Yoshua 13

Pandu pangi pa Kanaani papakabhili pakali ngakutolakeka

1Bhela Yoshua paakabhili akongapili, na kubha na hyaka yamaheli, Bambo Chapanga akumpwaghile, “Wehapa ukongapili namaa, na ubhili na hyaka yamaheli, na kukali kubhili na inchi yamaheli namaa ambayu yakali ngachwitolakike. 2Ayeyi nde inchi yeihighalile: Inchi jokapi ja Bhafilisti na inchi jokapi ja Bhageshuli. 3Kutumbula chikoka cha Shiholi chekibhili ku upambala wa kolipita lyobha wa Misili, kujenda mbaka kungonde ja pandu pa Ekiloni, inchi jejimanyikana kubha nde ja Bhakanaani. Pandu pokapi pa bhakolongwa bha Bhafilishi, Bhagaza, Bhaashidodi, Bhashikeloni, Bhagiti, Bhaekiloni, na Bhaavi. 4Kukabhili na Bhakanaani bhangi bhabhakabhili bhakali kutama ku upambala wa kunkachi, kutumbula ku Meala ja Bhasidoni, mbaka ku Afeka, mu malindakanilu gha Bhaamoli, 5na inchi jokapi ja Bhagebali na Lebanoni, ku upambala wa kolipita lyobha wa Baali Gadi ghoubhili pahi ja chitombi cha Helimoni mbaka kuhika Lebo Hamati. 6Bhandu bhokapi bhabhatama ku itombi yeibhili kutumbula ku Lebanoni mbaka ku Miselefoti Maimu, papamu na pandu pokapi pa Bhasidoni, nepani namwete ananabhatopulaje bhandu bhanihabha bhabhokaje palongi ja bhandu bha Izilaeli. Nambu wehapa ikupalika kubhaghabhila inchi jenjenu bhandu bha Izilaeli kubha upwelelu wabhu, ngati monukulaghalakile. 7Bhela sajenu, ubhaghabhilaje inchi yeniheyi makabila tisa na nusu ja likabila laka Manase kubha upwelelu wabhu.”

Kughabhana pandu pa upambala wa kolipita lyobha wa nkoka Yoludani

8Likabila laka Leubeni, Gadi na nusu ja likabila laka Manase bhakapekiwi upwelelu wabhu ku upambala wa kolipita lyobha wa nkoka Yoludani, ngati Bambo Chapanga moakundaghalakile Musa, mtumika waki. 9Pandu pabhu pakabhili kutumbula ku Aloeli mu ukengu wa nkoka wa Alinoni na muchi ghola ghoubhili pachilanda ja libondi, na inchi jokapi ja uwanda kutumbula ku Madeba mbaka ku Didoni. 10Papamu na michi jokapi jaka Sihoni, nkolongwa wa Bhaamoli, joakatawili ku Heshiboni, mbaka ku malindakanilu gha Bhaamoni. 11Papamu na inchi yokapi ya Gileadi, pandu pa Bhageshuli na Bhamaaka, chitombi chokapi cha Helimoni, na Bashani jokapi mbaka ku Seleka, 12yani ukolongwa wokapi waka Ogu jumu wa Bhalefai bhabhakahighalile, ambaju akatawili ku Ashitaloti na Edeli, mu Bashani. Musa akabhili abhaweziki bhanihabha bhokapi na kubhatopulela kutali. 13Hata bhela, Bhaizilaeli ngachebhatopwili Bhageshuli, wala Bhamaaka, nambu Bhageshuli na Bhamaaka bhejendalela kutama pachilanda ja bhandu bha Izilaeli mbaka lalenu.

14Nambu Musa ngacheabhapekihi bhandu bha likabila la Bhalawi upwelelu wokapi ghola kubha wabhu. Nambu nyambiku yebhakumbokihe Bambo Chapanga, Chapanga wa Izilaeli kwa moto, yeniheyi nde yakabhili upwelelu wabhu, ngati moakumpwaghi Musa.

