchi ghonihoghu. Njeta ndandi ja kubhang'aha bhandu bhokapi, maghambu konihoku kubhili na bhandu bhachokopi pela.” 4Bhela bhakapiti ngati bhandu elufu itatu pela, nambu bhakatopuliki na bhandu bha ku muchi wa Ai. 5Bhandu bha ku muchi wa Ai bhakabhakomiki ngati bhandu selasini na sita pachilanda ja Bhaizilaeli. Bhakabhatopwili Bhaizilaeli kuhuma pa ndyangu ukolongwa wa muchi mbaka ku Shebalimu, na bhakabhakomiki kunhelelu hoku. Kubhokana na lijambu leniheli Bhaizilaeli bhakahekatiki mitima na kujoghopa namaa.

6Bhela Yoshua akakachwili ingobhu yaki, jombi papamu na bhazee bha Izilaeli. Bhakachikimi ukupama palongi ja Lisanduku la Lulaghilu laka Bambo Chapanga, na bhakahighalili panihapa mbaka pakamihi, na bhakalijeghili luhombi mu mimutu jabhu kulangiha kubha bhatehi kuhakalila. 7Yoshua akapwaghike, “Wenga wa Bambo Chapanga, maghambu kike utulombwihi kuhuma kwihi ja nkoka Yoludani, nahuli kutujeghela mu mabhoku gha Bhaamoli bhatuyonangaje? Ikabya mbanga tepani kuhighalila kwihi ja nkoka Yoludani! 8Wenga wa Bambo Chapanga, henu mbwagha kike, anangati sajenu Bhaizilaeli bhatopuliki na adui bhabhu? 9Bhela Bhakanaani papamu na bhenei bhokapi bha inchi jenjenu, pabhijowanaje malobhi ghanihagha, anabhatuyongalutaje na kulihungula lihina litu kuhuma panani ja ndema. Bho, henu anauhenga kike kwa ndandi ja lihina laku likolongwa?”

10Bhela Bambo Chapanga akumpwaghi Yoshua, “Ujemaje! Bho, mbona uchikimi ukutuma bhenibhela? 11Bhandu bha Izilaeli bhahengiki mahoku, maghambu bhahekiti lulaghilu lwangu lonalaghalakili bhalukamulaje. Bhatoliki hindu yakumu yeyabhohakiki kwangu nepani nahuli iyonangikaje, bhajibhiki na kulongela upuhe, na kuibheka papamu na hindu yabhu bheni. 12Jeniheji nde ndandi bhandu bha Izilaeli ngachebhaweza kujema palongi ja maadui bhabhu. Bhabhatila maadui bhabhu, maghambu bhalitendiki bheni kubha chindu cha kuyonangeka! Nganikubhi papamu na mwehapa kabhete, mbaka pamwiyonangaje kila chindu pachilanda jinu chekibhohakiki nahuli chiyonangikaje! 13Ujendaje, ukabhagholulaje bhandu. Ubhapwaghilaje, ‘Mligholulaje na kuliandaa kwa ndandi ja chilabhu, maghambu Bambo Chapanga, Chapanga wa Izilaeli, apwagha anana: Pachilanda jinu pabhili na hindu yeyabhohakiki iyonangikaje, mwenga bhandu bha Izilaeli, ngamuwezi kujema palongi ja maadui bhinu, mbaka hindu yeniheyi ibhohakikaje pachilanda jinu.’ 14Bhela lukela mabhokapi mhikaje palongi jangu likabila kwa likabila. Likabila lela leanalihaghuliwaje na Bambo Chapanga, analipetaje palongi lukolu kwa lukolu. Lukolu loanaluhaghuliwaje na Bambo Chapanga, analupetaje palongi bhandu bha munyumba jimu kwa bhandu bha munyumba jimu. Na bhandu bha munyumba jimu bhabhihaghuliwaje na Bambo Chapanga, anabhapetaje palongi mundu kwa mundu. 15Mundu jokapi joanahimaniwaje na hindu yeniheyi yeyabhohakiki nahuli iyonangikaje, anaajochakikaje kwa moto, jonihoju papamu na kila chindu chaki cheabhi nachu, maghambu ahekiti lulaghilu lwaka Bambo Chapanga, na kwa kubha atendiki lijambu la iyoni mu Izilaeli.”

