Mihilimo 13

Shanduku dye dilagano dyasamizwa Kiliyati yealimu (2 Samwilu 6:1-11)

1Zuwa dimwenga seuta Daudi alafyaga na wakulu wa wagomba nkondo wakwe masekulu wa mabunga ya wagomba nkondo magana na maelufu. 2Akaheza niyo awagamba wantu wose wa Izulaeli, “Uneva vimuwagila Zumbe Chohile ywetu. Chisigileni walosi waite wakawetange walukolo wetu wasigale mwe imizi ya Izulaeli na walavyantambiko na Walawi mwe mizi yawo na mo luwala lwawo lwo kudimila na kuwagamba weze welunge na suwe hano. 3Chikaheza chite chikadiguhe Idishanduku dye dilagano dya Chohile ywetu, kwaviya hachiditundulie umo seuta Sauli atendaga chilongozi.” 4Wantu wose wazumilaga kwaviya wawona kugamba ni mbuli yedi ikuwagila. 5Elo, Daudi niyo awachisanya awantu wose Izulaeli, kulawa mwa kamto ka Shiholi uko Misili ntendele ya kwamwenyemzi komwingilo wa Hamati ntendele ya chenya chani wadivuze Idishanduku dye Dilagano ko mzi wa Yelusalemu kulawa ko mzi wa Kiliyati Yealimu. 6Daudi akatenda hamwenga na wantu wose wa Izulaeli waita ko mzi wa Baala, kugamba, Kiliyati Yealimu mwe isi ya Yuda, kudiguha Idishanduku dye Dilagano dya Chohile, dikulagisa zina dya Zumbe Chohile akwikala mwe chiti chakwe cho uzumbe kulanga kwe vyumbe vina mawawa vikwitangwa makelubi. 7Wantu awo niyo wadika mwe lingisha hya Idishanduku dye Dilagano na kudinula kulawa mwe nyumba ya Abinadabu. Uza na Ahiyo wendesha idilingisha idyo, 8Daudi na awantu wose wa Izulaeli niyo wavina kwa nguvu zawo zose kwaviya vidamanywe kwa miti ya mivinje na vinubi na vilangu na visindamgunda na magunda kwa chausa cha kumtunyu Chohile. 9Mna awantu wa Daudi weze wabule ho lwazo ludya Chidomu nendile akahwagila ulozo, izing'ombe niyo zakowadika, ivyo Uza niyo achulusa umkono wakwe achinde Idishanduku dye Idilagano dya Chohile dinasekugwa. 10Aho Zumbe Chohile niyo amwimukila maya Uza na kumkomela aho kwaviya nakaditoza Idishanduku, 11Daudi niyo ehiwa kwaviya Zumbe Chohile kamwimukila maya Uza, hantu aho niyo hetangwa Pelesi Uza, kugamba kutoigwa kwa Uza kubula vino dyelo. 12Vikaheza Daudi kengilwa ni nkama kwa kumogaha Chohile akeuza na kugamba, “Haluse nanidahe kudiguha Idishanduku dya Chohile kwangu?” 13Ivyo, Daudi hadinule vituhu Idishanduku dye Idilagano kwita Yelusalemu. Ukaleka hao niyo adigala kwe nyumba ya mntu akwitangwa Obedi Edomu, mwikazi ywa mzi wa Gati. 14Idishanduku dye Idilagano dya Chohile sigalaga uko hamwenga no lukolo lwa Obedi Edomu mwe nyumbayakwe kwa chipindi cha miezi mitatu, niyo Zumbe Chohile aijimbika inyumba yakwe na chila chintu na ananacho.