Mihilimo 16

1Niyo wadingiza Idishanduku dya Chohile wadika mndani mwe idihema dyazengagwa ni Daudi, niyo walavya ntambiko za kutikinya na za tondowazi kulongozi kwa Chohile. 2Daudi eze abinde kulavya izintambiko izo, niyo amlombeza Zumbe Chohile awajimbika wantu, 3niyo awapangila Waizulaeli wose, wavyele kwa wagosi, chila yumwenga kenkigwa mkate na chihande cha nyama na mgate wa ntambiko. 4Daudi niyo asagula Walawi wasiku wasankane kulongozi kwe Idishanduku dya Chohile, wamvikile na kumtunya naho wamtogole Zumbe Chohile ywa Izulaeli. 5Amsagulaga Asafu atende chilongozi ywawo, akambizwa ni Zakaliya. Yeieli na Shemilamoti Yehieli na Metisiya na Eliyabu na Benaya na Obedi Yehieli awasagulaga watende watoa magunda na miluli. Asafu nendile akatowa vilangu, 6awo walavyantambiko Benaya na Yahalieli wasagulwa watende watowa magunda ulonaulo kulongozi kwe Idishanduku dya Chohile. 7Zuwa idyo dyatendaga dya nkongo kwa Daudi kumwinka Asafu na walukolo wakwe Walawi watende na ndima ya kumchemela Chohile nchemo za ntogozi.

Nchemo ya ntogozi Zabuli

Zabuli 96:1-13, 106:47-48

8Mtogoleni Zumbe Chohile,

longani ukulu wakwe,

wagambileni wantu we izisi ntuhu mbuli adamanye! 9Mchemeleni nchemo za ntogozi, 10wagambileni maula yakwe yose.

Kweduvyeni kwa zina dyakwe dikukile

naho moyo wa wadya wakumlonda Zumbe utende na chinyemi! 11Mlondeni Zumbe ne izinguvu zakwe,

mvikileni mazuwa yose. 12Kumbukani ntendwa zakwe adamanye,

na mpituko zakwe na nkanto zakwe alongile. 13Nyuwe welekwa wa Waizulaeli mndima ywakwe,

nyuwe wana wa Yakobo lusagulo lwakwe. 14Uyo Zumbe nuyo Chohile ywetu,

nkanto zakwe zawoneka mwe isi yose. 15Uyo atoza ndagano yakwe kale na kale,

kumbukani achintiza ulosi wakwe kwa vyeleko elufu. 16Lagano ekiye na Ibulahimu,

na cheliso amwelisize Isaka. 17Zumbe Chohile aikaga lagano na Yakobo kwa Waizulaeli,

niyo amlavyanyiza Izulaeli lagano idyo dya kale na kale. 18Alongaga, “Naniwenkeni isi ya Kanani,

itende yenyu wenye.” 19Mligano wenyu wendaga mdodo,

mwendaga wajeche naho mwendaga wajeni kwe isi ya Kanani. 20Mkangadika kulawa isi ino kwita kwe isi ntuhu,

na kulawa useuta kwita kwe useuta mtuhu. 21Chohile hamlekeile mntu yoyose awazileni,

kwakuwadima, kawakwahila maseuta. 22“Msekujeza kuwakufya awantu wangu nisagule,

msekuwalumiza waoni wangu!” 23Wantu we izisi zose mchemeleni Chohile.

Longani ntendwa zakwe za wambulwa mazuwa yose. 24Wagambileni wantu we izisi zose ukulu wakwe,

wagambileni wantu wose ntendwa zakwe zikwehela. 25Kwaviya Chohile ni mkulu akuwagila kutunywa kujinka milungu yose,

uyo ni mta kogohigwa kujinka milungu mituhu yose. 26Milungu yose ye izisi ntuhu sicho chintu,

mna Chohile aumbaga izimbingu. 27Ukuka na ntogozi vyamzunguluka,

nguvu na chinyemi vyamemeza Inyumba yakwe. 28Mwinkeni Zumbe Chohile ntunyo nyuwe wantu wose mwe izisi zose,

heye, zumilani ukulu wakwe ne izinguvu zakwe. 29Mwinkeni Chohile ntunyo yo ukulu we idizina dyakwe,

mwigaileni ntambiko naho ingilani mwe Inyumbakwe.

Mvikileni Chohile hantu hakwe hakukile, 30nyuwe wantu wose mwe izisi zingizani kulongozi kwakwe!

Isi kaitenda itogile, haisingisike. 31Elelwani nyuwe mbingu ne isi!

Zigambileni izisi, “Zumbe Chohile ni seuta!” 32Bahali naivumile, hamwenga ne ivintu vyose viyumo!

Nkonde ne ivintu vyose viyumo navyelelwe! 33Nyuwe miti yose kumbago chemani kwa chinyemi kulongozi kwa Chohile akwiza,

heye akwiza kuikantila isi. 34Mtogoleni Chohile kwaviya ni ywedi,

kwaviya wedi wakwe wekala kale na kale! 35Mgambeni Chohile, uchambule weye Chohile ywa wambulwa wetu,

chichisanye hamwenga na kuchambula kulawa kwe izisi izintuhu,

chani chiditogole idizina dyako dikukile na kuwona chinyemi mo ukulu wako. 36Atogolwe Chohile, Chohile ywa Izulaeli,

kukongela kale na kale kubula kale na kale! Wantu wose niyo wagamba, “Taile!” Niyo wamtogola Chohile.

Mviko uko Yelusalemu na Gibeoni

37Elo seuta Daudi kawaika Asafu na walukolo weyawe Walawi hantu wadikiye Idishanduku dye Idilagano dya Chohile, kwachausa cha ndima nazugwe kulongozi kwe Idishanduku chila zuwa. 38Obediedomu, mwana ywa Yedusuni, hamwenga na weyawe milongo mtandatu na mnane wawambizaga. Obediedomu mwana ywa Yedusuni na Hosa nendile ni wamizi we izinyivi. 39Seuta Daudi niyo amwika mlavyantambiko Sadoki na walavyangtambiko weyawe watende wandima we idihema dikukile dyendile hantu hakuvikila uko Gibeoni, 40chani wamlavize Zumbe Chohile ntambiko za kutikimya mlanga mwe mazabahu ya kulaviza ntambiko za kutikimya mazuwa yose mtondo na chisingi, kuligana na yose yawandikwe mwe sigilizi ya Chohile awalagize Waizulaeli. 41Hamwenga na awo wendaga Hemani na Yedusuni na wadya wose wasagulwe na kutajwa amazina yawo, chani wamhongeze Zumbe Chohile kwa wedi wakwe wa kale na kale. 42Hemani na Yedusuni wendaga nawo awamizi wa amagunda ne miluli ne ivimpandwa vituhu kwachausa cha ntogozi kwa Chohile. Wana wa Yedusuni wasagulagwa watende wamizi we izinchili. 43Ukajika chila mntu niyo ahalawa aita kwenyumbakwe, Daudi naye niyo aita kwenyumbakwe awajimbika awantu mwe ikaya yakwe.