16Chilabhu jaki lukela pachibhombu Yoshua akabhaletiki Bhaizilaeli bhokapi pambipi jaki, likabila kwa likabila, na Bambo Chapanga akalihawili likabila la Yuda. 17Kuhuma mu likabila laka Yuda, lukolu kwa lukolu lukapetiki palongi. Bambo Chapanga akaluhawili lukolu lwa Bhazela, na kuhuma mu lukolu lwa Bhazela, bhandu bha nyumba jimu kwa bhandu bha nyumba jimu bhakapetiki kulongi, nabhombi bhandu bha nyumba jaka Zabudi bhakahaghulike. 18Yoshua akalaghalakili bhandu bha munyumba ja lukolu lwaka Zabudi kuhika kulongi mundu kwa mundu, najombi Akani mwana waka Kalimi, nchokolu waka Zabudi, mwana waka Zela, wa likabila laka Yuda, akahaghulike. 19Yoshua akumpwaghili Akani, “Mwanango, undumbalyaje Bambo Chapanga, Chapanga wa Izilaeli, ukajetakyaje mahoku ghaku kwaki, na umbwaghilaje ghauhengike, wala ngawinhiya.”

20Akani akamuyangike, “Nde chakaka ndendiki mahoku palongi jaka Bambo Chapanga, Chapanga wa Izilaeli. Haleli nde lijambu lendendike: 21Panakaweni likanzu limu linyahi kuhuma ku Babeli, shekeli mia ibheli ya madini gha feza, mwihi wa zahabu ghoukabhili wa nusu kilu, nakaitokulili na kuitola. Lingalyaje, ihiyakiki pahi paluhombi mkati ja lihema langu, na madini gha feza hagha ghabhili pahi ja hindu yeniheyi.”

22Bhela Yoshua akabhatumiki bhabholu, nabhombi bhakakembili imbelu mbaka kulihema, lingalyaje, hindu yeniyela yakabhili ihiyakiki mulihema laki, papamu na madini gha feza ghala pahi jaki. 23Bhakaitoliki hindu yela kuhuma mulihema, bhakundetili Yoshua papamu na bhandu bhokapi bha Izilaeli, nabhombi bhakaibhekiki pahi, palongi jaka Bambo Chapanga. 24Bhela Yoshua papamu na Bhaizilaeli bhokapi, bhakuntoliki Akani mwana waka Zela, papamu na madini gha feza ghala, likanzu lela, mwihi wa zahabu ghola, bhana bhaki bha chikambaku na bha chimbomba, ng'ombi, maponda, mambeleli ghaki, lihema laki papamu na hindu yokapi yekabhi nayu, na kuileta mbaka ku Libondi la Akoli, yani Libondi la Mang'ahiku. 25Yoshua akapwaghike, “Bho, maghambu kike uletiki mang'ahiku aghagha panani jito? Bambo Chapanga anaaletaje mang'ahiku panani jaku lalenu.” Panihapa Bhaizilaeli bhokapi bhakundapwili Akani kwa maganga mbaka kupotela. Bhelabhela bhakabhalapwili bhandu bhokapi bha munyumba jaki kwa maganga mbaka kupotela, na kubhajocha kwa moto. 26Bhela bhakabhongini maganga ghamaheli panani jaki, ambaghu ghabhili mbaka lalenu. Bhela kwa ndandi jeniheji lihina la pandu panipala pakalowakiki Libondi la Akoli, kutumbula lichobha leniheli, mbaka lalenu.

Panihapa inyela ikali yaka Bambo Chapanga yakatumbile.