Yoshua 14

Kughabhanika kwa inchi ja Kanaani

1Apapa nde pandu pa inchi ambapu bhandu bha Izilaeli bhakapatoliki mu inchi ja Kanaani, ambayu Eleazali mpenganyambiku, na Yoshua mwana waka Nuni, papamu na ihongozi bha lukolu ya makabila gha Izilaeli, bhakabhaghabhile. 2Pandu pabhu hapa bhakapaghabhiki kwa kulapula kula ja upwelelu wabhu, ngati Bambo Chapanga moakundaghalaki Musa abhapekyaje makabila tisa na nusu ghala. 3Maghambu Musa akajomwili kubhapekeha makabila ghabheli na nusu ghala upwelelu wabhu ku upambala wa kolipita lyobha wa nkoka Yoludani, nambu Bhalawi ngachebhapekiwi upwelelu pachilanda ja bhajabhu. 4Bhabhelakeka bhaka Yusufu bhakabhili makabhila ghabheli, Manase na Efulaimu. Bhalawi ngachebhapatiki pandu pokapi pala pa inchi, nambu bhakapekiwi pela michi ja kutama, na pandu pa kulekeha hinyama yabhu ya kudimakika na liziki yabhu. 5Bhela, Bhaizilaeli bhakaghabhini inchi jenijela, ngati bhela Bambo Chapanga moakundaghalaki Musa.

Kalebu apekekewa muchi wa Hebuloni.

6Lichobha limu bhandu bha likabila la Yuda bhakunjendili Yoshua ku Giligali hoku. Kalebu mwana wa Yefune, joakabhili wa lukolu lwaka Kenizi, akumpwaghi Yoshua, “Wehapa umanyi lilobhi lela Bambo Chapanga leakumpwaghi Musa, mundu waka Chapanga hoju, kwa ndandi jangu nepani na wehapa, chikahi patukabhili ku Kadeshi Balinea. 7Panakabhili na umuli wa hyaka alobaini, Musa mtumika waka Bambo Chapanga, akandumiki kuhuma ku Kadeshi Belinea na kujenda kujipeleleza inchi jeniheje. Nanatu nakundetili malobhi kulengana na monabhonile muntima wangu. 8Nambu bhalongu bhangu bhabhakweliki papamu na nepani bhakajitendiki mitima ja bhandu kuhekateka kwa choghohi chikolongwa, nambu nepani nakunjengalili Bambo Chapanga, Chapanga wangu, kwa mtima wokapi. 9Bhela mu lichobha lenilela, Musa akanapile, ‘Chakaka inchi jela jeujikanyiti kwa magholu ghaku anajikubhaje upwelelu waku wehapa, na bhana bhaku mileli, maghambu unjengalili Bambo Chapanga, Chapanga wangu, kwa mtima wokapi.’ 10Nambu sajenu, lingalyaje! Nde chikahi cha hyaka alobaini na nhwanu kutumbula Bambo Chapanga paakalongili na Musa, chikahi Bhaizilaeli pabhakabhili bhapeta mulipololu. Bhela kutumbula chikahi chenihechi mbaka lalenu, nepani mili na umuli wa hyaka semanini na nhwanu. 11Nambu nakali mili na makili ngati lichobha lela Musa paakandumike. Ngati makili ghangu moghabhelile chikahi chenihechi, nde moghabhelile sajenu. Mili na makili gha kujenda kungondo sajenu ngati monabhelile chikahi chenichela. 12Bhela sajenu nukulobha umbekyaje inchi ajeji ja itombi, ambaju Bambo Chapanga akanaghili lichobha lela. Maghambu wehapa wamwete ukajowini lichobha lela Bhaanaki mobhakabhelili konihoku, na michi jabhu mojabhelili mikolongwa na jejichengakiki lumatu, Bambo Chapanga, anaanyangatile, ananabhatopulaje bhokapi bhabhokaje monihomu, ngati Bambo Chapanga moakapwaghile.”

13Bhela Yoshua akumpengalili Kalebu mwana waka Yefune, na kumpekeha pandu pa muchi wa Hebuloni kubha upwelelu waki. 14Bhela muchi wa Hebuloni ubhili pandu paka Kalebu mwana waka Yefune, wa lukolu lwaka Kenizi, mbaka lalenu. Maghambu akabhili ndongwana kwaka Bambo Chapanga, Chapanga wa Izilaeli, kwa mtima waki wokapi. 15Pakutumbula hapa muchi wa Hebuloni ukalowakiki Kiliati Aliba, Aliba akabhili mundu nkolongwa kupeta bhandu bhokapi pachilanda ja Bhaanaki.

Bhela inchi jokapi jakabhili na lukwali panga kubha na ngondo.