Yoshua 11

Yoshua andapula nkolongwa Yabini na bhakolongwa bhangi

1Bhela Yabini, nkolongwa wa ku muchi wa Hazoli, paakajowini malobhi ghanihagha gha kushinda kwa Bhaizilaeli, akatumiki ubholu wa kupala kulombana kwa ndandi ja kukomana na Bhaizilaeli kwa bhakolongwa bhabhunhyongolota. Akatumiki ubholu kwaka Yobabu, nkolongwa wa Madoni, kwaka nkolongwa wa ku muchi wa Shimiloni, kwaka nkolongwa wa ku muchi wa Akishafu, 2na bhelabhela kwa bhakolongwa bha ku itombi ya ku upambala wa kungonde, na ku pandu pa Alaba upambala wa kunkachi wa Kineleti, ku uwanda, na ku inchi yeibhili kundonda ya Nafoti Doli ku upambala wa kolijibhi lyobha, 3bhelabhela akapeliki ubholu kwa Bhakanaani upambala wa kolipita lyobha na kolijibhi lyobha, na kwa Bhaamoli, Bhahiti, Bhapelizi, na Bhayebusi ku inchi ja itombi, na kwa Bhahivi pahi ja chitombi cha Helimoni mu inchi ja Misipa. 4Bhela bhakapitiki kunja bhokapi na mapogha makolongwa gha manjolinjoli ghabhu, bhandu bhamaheli namaa ngati luhanga lolubhili mumaheku ja bahali, papamu na falasi na magali ghabhu gha kuhutakika gha ngondo ghamaheli namaa. 5Bhakolongwa bhanihabha bhokapi bhakalombanishi manjolinjoli ghabhu na kubheka likambi labhu papamu pa machi gha Melomu, nahuli kukomana na bhandu bha Izilaeli.

6Bambo Chapanga akumpwaghi Yoshua, “Ngaubhajoghopa bhanihabha, maghambu chilabhu chikahi ngati chenjenu, ananabhayonangaje bhokapi kwa kubhabheka pahi ja lujiniku lwa bhandu bha Izilaeli. Wihekataje mihipa ja kunyuma ja magholu gha falasi yabhu, na magali ghabhu gha kuhutakika gha ngondo ughajochaje kwa moto.” 7Bhela Yoshua akapiti papamu na bhandu bhokapi bha ngondo, nahuli kukomana nabhu pa machi gha Melomu, na kubhalapula kwa kupwitukila. 8Bambo Chapanga akabhabhekiki pahi ja lujiniku lwa bhandu bha Izilaeli, nabhombi bhakabhalapwili, na kubhatopola mbaka ku Sidoni muchi ukolongwa, na kuhika mbaka ku Misilefoti Maimu, mbaka ku upambala wa kolipita lyobha wa libondi la Misipa. Bhaizilaeli bhakabhalapwili bhokapi wala ngacheakahighalili mundu hata jumu. 9Yoshua akabhahengili bhelabhela ngati Bambo Chapanga moakalaghalakile. Akahekiti mihipa ja kunyuma ja magholu gha falasi yabhu, na magali ghabhu gha kuhutakika gha ngondo akaghajochiki kwa moto.

10Chikahi chenihechi Yoshua akakelawiki, na kuutola mateka muchi wa Hazoli, na kunkoma nkolongwa wa muchi ghonihoghu kwa lipanga. Hazoli ukabhili nde muchi ukolongwa wa ngolongwa yeniheyi yokapi. 11Kila mundu joakabhili mkati ja muchi ghonihoghu wa Hazoli bhakunkomiki kwa lipanga. Bhakabhayoningi nakanope, ngachebhunhighakili mundu jokapi jola kubha mwomi, na bhakaujochiki muchi wa Hazoli hoghu kwa moto.

12Yoshua akajitoliki mateka michi jeniheji jokapi ja kikolongwa, papamu na bhakolongwa bhaki, na kubhakoma bhokapi kwa lipanga. Akabhayoningi bhokapi nakanope, ngati Musa mtumika waka Bambo Chapanga moakundaghalakile. 13Nambu bhandu bha Izilaeli ngachebhajochiki moto hata ghumu wa michi jejachengakiki ku itombi yabhu ichoku ichoku, nambu muchi wa Hazoli pela ambau Yoshua akaujochiki kwa moto. 14Bhaizilaeli bhakaitoliki hindu yokapi yebhakaitoliki mateka papamu na hinyama ya michi jeniheji, nambu bhakabhakomiki bhenei bhokapi bha michi jeniheji, panga kunhighakila mundu hata jumu kujendalela kupomola. 15Ngati Bambo Chapanga moakundaghalakile Musa mtumika waki, bhenibhela nde Musa moakundaghalakile Yoshua, najombi Yoshua akahengiki bhenibhela. Yoshua ngecheakakotwiki kuhenga lijambu lokapi lela pachilanda ja ghokapi ghala Bambo Chapanga ghaakundaghalakili Musa.

Inchi yeakaitoliki mateka Yoshua

16Yoshua akajitoliki mateka inchi jokapi: Inchi ja itombi, na inchi jokapi ja tutombi, ku upambala wa kungonde na kunkache, pandu pokapi pa Gosheni, pandu pajomu pa upambala wa kunkache, papamu na libondi la nkoka Yoludani. 17Akabhatoliki mateka na kubhakoma bhakolongwa bhokapi bha inchi yeniheyi, kutumbula chitombi cha Halaki pambipi na Seili mbaka ku Baali Gadi ku libondi la Lebanoni, kunkachi ja chitombi cha Helimoni. 18Ngondo jebhakomini Yoshua na bhakolongwa abhabha bhokapi jakabhili kwa chikahi chilachu. 19Njeta muchi ghoukahengiki majetanganelu gha lukwali na bhandu bha Izilaeli, nambu Bhahivi bhabhakabhili bhatama ku Gibeoni pela. Bhaizilaeli bhakajitoliki mateka michi jengi jokapi kwa kukomana ngondo. 20Maghambu Bambo Chapanga mweni nde joakajitendiki mitima jabhu kubha ja kunonopa, nahuli bhakomanaje ngondo na bhandu bha Izilaeli, nahuli apataje kubhayonanga bhokapi panga chiha, ngati Bambo Chapanga moakundaghalakili Musa.

21Chikahi chenihechi Yoshua akapiti kubhayonanga Bhaanaki bhabhakabhili bhatama ku inchi ja itombi, kutumbula ku Hebuloni, Debili, Anabu, inchi jokapi ja itombi ya Yuda na inchi jokapi ja itombi ya Izilaeli. Yoshua akabhayongiki bhokapi nakanopi na michi jabhu jokapi. 22Ngachebhahighalili Bhaanaki hata jumu mu inchi ja bhandu bha Izilaeli, nambu bhakahighalili pela ku michi ja Gaza, Gati na ku Ashidodi.

23Bhela Yoshua akajitoliki mateka inchi jeniheji jokapi ngati Bambo Chapanga moakundaghalakile Musa. Najombi Yoshua akabhapekihi Bhaizilaeli inchi jeniheji kubha upwelelu wabhu, kulengana na mobhaghabhanile mu makabila ghabhu.

Bhela inchi jakabhili na lukwali panga kubha na ngondo kabhete.