Yoshua 5

1Bhela bhakolongwa bhokapi bha Bhaamoli bhabhakabhi bhatama ku upambala wa kolijibhi lyobha wa nkoka Yoludani, na bhakolongwa bhokapi bha Bhakanaani bhabhakabhi ku maheku ja bahali ja Meditelania, pabhakajowini kubha Bambo Chapanga akaghatendiki machi gha nkoka Yoludani kujomalela palongi ja Bhaizilaeli mbaka pabhajomwili kulomboka, bhakahekatiki mitima kwa lujoghopu, wala ngachebhakabhili na ukangamalu wa kukomana na bhandu bha Izilaeli.

Bhaizilaeli bhaheketwa jando ku Giligali hoku

2Chikahi hechi Bambo Chapanga akumpwaghi Yoshua, “Ulenganakyaje mipamba ja maganga gha kunonopa nakanopi na ubhahekata jando Bhaizilaeli ambabhu ngachebhakahekiti jando pakutumbula hapa.” 3Bhela Yoshua akalenganakili mipamba ja maganga gha kunonopa namaa, na kubhaheketa jando Bhaizilaeli ku Gibea Haalaloti hoku. 4Yoshua akahengiki bhenibhela maghambu akanalomi bhokapi bhabhahumiki ku Misili, bhokapi bhabhakabhili na umule wa kujenda ku ngondo, bhakapotili mumwanja kuchingwenji hoku, chikahi pabhakabhokiki ku inchi ja Misili. 5Hata ngati bhandu bhokapi bhabhabhokiki ku Misili bhakabhili bhahekitwi jando, nambu bhandu bhokapi bhabhabhelakiki kuchingwenje bhakabya mumwanja kuhuma ku Misili bhakabhili ngachebhahitwi jando. 6Bhaizilaeli bhakatendiki mwanja kwa hyaka alobaini mulipololu, hata akanalomi bhokapi bhabhakabhi na umuli wa kujenda kungondo bhakayonangike, maghambu ngachebhunjowanili Bambo Chapanga. Kwa ndandi Bambo Chapanga akabhalapili bhandu bhanihabha kubha ngabhajibhoni inchi jela jejitwelile mahibha na busi ambaju jombi akabhalapili akahokolu bhabhu kubha anaabhapekyaje. 7Bhela akabhatoliki bhana bha chikambaku bhala na kubhabheka pandu pa akatati bhabhu, na bhanihabha nde ambabhu Yoshua akabhahekiti jando. Bhakabhili bhakali ngachebhahekitwi jando maghambu bhakabhili mumwanja.

8Baada ja bhandu bhokapi kuheketwa jando, bhakajendalili kutama mulikambi, mbaka akanalomi bhokapi pabhakabhili bhalamike. 9Bambo Chapanga akumpwaghi Yoshua, “Lalenu mohiki iyoni ja utumwa ghomukabhili nau mu inchi ja Misili.” Bhela pandu panipala pakalowakiki Giligali mbaka lalenu.

10Bhaizilaeli pabhakabhili bhabhekiki likambi ku Giligali hoku bhakatendiki Uwangalalu wa Pasaka pakamihi ja lichobha la komi na nchechi la mwehi, ku uwanda wa ku Yeliko. 11Lichobha la kabheli baada ja Pasaka, mu lichobha lela lela, bhakakuliki mahunu gha inchi jela, mabumunda ghangakujegheleka amila, na bisi. 12Bhela, kutumbula lichobha lela Bhaizilaeli pabhakuliki mahunu gha inchi, ngachebhapatiki kabheti mana. Nambu kutumbula mu chaka chenihechi Bhaizilaeli bhakakuliki mahunu gha inchi ja Kanaani.

Yoshua na nkolongwa wa manjolinjoli ghaka Bambo Chapanga

13Bhela lichobha limu Yoshua paakabhili pambipi na muchi wa Yeliko, akalingalili, na palapala akumbweni mundu ajemiki palongi jaki, akabhili akamwili lipanga lelibhohakiki muala mumabhoku ghaki. Yoshua akunjendili na kundalukila, “Bho, wehapa le ubhi upambala witu, au upambala wa adui bhitu?”

14Najombi akayangike, “Ngabhela, nepani ngachemili upambala wokapi ghola, nambu nepani nhikiki ngati nkolongwa wa linjolinjoli laka Bambo Chapanga.”

Yoshua akachikimi ukutama mbaka pahi, na kujojabhela, bhela akalalukile, “Bambo, bho, ubhili na ubholu bhole kwangu nepani mtumika wako?”

15Nkolongwa wa linjolinjoli waka Bambo Chapanga akamuyangiki Yoshua, “Uhulaje magubasi ghaku mu magholu ghaku, maghambu pandu paujemiki hapa nde pandu pahuhu.” Najombi Yoshua akahengiki bhenibhela.