Yoshua 15

Pandu pabhakapekiwi bhandu bha likabila la Yuda

1Pandu pa inchi jebhakapekiwi kwa kulapula kula bhandu bha likabila la Yuda, kulengana na lukolu lwabhu, pakajaghanili kutumbula ku upambala wa kunkachi na kolipita lyobha mbaka ku malindakanilu gha Edomu. Ku pandu pa kunkachi nakanopi kukabhili na lipololu la Sini. 2Ulindakanilu wabhu wa kunkachi ukatumbulili mu chimbundi chechibhili ku kunkachi ja Bahali ja Mwinyu, 3ukajendalili kunkachi ja indela ja Akilabimu, na kujenda mbaka ku Sini, na ku upambala wa kunkachi wa Kadeshi Belinea. Bhelabhela ukapetili ku Hesiloni, na kukwela mbaka ku Adali, na kuyongolota kujenda mbaka ku Kalika. 4Kuhuma panihapa ukajendalili mbaka ku Azimoni na kulombaneka na kikoka cha Misili, na kujomukela ku bahali ja Meditelania. Ghonihoghu ukabhili nde ulindakanilu wabhu wa upambala wa kunkachi wa likabila la Yuda. 5Ulindakanilu wa upambala wa kolipita lyobha ukabhili nde Bahali ja Mwinyu, na kujendalela mbaka pandu pala nkoka Yoludani paujingalila mubahali.

Ulindakanilu wa upambala wa kungonde ukatumbulili pa chimbundi cha Bahali ja Mwinyu pandu ambapu nkoka Yoludani ujingalila mubahali. 6Ulindakanilu ghonihoghu ukapetiki mbaka ku Beti Hogila, na kujendalela kungonde ja Beti Alaba mbaka ku liganga la Bohani, mwana waka Leubeni. 7Kuhuma panihapa, ulindakanilu ukajendalili mbaka ku Debili, kuhuma ku libondi la Akoli na kungonde kujenda mbaka ku Giligali, ghoubhili pambipi na indela ja kujenda ku Adumimu, ghoubhili kunkachi ja nkoka. Bhela ulindakanilu ghonihoghu ukajendalili mbaka ku chemuchemu ja machi gha Eni Shemeshi na kujomukela ku Eni Logeli. 8Bhela ulindakanilu ghonihoghu ukapetiki mbaka ku libondi la Hinomu, upambala wa kunkachi wa nhwelelu wa muchi ukolongwa wa Bhayebusi, yani Yelusalemu. Kuhuma panihapa ukajendalili mbaka kunani ja chitombi chechibhili ku upambala wa kolijibhi lyobha wa libondi la Hinomu na kuhika mbaka ku ujomukelu wa libondi la Bhalefai, ku upambala wa kungonde. 9Kuhuma panani ja chitombi chenihechi, ulindakanilu ghonihoghu ukajendalili mbaka ku chemuchemu ja machi gha Nefitoa, na kupitalila mbaka ku muchi wa chitombi cha Efuloni, na kuhelela kujenda ku Baala, yani Kiliati Yealimu. 10Kuhuma panihapa ulindakanilu ukayongalwiti kuhuma ku Baala mbaka ku chitombi cha Seili, ukapetiki kungonde ja chitombi cha Yelimu, yani Kesaloni, na kuhelela mbaka ku Beti Shemeshi ambapu ukapetiki pambipi na Timuna. 11Bhela ukajendalili upambala wa kungonde ja Ekiloni ukalyongaliti kujenda ku Shikiloni ambapu ukapetiki pambipi na chitombi cha Baala, na kupitalila ku muchi wa Yabineeli. Ukatemi mu Bahali ja Meditelania. 12Ulindakanilu wa kolijibii lyoba ukabhili mu maheku ja bahali ja Meditelania.

Ghanihagha ghakabhili nde malindakanilu gha bhandu bha likabila la Yuda kulengana na lukolu lwabhu.

Bhandu bhaka Kalebu bhajitola mateka michi ja Hebuloni na Debili

Bhaamuzi 1:11-15

13Kalebu mwana waka Yefune, akapekiwi pandu pa inchi jaka Yuda ngati Bambo Chapanga moakundaghalaki Yoshua. Akapekiwi Kiliati Aliba au muchi waka Aliba ambaju akabhili hokolu waka Anaki. Muchi ghonihoghu sajenu ulowakeka Hebuloni. 14Kuhuma ku muchi wa Hebuloni, Kalebu akabhatopwili lukolu itatu yaka Anaki, yani lukolu lwaka Sheshai, lukolu lwaka Ahimani na lukolu lwaka Talimai. 15Kuhuma ku Hebuloni akakweliki kujenda kubhalapula bhenei bha muchi wa Debili, lihina la Debili pakutumbula hapa ukalowakiki Kiliati Sefeli. 16Kalebu akapwaghike, “Ananuntoghukyaje mwali wangu Akisa kwaka mwanalomi jokapi jola joanautolaje mateka muchi wa Kiliati Sefeli.” 17Bhela Otinieli mwana waka Kenazi, ndongu waka Kalebu, akautoliki mateka muchi ghonihoghu, panihapa Kalebu akuntoghukili Akisa mwali waki kwaka mwanalomi jonihoju. 18Mu lichobha labhu la ndowa, Akisa akapiti kulobha ngonda kwaka Kalebu, tati waki. Panihapa Akisa akahulwiki kuhuma panani ja liponda laki, na Kalebu akundalukile, “Bho, upala nukupekya kike?” 19Akisa akayangike, “Umbekya mbengalelu. Kwa kubha umbekihi ngonda ku pandu pajomu ku upambala wa kunkache, nukulobha umbekyaje na pandu papabhili na chemichemi bhelabhela.” Bhela Kalebu akumpekihi chemuchemu ya machi ya kundonda, na chemuchemu ya machi ya pahi.

