Yoshua 12

Bhakolongwa bhabhalapuliki na Musa

1Abhabha nde bhakolongwa bha nchi ambayu Bhaizilaeli bhakabhili bhabhashindiki na kutawala inchi yabhu upambala wa kolipita lyobha wa nkoka Yoludani, kutumbula ku libondi la nkoka Alinoni mbaka ku chitombi cha Helimoni, papamu na inchi jokapi ja libondi la nkoka Yoludani ku upambala wa kolipita lyobha: 2Sihoni nkolongwa wa Bhaamoli, akabhili atama ku Heshiboni, najombi nde joakatawile kutumbula ku muchi wa Aloeli ghoubhili pambipi na ukengu wa libondi la Alinoni, kutumbula pachilanda ja libondi mbaka ku nkoka wa Yaboki, ambau nde malindakanilu gha inchi ja Bhaamoni, yani mbaka nusu ja inchi ja Gileadi. 3Bhelabhela akatawili inchi jokapi ja libondi la nkoka Yoludani, kutumbula ku bahali ja Kineati, upambala wa kolipita lyobha, mbaka ku bahali ja Alaba, yani bahali ja Mwinyu, mbaka ku Beti Yeshimoti, kujenda mbaka kunkachi ja mihelelu ja Pisiga.

4Jongi akabhili Ogu, nkolongwa wa Bashani, joakabhili jumu wa mahighalilu gha Bhalefai, joakatawili ku Ashitaloti na ku Edilei. 5Jonihoju akatawili ku chitombi cha Helimoni, ku muchi wa Sekela, ku Bashani jokapi mbaka ku malindakanilu gha bhandu bha Geshuli, na bhandu bha Maaka, na nusu ja Gileadi, mbaka ku malindakanilu ghaka Sihoni, nkolongwa wa muchi wa Heshiboni.

6Musa, mtumika waka Bambo Chapanga, papamu na Bhaizilaeli akabhaweziki bhakolongwa bhabheli habha, na kughapekeha makabila ghaka Leubeni, Gadi na nusu ja likabila laka Manase inchi ja bhakolongwa bhanihabha nahuli jikubhaje upwelelu wabhu.

Bhakolongwa bhabhalapuliki na Yoshua

7Abhabha nde bhakolongwa ambabhu Yoshua papamu na Bhaizilaeli bhakabhashindiki pandu pokapi papabhili ku upambala wa kolijibhi lyobha ja nkoka Yoludani, kutumbula ku Baali Gadi ku libondi la Lebanoni mbaka ku chitombi cha Halaki, ku upambala wa kunkachi pambipi na Seili. Yoshua akabhaghabhili bhandu bha Izilaeli inchi jeniheji kubhokana na makabila ghabhu nahuli jikubhaje upwelelu wabhu. 8Inchi yeniheyi yakabhili inchi ja itombi, inchi ja tutombi ku upambala wa kolijibhi lyobha, pandu pa libondi la nkoka Yoludani, mihelelu ja itombi, pandu pa chingwenje, pandu pajomu ku upambala wa kunkache. Bhandu bhabhakabhili bhatama konihoku bhakabhili Bhahiti, Bhaamoli, Bhakanaani, Bhapelizi, Bhahivi na Bhayebusi. 9Bhandu bha Izilaeli bhakabhalapwili bhakolongwa abhabha: Nkolongwa wa ku Yeliko jumu, na nkolongwa wa Ai, ghoubhili pambipi na Beteli, jumu, 10nkolongwa wa Yelusalemu, jumu, nkolongwa wa Hebuloni, jumu, 11nkolongwa wa Yalimuti, jumu, na nkolongwa wa Lakishi, jumu, 12nkolongwa wa Egiloni, jumu, na nkolongwa wa Gezeli, jumu, 13nkolongwa wa Debili, jumu, na nkolongwa wa Gedeli, jumu, 14nkolongwa wa Holima, jumu, na nkolongwa wa Aladi, jumu, 15nkolongwa wa Libina, jumu, na nkolongwa wa Adulamu, jumu, 16nkolongwa wa Makeda, jumu, na nkolongwa wa Beseli, jumu, 17nkolongwa wa Tapua, jumu, na nkolongwa wa Hefeli, jumu, 18nkolongwa wa Afeka, jumu, na nkolongwa wa Lashaloni, jumu, 19nkolongwa wa Madoni, jumu, na nkolongwa wa Hazoli, jumu, 20nkolongwa wa Shimiloni Meloni, jumu, na nkolongwa wa Akishafu, jumu, 21nkolongwa wa Taanaki, jumu, na nkolongwa wa Megido, jumu, 22nkolongwa wa Kedeshi, jumu, na nkolongwa wa Yokineamu ghoubhili ku chitombi cha Kalimeli, jumu, 23nkolongwa wa Doli ghoubhili ku chitombi cha Nafoti Doli, jumu, na nkolongwa wa Goimu ghoubhili ku Giligali, jumu, 24na nkolongwa wa Tiliza, jumu. Bhakolongwa bhanihabha bhokapi bhakabhili selasini na jumu.