Yoshua 4

Maganga gha ukombukeli wa kulomboka nkoka Yoludani

1Chikahi bhandu bhokapi bha Izilaeli pabhajomwili kulomboka nkoka Yoludani, Bambo Chapanga akumpwaghi Yoshua, 2“Muhaghulaje akanalomi komi na bhabheli pachilanda ja makabila gha Izilaeli, kila likabila mundu jumu, 3nanau ubhapwaghila bhatola imaghu komi na ghabheli pachilanda ja nkoka Yoludani, kuhuma pandu pala pabhajemiki bhapenganyambiku, bhaghatolaje na kughabheka pandu pamwighonilaje ikilu ja lalenu.”

4Bhela Yoshua akabhakemiki akanalomi komi na bhabheli ambabhu bhakabhi bhahaghulike kuhuma pachilanda ja Bhaizilaeli, kila likabila mundu jumu, 5najombi akabhapwaghile, “Ndongulyaje palongi ja Lisanduku laka Bambo Chapanga, Chapanga winu, na kujenda pachilanda ja nkoka Yoludani. Kila jumu winu ajinulaje liganga palibhegha laki, kulengana na ubhalangiku wa makabila gha Izilaeli. 6Lijambu leniheli analikubhaje ngati ukombukelu pachilanda jitu, na bhana bhitu pabhatulalukyaje mu machobha ghaghahika, bhakapwaghaje, ‘Bho, maganga aghagha ndandi jaki kike?’ 7Mwapwaghilaje kubha machi gha nkoka Yoludani ghaghakabhi ghanyila ghakalibhongini chikahi Lisanduku la Lulaghilu laka Bambo Chapanga palakabhili lilomboka nkoka Yoludani, machi gha nkoka ghonihoghu ghakalibhongini ngaghinyila. Maganga ghangani anaghakubhaje ukombukelu kwa bhandu bha Izilaeli mileli.”

8Bhela bhandu bha Izilaeli bhakatendiki ngati Yoshua moakabhalaghalakile. Bhakatoliki maganga komi na ghabheli kuhuma pachilanda ja nkoka Yoludani, kulengana na ubhalangiku wa makabhila gha Izilaeli ngati Bambo Chapanga moakumpwaghi Yoshua, nabhombi bhakaghatotwili mbaka kulikambi labhu, pandu pabhaghaheli pahi. 9Yoshua akaghajemiki maganga komi na ghabheli pachilanda ja nkoka Yoludani, pandu pala ambapu magholu gha bhapenganyambiku bhabhatowili Lisanduku la Lulaghilu paghajemike. Naghombi ghabhili konihoku mbaka lalenu. 10Bhapenganyambiku bhabhatowili Lisanduku lela bhakabhili bhahighalili koni bhakabya bhajemiki mumachi gha nkoka Yoludani mbaka kila chindu Bambo Chapanga cheakundaghalakili Yoshua pachabhili chihengakiki na bhandu. Yoshua akahengiki kila chindu ngati moakalaghalakiwi na Musa. Bhandu bhakatehi manyata kulomboka nkoka, 11na chikahi pela bhandu bhokapi pabhajomwili kulomboka, Lisanduku laka Bambo Chapanga na bhapenganyambiku bhakalombwiki koni bhandu bhakabya bhalingalila. 12Akanalomi bha likabila la Bhaleubeni, Bhagadi na nusu ja likabila laka Manase, bhakalombwiki palongi ja Bhaizilaeli bhajabhu, koni bhakabya bhawati silaha yabhu, ngati Musa moakabhapwaghile. 13Bhakabhili ngati akanalomi elufu alobaini bhabhakabhi bhawati silaha kwa ndandi ja ngondo, bhakapetiki palongi jaka Bambo Chapanga kujenda kungondo, mbaka ku uwanda wa muchi wa Yeliko. 14Lichobha leniheli Bambo Chapanga akundumbalili Yoshua pachilanda ja bhandu bhokapi bha Izilaeli, nabhombi bhakuntopili machobha ghokapi gha matamu ghaki, ngati mobhakuntopile Musa mu matamu ghaki ghokapi.

15Bhela Bambo Chapanga akumpwaghi Yoshua, 16“Ubhalaghalakyaje bhapenganyambiku bhabhatotwili Lisanduku la Lulaghilu habha, kubha bhakwelaje kuhuma mkati ja nkoka Yoludani.” 17Bhela Yoshua akabhalaghalakili bhapenganyambiku akapwaghaje, “Nkwelaje kuhuma mkati ja nkoka Yoludani.” 18Nabhombi bhapenganyambiku bhakakweliki kuhuma mkati ja nkoka Yoludani koni bhalitotwili Lisanduku la Lulaghilu laka Bambo Chapanga. Chikahi pela pabhakabhekiki magholu ghabhu mukengu, kunja ja nkoka, machi gha nkoka Yoludani ghakatumbwi kunyila kabhete, na kutwelela ngati moghabheli pakutumbula.

19Lichobha la komi la mwehi wa kutumbula bhandu bhakakweliki kuhuma ku nkoka Yoludani na kubheka likambi ku muchi wa Giligali, ku malindakanilu gha kolipita lyobha gha ku Yeliko. 20Najombi Yoshua akaghajemiki ku muchi wa Giligali hoku maganga komi na ghabheli ghabhaghatoliki pachilanda ja nkoka Yoludani. 21Akabhapwaghili bhandu bha Izilaeli, “Bhana bhitu pabhatulalukyaje tepani akatati bhabhu mu machogha ghaghahika, bhakapwaghaje, ‘Bho, maganga aghagha ndandi jaki kike?’ 22Bhela mubhapwaghilaje, ‘Bhandu bha Izilaeli bhakalombwiki pandu pajomu mu nkoka ghoni wa Yoludani.’ 23Maghambu Bambo Chapanga, Chapanga winu, akaghatendiki machi gha nkoka Yoludani ghajomalyaje palongi jinu, mbaka pamwajomwili kulomboka. Bambo Chapanga, Chapanga winu, akahengiki aghagha kulengana na chela cheakahengiki ku Bahali ja Shamu, chikahi paakajitendiki kujomalela palongi jitu mbaka patukajomwili kulomboka. 24Akatendiki anana nahuli mataifa ghokapi gha ndema ghapata kumanya kubha chiwoku chaka Bambo Chapanga nde chechibhili na makili, nahuli mpataje kunjojabhela Bambo Chapanga, Chapanga winu, mileli.”