Michi ja likabila laka Yuda

20Aghoghu nde upwelelu ghobhakapekiwi bhandu bha likabila la Yuda, kulengana na lukolu lwabhu. 21Michi jejabhili upambala wa kunkachi nakanopi mwa inchi ja Yuda kujenda ku ulindakanilu wa Edomu jakabhili Kabiseeli, Edeli na Yaguli, 22na Kina, Dimona na Adada, 23na Kedeshi, Hazoli na Itinani, 24na Zifu, Telemu na Bealoti, 25na Hazoli Hadata, Kelioti Heziloni, yani Hazoli, 26na Amamu, Shema na Molada, 27na Hasali Gada, Heshimoni na Beti Peleti, 28na Hasali Shuali, Beeli Sheba na Biziotia, 29na Baala, Iyimu na Esemu, 30na Elitoladi, Kesili na Holima, 31na Sikilagi, Madimana na Sanisana, 32na Lebaoti, Shilihimu, Aini na Limoni. Michi jeniheji jokapi jakabhili ishilini na tisa, papamu na ijiji yaki.

33Michi jejabhili ku tutombi twa kolijibhi lyobha jakabhili Eshitaliti, Sola na Ashina, 34na Zanoa, Enganimu, Tapua na Enamu, 35na Yalimuti, Adulamu, Soko na Azeka, 36na Shaalaimu, Aditaimu, Gedela na Gedelotaimu. Michi jeniheji jokapi jakabhili komi na nchechi, papamu na ijiji yaki.

37Bhelabhela bhakapekiwi michi ja Senani, Hadasha na Migidali Gadi, 38na Dileani, Misipa na Yokiteeli, 39na Lakishi, Bosikati na Egiloni, 40na Kaboni, Lamasi na Kitilishi, 41na Gedeloti, Beti Dagoni, Naama na Makeda. Michi jeniheji jokapi jakabhili komi na sita, papamu na ijiji yaki.

42Bhelabhela bhakapekiwi michi ja Libina na Eteli na Ashani, 43na Yifita, Ashina na Nesibu, 44na Keila, Akizibu, na Malesha. Michi jeniheji jokapi jakabhi tisa, papamu na ijiji yaki.

45Bhelabhela bhakapekiwi Ekiloni papamu na michi jaki na ijiji yaki. 46Kuhuma ku Ekiloni mbaka ku bahali ja Meditelania, yokapi yakabhili upambala wa Ashidodi, papamu na ijiji yaki.

47Ashidodi, michi jaki papamu na ijiji yaki, papamu na Gaza, michi jaki na ijiji yaki, mbaka kuhika ku kikoka cha Misili na mumaheku ja bahali ja Meditelania.

48Michi jejebhili ku inchi ja itombi jakabhili Shamili, Yatili na Soko, 49na Dana na Kiliati Sana, yani Debili, 50na Anabu, Eshitemoa na Animu, 51na Gosheni, Holoni na Gilo. Michi jeniheji jokapi jakabhili komi na ghumu, papamu na ijiji yaki.

52Bhelabhela bhakapekiwi michi ja Alabu, Duma na Eshani, 53na Yanimu, Beti Tapua na Afeka, 54na Humta, Kiliati Aliba, yani Hebuloni, na Sioli. Michi jeniheji jokapi jakabhili tisa, papamu na ijiji yaki.

55Bhelabhela bhakapekiwi michi ja Maoni, Kalimeli, Zifu na Yuta, 56na Yezileeli, Yokideamu na Zanoa, 57na Kaini, Gibea na Timuna. Michi jeniheji jokapi jakabhili komi, papamu na ijiji yaki.

58Bhelabhela bhakapekiwi michi ja Halihuli, Beti Suli na Gedoli, 59na Maalati, Beti Anoti na Elitekoni. Michi jeniheji jokapi jakabhili sita, papamu na ijiji yaki.

60Bhelabhela bhakapekiwi Kiliati Baali, yani Kiliati Yealimu, na Laba. Michi jeniheji jokapi jakabhi jibheli, papamu na ijiji yaki.

61Michi ja kuchingwenji hoku jakabhili Beti Alaba, Midini na Sekaka, 62na Nibishani, na Muchi wa mwinyu, na Engedi. Michi jeniheji jokapi jakabhili sita, papamu na ijiji yaki.

63Nambu bhandu bha likabila laka Yuda ngachebhaweziki kubhatopola Bhayebusi, bhabhakabhili bhatama ku Yelusalemu. Bhayebusi bhanihabha bhakali kutama papamu na bhandu bha likabilla laka Yuda mbaka lalenu.