Mihilimo

CHITABU CHA

MIHILIMO

ULONGOZI

Aho kale chitabu cha 1 na 2 cha Mihilimo chendaga chitabu chimwenga chikulu. Kwa nkanana ya nkongo vyatendagwa vitabu vidi mwe ichitabu cho utapita cha lagano dya kale mwe longa dya kale dya Chigiliki mwe chitabu chikwitangwa Sepugianti. Zina dya nkongo dye ichitabu che mihilimo mwe Chiyahudi ni kugamba, “Mbuli zilaile mwe mazuwa yalozize.” Wasomi walozize wazumila kugamba Ezila nuyo awandike ivitabu ivyo vya 1 na 2 vya Mihilimo na kuvihanganya hamwenga iviya ichitabu cha Ezila na Nehemiah. Mwandika kajeseza nkongelo zilozize vikatendesa ivitabu vya Samwilu na ivitabu vya Maseuta, mokuvidamanya ivitabu vino. Seivyo wasomi walozize wazumila kugamba chawandikagwa mwe inusu ye iakaline ya shano Henati kwelekwa Kulisito, vyadaha kutenda umo Ezila echei mjima.

Ivitabu vya 1 na 2 Mihilimo vyakonga na uludongo lwo wababa zawo kulawa Adamu kubula Ibulahimu, na nkongelo ya awantu wa Izulaeli kubula ichipindi Waizulaeli wakauya uko wasamizizwaga. Kulawa aho vitabu vye imihilimo vyatambalisa ulukumbusa lwa Waizulaeli kulawa mo udumo wo ulongozi wa Seuta Sauli kubula ukubalangwa ko umzi wa Yelusalemu na wantu wababeli. Mwe ivitabu vyose ivyo vye imihilimo, mwandika awandike kalongesa mbuli ze Inyumba ya Chohile uko Yelusalemu. Daudi kamalanya mbuli zilozize kwachausa cha kuizenga uhya Inyumba ya Chohile (1 Mihilimo kukongela sula ya 28-29) na vikaheza mwanawe Sulemani niyo aizenga (2 Mihilimo sula ya 2-7). Mwandika we ivitabu vye Mihilimo seivyo alongesaga ivyo Inyumba ya Chohile ibalangwe na iviya vyakwe kuguhigwa, (2 Mihilimo Sula ya 36 msitali wa 15-21). Kwa kubindiliza, msitali wa udumo (2 Mihilimo sula ya 36 msitali wa 23) wabunkula ivyo Inyumba ya Chohile naizengwe.

Yemndani mwe chitabu cha nkongo che Mihilimo

Chitabu che 1 Mihilimo chatambalisa uludongo lwa awababa kukongela Adamu kubula Waizulaeli umo wauyaga kulawa uko Babiloni wasamizizagwa mwe isula 1-9.

Iviya ichitabu chino chatambalisa mbuli zo wikazi wa Daudi no useuta wakwe mwe isi ya Izulaeli Sula 10-29.