Kombukombu la Tolati 18

Lifungu la bhapenganyambiku

1“Bhapenganyambiku Bhalawi, yani likabila lokapi la Lawi, ngabhikubha na pandu pabhu pa inchi pachilanda ja Izilaeli. Bhombi anabhatamaje kwa kula nyambiku yeibhohakeka kwa ndandi jaka Bambo Chapanga ya kujochakeka kwa moto, maghambu yeniheyi nde lifungu labhu. 2Ngabhikubhi na pandu pa inchi jabhu pachilanda ja bhalongu bhabhu Bhaizilaeli, lifungu labhu nde kubha bhapenganyambiku bhaka Bambo Chapanga, ngati moakabhalaghile.

3“Haleli nde lifungu la bhapenganyambiku kuhuma kwa bhandu bhabhabhoha nyambiku, ikubhi nde ng'ombi au limbeleli, bhumpekyaje mpenganyambiku chigholu cha kulongi, inyama ja matukwa ghabheli, na hindu ya mkati ya chinyama hechi. 4Mubhapekyaje pandu pa kutumbula pa mahunu ghinu, divai, mahuta ghinu gha zeituni, na sufu ja kutumbula kuhuma mu mangoma gha mambeleli ghinu. 5Maghambu Bambo Chapanga, Chapanga winu, abhahawili Bhalawi papamu na bhabhelakeka bhabhu kuhuma mu makabila ghinu ghokapi, nahuli bhajemaje na kutumika ngati bhapenganyamabiku kwa lihina laka Bambo Chapanga mileli.

6“Ngati anakubhi Mlawi jokapi jola anahamiki kuhuma mu ghumu wa michi ja Izilaeli paakabhi atama, na kuhika kwa mtima waki wokapi pandu pala payihaghulaje Bambo Chapanga, 7aweza kutumika panihapa kwa lihina laka Bambo Chapanga, Chapanga waki, ngati mobhahengela Bhalawi bhajaki bhabhatumika palongi jaka Bambo Chapanga. 8Anabhapataje lifungu labhu lelilengana la chilebhi, hata ngati anabhajopiki mbija kubhokana na kuhemalela mali gha bhalongu bhabhu.

Malakalilu kubhokana na mitetu ja kigheni

9“Chikahi pamwijingalaje mu inchi jeampekeha Bambo Chapanga, Chapanga winu, ngamwalibhola kujigha indela ya mahakalilu ghaghahengakeka na bhandu bha inchi ya konihoku. 10Ngapibhonikana mundu jokapi jola pachilanda jinu joamboha mwana waki wa chikambku au wa chimbomba kubha nyambiku ja kujochakeka kwa moto, wala mundu joatenda lamuli, wala joalondola, wala nhwabhi, 11wala joategha kwa kukonga mahundwa, wala mlozi, wala joajojabhela mahoka na majobhi, wala joabhalobha bhabhapotile. 12Maghambu mundu jokapi joahenga mambu ghanihagha nde lihakalilu kwaka Bambo Chapanga, Chapanga winu, na kwa ndandi ja mambu ghanihagha gha kuhakalia, Bambo Chapanga, Chapanga winu, abhatopola bhandu bha ntundu ghonihoghu palongi jinu. 13Ukubhaje undongwana palongi jaka Bambo Chapanga, Chapanga waku.

Chilanga cha kupekewa mlota

14“Bhandu bha inchi ayeyi ambabhu anamubhatopulaje na kujitola inchi jabhu bhajengalela ulonguheku wa bhalondola na bhaganga, nambu kwinu mwehapa, Bambo Chapanga, Chapanga winu, ngacheanjetakili kuhenga bhenibhela. 15Bambo Chapanga, Chapanga winu, anaanjinulyaje mlota ngati nepani kuhuma pachilanda ja bhalongu bhinu Bhaizilaeli, impalika munjowanya jombi.

16“Maghambu bhenibhela nde momukundobhile Bambo Chapanga, Chapanga winu, ku Holebu kola, lichobha lela lemukalibhongini na kupwagha, ‘Ngatwijowana kabhete sauti jaka Bambo Chapanga, Chapanga witu, wala kuubhona moto aghoghu ukolongwa, nahuli ngatwihika kupotela.’ 17Bhela Bambo Chapanga akambwaghile, ‘Bhahengiki wichu kupwagha bhenibhela. 18Ananabhahaghulyaje mlota ngati wehapa kuhuma pachilanda ja bhalongu bhabhu Bhaizilaeli, nanatu ananyeghalaje malobhi ghangu mundomu waki, najombi anaampwaghilaje kila chindu chenandaghalakyaje. 19Ngati mundu jokapi jola ngayijowaneli malobhi ghangu ghayipwaghaje mlota hoju kwa lihina langu, nepani namwete ananundapulaje. 20Nambu mlota jokapi jola joanalongilaje kwa lihina langu chindu chokapi chela, ambachu ngachenundaghalaki kupwagha, au mlota joanapwaghaje kwa lihina la ichapanga nayenge, mlota hoju impalika akomakikaje.’

21“Nambu anampwaghiki mu mitima jinu, ‘Bho, anatumanya bholi lilobhi langakuhuma kwaka Bambo Chapanga?’ ” 22Ngati mlota jokapi jola anaapwaghiki lilobhi kwa lihina laka Bambo Chapanga, na lijambu heli nangakuhengakeka au nangakupitalila, mmanyaje kubha lijambu leniheli ngacheakapwaghiki Bambo Chapanga. Mlota hoju alipwaghiki kwa umanyi waki mweni, ngamwanjoghopa jonihoju.