Yoshua 16

Inchi jaka Efulaimu na Manase

1Pandu pabhakapekiwi bhabhelakeka bhaka Yusufu kwa kulapula kula pakatumbwili pa nkoka Yoludani, upambala wa kolipita lyobha wa muchi wa Yeliko, na kuhuma panihapa ukakweliki kupetela lipololu na kujingila mu inchi ja itombi ya Beseli. 2Kuhuma ku Beseli ulindakanilu ukapiti ku Luzu, na ukapetiki ku Ataloti kobhakabhili bhatama Bhaaliki. 3Kuhuma panihapa ukahelili ku upambala wa kolijibhi lyobha wa Bhayafuleti mbaka ku Beti Holoni ja pahi, na kuhika mbaka ku Gezeli, na kujomukela ku bahali ja Meditelania.

4Bhabhelakeka bhaka Yusufu, yani nusu ja likabila laka Manase na likabila laka Efulaimu, bhakapekiwi inchi jeniheji kubha upwelelu wabhu.

Inchi ja likabila laka Efulaimu

5Bhandu bha likabila laka Efulaimu, kulengana na lukolu lwabhu bhakapatiki pandu pabhu ambapu ulindakanilu waki kwa upambala wa kolipita lyobha ukapetiki ku Ataloti Adali, mbaka ku Beti Holoni ja Kunane, 6na kujendalela mbaka ku bahali ja Meditelania. Kwa upambala wa kungonde ulindakanilu ukapetiki ku Mikimeta, na kuhuma panihapa ulindakanilu ukayongalwiti kujenda ku upambala wa kolipita lyobha mbaka ku Taanati Shilo, na kujendalela upambala wa kolipita lyobha wa Yanoa. 7Kuhuma ku Yanoa ulindakanilu ukahelili pahi mbaka ku Ataloti na Naala, na kuhika mbaka ku Yeliko, na kujomukela ku nkoka wa Yoludani. 8Kuhuma ku Tapua ulindakanilu ukajendalili upambala wa kolijibhi lyobha mbaka ku kikoka cha Kana, na kujomukela ku bahali ja Meditelania. Aghoghu ukabhili nde upwelelu wa likabila la Bhaefulaimu, kwa kulengana na lukolu lwabhu, 9papamu na michi jokapi na ijiji yaki ambayu yakatengakiki kwa ndandi ja Bhaefulaimu mkati ja upwelelu wa nusu likabila laka Manase. 10Bhaefulaimu ngachebhatopwili Bhakanaani bhabhakabhi bhatama ku Gezeli, nambu Bhakanaani bhatama pachilanda ja bhandu bhaka Efulaimu mbaka lalenu, koni bhakabya bhatumwa bha kuhenga mahengu gha kujomalakewa.