Pandu paakapekiwi Leubeni

15Apapa nde pandu ambapu Musa akabhapekihi bhandu bha likabila laka Leubeni kubha upwelelu wabhu kulengana na lukolu lwabhu. 16Pandu pabhu pakabhili kutumbula ku Aloeli ghoubhili pambipi na ukengu wa nkoka wa Alinoni, na muchi ghouyongolota nkoka ghonihoghu, papamu na inchi jokapi ja uwanda ghoubhili pambipi na Madeba. 17Mbaka ku Heshiboni papamu na michi jaki jokapi jejibhili ku uwanda, na Diboni, Bamoti Baali, Beti Baali Meoni, 18na Yahasa, Kedemoti, Mefaati, 19na Kiliataimu, Sibima, Seleti Shahali ku chitombi chechibhili mu libondi, 20na Beti Peoli, mihelelu ja chitombi cha Pisiga, Beti Yeshimoti, 21na michi jokapi ja uwanda, inchi jokapi jaka nkolongwa Sihoni wa Bhaamoli joakatawili ku Heshiboni hoku. Musa akabhili amuweziki Sihoni, papamu na bhatawala bha Bhamidiani, ambabhu nde Evi, Lekemu, Suli, Huli na Leba, bhabhakalombini na Sihoni, ambabhu bhakabhili bhatama mu inchi jenijela. 22Balaamu najombi, yani mwana waka Beoli joakabhili nhwabhi, Bhaizilaeli bhakunkomiki kwa lipanga pachilanda ja bhandu bhangi bhabhakomakike. 23Malindakanilu gha inchi ja likabila laka Leubeni ku upambala wa kolijibhi lyobha ukabhili nkoka Yoludani. Michi jeniheji na ijiji yaki yokapi nde yeyakabhili upwelelu wa likabila laka Leubeni, kulengana na lukolu yabhu.

Pandu paakapekiwi Gadi

24Apapa nde pandu ambapu Musa akabhapekihi likabila laka Gadi, kulengana na lukolu lwabhu. 25Malindakanilu ghabhu ghakabhi nde inchi ja Yazeli, michi jokapi ja Gileadi na nusu ja inchi ja Bhaamoni, mbaka ku Aloeli ghoubhili ku upambala wa kolipita lyobha wa Laba, 26na kutumbula ku Heshiboni mbaka ku Lamati Misipa na Betonimu, na kutumbula ku Mahanaimu mbaka ku malindakanilu gha Lodebali. 27Bhelabhela michi jejibhili mu libondi la nkoka Yoludani jakabhili Beti Halamu, Beti Nimila, Sukoti na Zafani na inchi jejakabhili jaka nkolongwa Sihoni wa ku Heshiboni, upambala wa kolipita lyobha wa nkoka Yoludani, na ku upambala wa kunkache malindakanilu gha bahali ja Kineleti. 28Michi jeniheji na ijiji yaki yakabhili nde upwelelu wa likabila laka Gadi, kulengana na lukolu lwabhu.

Inchi jebhakapekiwi nusu ja likabila laka Manase upambala wa kolipita lyobha

29Apapa nde pandu ambapu Musa akabhapekihi nusu ja likabila laka Manase kubha upwelelu wabhu, kulengana na lukolu lwabhu. 30Pandu pabhu pakajaghanili kutumbula ku Mahanaimu, Bashani jokapi, yani ukolongwa wokapi waka Ogu nkolongwa wa Bashani, papamu na ijiji sitini ya Yaili, ku Bashani hoku. 31Papamu na nusu ja Gileadi, na Ashitaloti na Edeli, jejakabhili pahi ja utawala waka Ogu mu Bashani. Pandu panihapa bhakapekiwi nusu ja bhabhelakeka bhaka Makili mwana waka Manase, kulengana na lukolu lwabhu.

32Ghonihoghu nde upwelelu ambau Musa akabhaghabhili mu inchi ja uwanda wa Moabu, kwihi ja nkoka Yoludani, ku upambala wa kolipita lyobha wa Yeliko. 33Nambu kwa likabila la Bhalawi, Musa ngacheabhapekihi upwelelu wokapi ghola, maghambu akabhapwaghili kubha upwelelu wabhu nde nyambiku ya kujochakeka yebhibhohaje kwaka Bambo Chapanga, Chapanga wa Izilaeli.