Mihilimo 14

Ndima za Daudi komzi wa Yelusalemu 2 Samwilu 5:11-16

1Seuta Hilamu ywa Tilo egalaga walosi kwa Daudi, wakatenda wenula magoda ya miti ikwitangwa myelezi na wazeshi na wata kusongola mayuwe chani wamzengele zumba dya chiseuta. 2Elo Daudi niyo abunkula kugamba Zumbe Chohile kamwinula chani atende seuta ywa Izulaeli, na kugamba useuta wakwe watunyiswa kwachausa cha wantu wakwe wa Izulaeli. 3Uko Yelusalemu Daudi asolaga wavyele walozize na kumtenda atende na wana wa chilume na wana chiche walozize. 4Wano nawo wanawe welekagwa uko Yelusalemu, Shamua na Shobabi na Nasani na Sulemani, 5Ibahali na Elishuwa na Elipeleti, 6Noga na Nefegi na Yafiya, 7Elishama na Beelihada na Elifeleti.

Uhuda wa wagomba nkondo wa Daudi kwa Wafilisiti

8Wafilisiti weze weve kugamba Daudi kajidilwa mavuta chani atende seuta ywe isi yose ya Izulaeli, wagomba nkondo wawo waitaga wakumzungula Daudi, mna Daudi niyo eva vyaleka afosa aita akagombe nkondo nawo. 9Wagomba nkondo wa Wafilisiti wakongaga kupolaganya wantu ivintu vyawo mwe dibwandasi dya Lefaimu. 10Daudi niyo amuza Chohile akagamba, “Togola, niwebunge Wafilisiti? Noninke uhuda?” Zumbe Chohile niyo amhitula, “Hita nahwinke uhuda mwawo.” 11Ivyo, Daudi na wagomba nkondo wakwe waitaga komzi ukwitangwa Baali pelasimu na kuwahuda wagomba nkondo wa Wafilisiti. Akagamba, “Chohile kanitenda nififinye chinguvu na kuwahuda awankondo wangu saviya mabohwelo ya mazi.” Ivyo hantu aho niyo hetangwa Baali Pelasimu, kugamba Zumbe kanidahiza. 12Wafilisiti umo wakasunka, wasaga amatukulu yawo ye milungu uko, Daudi niyo alagiza wayatimpe moto. 13Wafilisiti niyo wawebunga vituhu awantu wakwikala mwedibwandasi. 14Ivyo, Daudi niyo amuza Chohile, Chohile niyo amhitula, amgamba, “Usekuwebunga kwa kuno kulongozi, mna wazunguluke na kuwalaila haguhi ne imiti ikwitangwa mifolosadi. 15Uneva sindo za wagomba nkondo ko lunenengwe lwe miti ye mifolosadi, aho webunge, kwaviya nahulongwele chani uwahude awagomba nkondo wa Wafilisiti.” 16Ivyo Daudi niyo adamanya saviya Chohile, kahuda awagomba nkondo wa Wafilisiti kulawa ko mzi wa Gibeoni kubula ko mzi wa Gezeli. 17Ivyo, Daudi niyo atenda kamanyikisa chila hantu, Zumbe Chohile niyo amtenda ogoheswe ni wantu we izisi zose.