Yoshua 6

Bhaizilaeli bhauteka muchi wa Yeliko

1Bhela milyangu ja kujingalila muchi wa Yeliko jakabhi jijighaliki wichu kwa ndandi ja kubhahibhalila Bhaizilaeli ngabhijingila. Njeta mundu jokapi jola joakapitiki kunja wala kujingila mkati. 2Panihapa Bambo Chapanga akumpwaghi Yoshua, “Lingalyaje, nijibhekiki Yeliko pahi ja lujiniku lwaku, papamu na nkolongwa waki na bhandu bhaki bha ngondo. 3Uyongalutaje muchi mala punkamu wehapa, papamu na bhandu bhokapi bhabhatotwili silaha ya ngondo. Utendaje bhenibhela kwa machobha sita. 4Ukubhaje na bhapenganyambiku saba bhakabya bhatotwi mbata ya manyelu gha mambeleli makambaku palongi ja Lisanduku la Lulaghilu. Lichobha la saba pela, muyongolutaje muchi ghonihoghu mala saba, nabhombi bhapenganyambiku bhapulaje mbata yabhu. 5Bhela pawijowanaje sauti ya mbata ipulakika kwa sauti ngolongwa, ubhapwaghilaje bhandu bhokapi bhajamalyaje kwa sauti ngolongwa, panihapa lumatu lwa muchi hoghu analuhabhukaji na bhandu anabhakwelaje, kila mundu ajendalyaje kulongi kuhuma pandu paabhile.”

6Bhela Yoshua, mwana waka Nuni, akabhalohiki bhapenganyambiku na kubhapwaghila, “Ntolaje Lisanduku la Lulaghilu, na bhapenganyambiku saba bhatolaje mbata ya manyelu gha mambeleli makambaku na kulongulela palongi ja Lisanduku la Lulaghilu laka Bambo Chapanga.” 7Najombi akabhalaghalakili bhandu, “Njendalyaje kulongi, mkauyongalutaje muchi, na bhalonda bhachokopi bhabhabhili na silaha ibhapalika bhalongulyaje palongi ja Lisanduku la Lulaghilu laka Bambo Chapanga.”

8Bhela chikahi Yoshua paakajomwili kulongela na bhandu, bhapenganyambiku saba bhabhatotwili mbata saba palongi jaka Bambo Chapanga bhala, bhakalongulili palongi, koni bhakapulaje mbata yabhu na Lisanduku la Lulaghilu laka Bambo Chapanga lakabhajengalile. 9Bhalonda bhakumu bhabhakabhili na silaha bhakapiti palongi ja bhapenganyambiku bhabhakabhili bhapula mbata, na bhalonda bhangi bhakajengalili kunyuma ja Lisanduku la Lulaghilu. Chikahi chokapi hechi mbata yakabhili ijendalela kupulakika. 10Nambu Yoshua akabhalaghalakili bhandu, “Ngamwilapula njobhela, wala sauti hinu ngaijowaneka, wala lilobhi lokapi lela ngalijowaneka mumilomu jinu, mbaka lichobha lela panampwaghilaje ndapulaje njobhela, panihapa nde mwilapulaje njobhela.” 11Bhela akalipeliki Lisanduku la Lulaghilu laka Bambo Chapanga kuyongolota muchi ghonihoghu, bhandu bhakabhili bhaliyongoloha mala punkamu kila lichobha, na kukelabhuka kujenda kughonela kulikambi.

12Yoshua akajumwiki lukela pachibhombu mu lichobha lelijengalyaje, nabhombi bhapenganyambiku bhakalitoliki Lisanduku la Lulaghilu laka Bambo Chapanga. 13Bhapenganyambiku saba bhala bhabhakatotwili mbata saba yela bhakalongulili palongi ja Lisanduku la Lulaghilu laka Bambo Chapanga, koni bhakajendalyaje kuipula mbata heyi. Bhandu bhabhabhili na silaha bhakalongulili palongi jabhu, bhalonda bhangi bhabhabhili munyuma bhakalijengalili Lisanduku la Lulaghilu laka Bambo Chapanga, koni mbata ikajendalyaje kupulakika. 14Lichobha la kabheli bhakayongalwiti muchi mala punkamu, na kukelabhuka kulikambi. Bhakahengiki bhenibhela kwa machobha sita.

