Mihilimo 15

Kumalanya kusamisaza Idishanduku dye Dilagano

1Daudi eze ezengele nyumba zilozize momzi wa Daudi Yelusalemu. Awalagizaga awandima wakwe walonde hantu hakuzenga Hema dya kudikiya Idishanduku dye Dilagano. 2Vikaheza Daudi agamba, “Hahana mntu mtuhu akungigwa kudinula Idishanduku dye Dilagano ukaleka Walawi, kwaviya Zumbe Chohile nuyo awasagule awo wenule Idishanduku dye Dilagano na kumsankanila uyo mazuwa yose.” 3Ivyo Daudi niyo awachisanya wantu wose wa Izulaeli waite Yelusalemu, wadigale Idishanduku dye Dilagano dya Zumbe Chohile hantu amalanye dikwe. 4Akaheza niyo awetanga welekwa wa Aloni na welekwa wa Walawi. 5Wezile kulawa mo lukolo lwa Kohati ni, Ulieli hamwenga na welekwa wawo gana na milongo midi wakachimailwa ni Ulieli, 6kulawa mo lukolo lwa Meleli wezile ni Asaya, hamwenga na walukolo wakwe magana maidi na milongo midi akawachimaila mwenye, 7kulawa mo lukolo lwa Gelishoni, ni Yoeli hamwenga na walukolo wakwe gana dimwenga na milongo mitatu akawachimaila mwenye, 8kulawa mo lukolo lwa Elisafani, ni Shemaya hamwenga na walukolo wakwe magana maidi akawachimaila mwenye, 9kulawa mo lukolo lwa Hebuloni, ni Elieli hamwenga na walukolo wakwe milongo mnane akawachimaila mwenye, 10na kulawa mo lukolo lwa Uzieli, ni Aminadabu hamwenga na walukolo wakwe gana na mlongo umwenga na waidi akawachimaila mwenye. 11Daudi niyo awetanga walavyantambiko Sadoki na Abiatali na Walawi mtandatu, Ulieli na Asaya na Yoeli Shemaya na Elieli na Aminadabu. 12Niyo awagamba Walawi, “Nyuwe mwi vilongozi we zinkolo za Walawi. Mwelenguse hamwenga na walukolo wenyu Walawi, chani mkadigale Idishanduku dye Dilagano dya Zumbe Chohile, Chohile ywa Waizulaeli hantu nidamanye kwachausa chakwe. 13Kwaviya welekwa wa Walawi hawendaga uko aho nkongo mo kudinula, ivyo Zumbe Chohile, Chohile ywetu kachikantila kwaviya hachiditundulie ivyo vikungwa chidinule.” 14Ivyo Walavyantambiko wa Walawi niyo welengusa wenye chani wadigagale Idishanduku dye Dilagano dya Zumbe Chohile ywa Izulaeli. 15Walawi niyo wadihagata kwa mitengo saviya Zumbe Chohile awagambile kujinkila kwa Musa. 16Daudi awalagizaga vilongozi wa Walawi wasagule wantu wasiku mwa awelekwa wawo wacheme na kuvina kwa chinyemi kwa vinanda na vinubi na visindamgunda vilavye lungole. 17Ivyo niyo wawasagula Hemani mwana ywa Yoeli, na Asafu mlukolo ywakwe endaga mwana ywa Belekiya, na wana wa Melali na Eshani mwana ywa Kushaya. 18Kwasagulagwa bunga tuhu dya wachemi dya Walawi, Zakaliya na Yezieli na Shemilamosi na Yehieli na Uni na Eliabu na Benaya na Maaseya na Matishiya na Elifelehu na Mikineya na wamizi we inchili wendaga ni Obedi edomu na Yezieli. 19Kulawa mwa awelekwa wasagulagwa wachemi wakutowa matowazi ya shaba, ni Hemani na Asafu na Etani. 20Zekaliya na Azieli na Shemilamoshi na Yehieli na Uni na Eliyabu na Maaseya na Benaya, wendaga wakatowa vinubi vina lungole lwa Alamoti. 21Matishiaya na Elifelehu na Mikineya na Obedi edomu na Yeieli na Azaziya wendaga wakatowa vinubi vina lungole lwa Sheminishi. 22Kwaviya Kenaniya endaga mmanyi ywa nchemo asagulagwa kutenda chilongozi ywa wachemi wose wa Walawi. 23Belekiya na Elikana wendaga wamizi we Idishanduku dye Dilagano. 24Shebaniya na Yoshafati na Neshanieli na Amasai na Zekaliya na Benaya na Eliezeli wendaga Walavyantambiko, waikagwa watowe magunda kulongozi kwe Idishanduku dye Idilagano dya Chohile. Obediedomu na Yehiya iviya waikagwa watende wamizi we Idishanduku dye Dilagano.

Shanduku dye Idilagano dyegalwa Yelusalemu 2 Samwilu 6:12-22

25Ivyo seuta Daudi, chilongozi ywa Izulaeli, na masekulu wakuchimaila mabunga ya wagomba nkondo elufu imwe imwe niyo waita kwenyumba ya Obedi edomu na kudiguha Idishanduku dye Idilagano, wendaga na chinyemi chitendese. 26Wamlaviza Chohile ntambiko ya majeku mfungate na ndolome mfungate, kwaviya kawambiza wadya Walawi wahagataga Idishanduku dye Dilagano. 27Daudi endaga kavala nkazu yedi ya chitambala ching'aile saviya wavaile Walawi wose wenule Idishanduku dye Idilagano, seivyo wachemi na Kenaniya chilongozi ywa wachemi. Ukaleka inkazu availe Daudi na kavala kasuche kamwechifuwa kang'aile. 28Ivyo Waizulaeli wose waita wakudiguha Idishanduku dye Dilagano dya Zumbe Chohile na kudigala Yelusalemu kwa chinyemi, wakavila mahembe ya ndolome na magunda na visindamgunda na vilangu. 29Umo wakadingiza Idishanduku dye Dilagano dya Zumbe Chohile mo mzi wa seuta Daudi, Mikali mchiche ywa Sauli asungilaga mwe didilisha na kumwona seuta Daudi akavina na kutula lwasu, ivyo niyo ambela momoyo wakwe.