Mihilimo 17

Ulosi wa Nasani kwa Daudi 2 Samwilu 7:1-17

1Umo seuta Daudi akekala kwenyumbakwe yo useuta, zuwa dimwenga amwitangaga muoni Nasani, amgamba, “Hake kaula, miye nekala mwe nyumba ntana izengigwe kwa miti ya mihugwe, mna idishanduku dye idilagano dya Chohile dyekala kwedihema.” 2Nasani niyo amgamba Daudi, “Damanya chochose ukufanyanya mo moyo wako, kwaviya Chohile ehamwenga na weye.” 3Mna ichilo icho, Chohile niyo alonga na Nasani amgamba, 4“Hita kamgambe mndima ywangu Daudi, Chohile agamba vino, ‘Weye honizengele nyumba ya kwikala. 5Kukongela umo niwakombole awantu wa Izulaeli kulawa Misili kubula vino dyelo, sekalaga mwe nyumba. Nendile hekala mwe hema nadikasamizwa kulawa ntendele imwenga kwita ntendele ntuhu. 6Togola, chila hantu nitile na Waizulaeli, namuzaga chilongozi yoyose nimgambile adime wantu wangu kwambwani hunizengele nyumba ya miti ya myelezi.’ 7Elo, mgambe mndima ywangu Daudi, Chohile mta udahi agamba vino, ‘Nasikulavya kweludimo uko nokadima ngoto, chani utende mkulu ywa wantu wa Izulaeli. 8Kukongela mwe ichipindi icho nasitenda hamwenga na weye kokose witike naho wankondo wako siwahuda kulongoza kwako. Nahutende umanyikise saviya wakulu watuhu wa mwe isi. 9Miye naniwasagwile wantu wangu wa Izulaeli hantu hakwikala niwaike chani wekale hantu hawo wenye wasekusigwa naho. Wantu wajilajila wakujeseza nguvu hawawasulumize naho saviya nkongo. 10Kukongela nkongo nasagulaga walamuzi mwa wantu wa Izulaeli, miye naniwahude wahigani wako wose. Naho miye Chohile nakugambila welekwa wako nawatende maseuta. 11Mazuwa yako yo kubanika yanabula na kulungana na wababa zako nanimtende yumwenga mwa wanawo atende seuta, nami naniutogeze useuta wako. 12Uyo nuyo nanizengele nyumba, nami nanimanye kugamba useuta wakwe wekala kale na kale. 13Miye nanitende tati yakwe naye natende mwanangu, sanimusize ungi wangu saviya nimusize seuta Sauli akulongoile. 14Mna nanimtogeze alongoze awantu wangu wa Izulaeli no useuta wangu wekala mazuwa yose ne ichigoda chakwe cho useuta nanchitogeze mazuwa yose.’” 15Nasani niyo amgamba Daudi mbuli zose awone mo uwoni uwo wose agubwilwe ni Chohile.

Lombezo dya Daudi dya kutogola

2Samwilu 7:18-29

16Seuta Daudi niyo engila mwe idihema dikukile amlombeza Chohile agamba, “Weye Chihile miye ni yuhi naho welekwa wangu ni chintu chani kubula kunijimbika savino? 17Ukaleka ayo kunidamanyiza mbuli zilozize, kunilagisa lagano mwe welekwa wangu wakwiza weye Chohile. Kunikaula saviya mntu akulise kujinka wantu wose, weye Zumbe Chohile! 18Hugeze naho, miye Daudi mndima ywako, kunitunya saivyo. Weye kunimanya miye mndima ywako. 19Weye Chohile kwachausa cha mndima ywako na saviya ukunga mwenye kutenda mbuli izo nkulu zose, chani ndagano zako nkulu zimanyike. 20Hahana mntu mtuhu saweye Zumbe Chohile, elo Hahana Chohile mna weye, saviya chivile kwa magutwi yetu wenye. 21Naho ni wantu wahi mwe izisi zose wakudaha kuliganywa na wantu wako wa Izulaeli wadya Chohile ywawo aitaga kwekuwakombola chani watende wantu wakwe? Weye watendaga idizina dyako dimanyikise kwa kudamanya mbuli nkulu na zakwehela aho wawabalazaga wantu we izisi izintuhu kulongozi kwa wantu wako awo ukombole kulawa Misili. 22Ni weye uwatendile wantu wa Izulaeli watende wantu wako mwenye mazuwa yose, na weye Zumbe Chohile kutenda Chohile ywawo.” 23“Elo haluse, weye Chohile utogeze ulosi wako mazuwa yose ulongile ukanilanga miye mndima ywako na kulanga awelekwa wangu. 24Ne idizina dyako naditogolwe mazuwa yose, wantu nawo nawagambe, ‘Chohile mta nguvu, nuyo Chohile ywa Izulaeli na awelekwa wangu, miye Daudi mndima ywako!’ Na awelekwa wangu miye Daudi mndima ywako na ulongozi wangu kwako nautende wa kale na kale mwako. 25Weye Chohile ywangu, kwelagisa kwa mndima ywako kugamba ulongozi wangu nawikalise kale na kale, elo miye mndima ywako sitenda na ukankalu wa kulombeza amalombezo yano. 26Haluse weye Chohile, niweye Chohile kunikiya lagano miye mndima ywako, mbuli ino yedi, 27elo nakulombeza wajimbika awantu we ikaya ya mndima ywako, chani wadahe kwikala kulongozi kwako mazuwa yose, kwachausa chako, kwaviya chiya ukujimbika weye chatenda chijimbikwa kale na kale.”