15Mu lichoba la saba, bhakajumwiki lukela pachibhombu na kuyongalota muchi ghonihoghu mala saba kwa ntundu gholaghola ngati mobhakabhi bhahenga. Nambu mu lichobha leniheli pela bhakauyongalwiti muchi ghonihoghu mala saba. 16Pabhakauyongalwiti mala ja saba, chikahi bhapenganyambiku bhakapulaje mbata yabhu kwa sauti ngolongwa, Yoshua akabhalaghalakili bhandu akapwaghaje, “Ndapulaje njobhela! Maghambu Bambo Chapanga ampekihi muchi ghongone! 17Muchi ghongoni papamu na kila chindu chekibhi mkati jaki anaiyonangikaje kubha nyambiku kwaka Bambo Chapanga. Nambu Lahabu pela, nkemi jola na bhokapi bhabhabhili munyumba jaki nde bhabhilamaje, maghambu akabhahiiki bhapelelezi bhatubhatumike. 18Nambu mulijepaje na hindu yeibhekakiki palongi jaka Bambo Chapanga nahuli iyonangikaje, ngati anantoliki chindu chokapi chela chechibhekakiki palongi jaka Bambo Chapanga nahuli chiyonangikaje, anamulitendaje likambi la Izilaeli kubha chindu cha kuyonangeka, na kuliletela mang'ahiku. 19Nambu madini gha feza, zahabu, yombu ya shaba, na ya choma nde ihuhu kwaka Bambo Chapanga. Yeniheyi ipalika ndetaje mu chikoku chaka Bambo Chapanga.”

20Chikahi bhapenganyambiku pabhakapuliki mbata yabhu, bhandu bhakajowini sauti jeniheji na kujamalila kwa sauti ngolongwa, panihapa lumatu lwa muchi lukahawiki pahi. Bhela bhandu bhakakweliki na kujenda kulongi kuhuma pandu pabhakabhile, na kuutola mateka muchi. 21Bhela bhakayoningi kila chindu chechikabhili mkati ja muchi ghonihoghu kwa kubhakoma kwa lipanga, akanalomi na akambomba, akakombu na bhazee, ng'ombi, mambeleli na maponda.

22Yoshua akabhapwaghili bhandu bhabheli bhabhapiti kujipeleleza inchi bhala, “Njendanyaje kunyumba jaka nkemi jola, mukundetaje jombi papamu na bhokapi bhabhabhili munyumba jaki, ngati momukundapile.” 23Bhela akakombu bhapelelezi bhala bhakapiti, na kundeta Lahabu, tati waki, mabhu waki, bhabheli bhaki, na bhandu bhokapi bhabhakabhili papamu nabhu, na kubhabheka kunja ja likambi la Bhaizilaeli. 24Bhela bhakaujochiki muchi wokapi na kila chindu chechikabhili mkati jaki. Nambu madini gha feza, zahabu, yombu ya shaba na ya choma, bhakaibhekiki mu chikoku chaka Bambo Chapanga. 25Nambu Yoshua akaghakengalili matamu ghaka Lahabu nkemi jola, papamu na bhandu bhokapi bha munyumba jaka tati waki, na hindu yokapi yebhakabhi nayu, maghambu akabhahiiki bhapelelezi bhabhatumakiki na Yoshua kuupeleleza muchi wa Yeliko, najombi atama pachilanda ja Bhaizilaeli mbaka lalenu.

26Chikahi chela Yoshua akabhalakalili, akapwaghaje, “Mundu joanajinukaje na kuuchenga kabheti muchi ghongoni wa Yeliko, apataje masolu kuhuma kwaka Bambo Chapanga.

Jokapi joanachengaje luhuli lwa muchi ghongoni, mbelakeka waki wa kutumbula wa chikambaku na apotilaje.

Jokapi joanachengaje kabheti milyangu ja muchi ghongoni, mwana waki wa kujomulela na apotilaje.”

27Bhela Bambo Chapanga akabhili papamu na Yoshua, na sifa yaki yakajaghanili pa inchi jokapi.