Mihilimo 12

Wantu wamtimile Daudi kulawa Benjamini

1Daudi nendile akekala mo mzi wa Sikilagi, uko amsumkaga seuta Sauli mwana ywa Kishi. Uko niyo atimilwa ni wagomba nkondo wakankalu walozize na kulungana nawo wamwambize mwe kugomba nkondo, 2awo wendaga we dikabila dya Benjamini, saviya endaga Sauli. Awo wendaga wadahi wakukunta mifulo na kudula mayuwe kwa nkumba yuwe kwa mikono yose kulume na kumoso. 3Wano nawakalongozwa ni Ahiyezeli akambizwa ni Yoashi mwana ywa Shemasi kulawa Gibeya. Wagomba nkondo watuhu ni, Yezisli na Peleti, mwana ywa Azimaveshi na Belakahi na Yehu kulawa Anatoti, 4na Ishimaya ywa Gibeoni, mwa wankondo wadya wakankalu “Milongo mitatu” na Yelemiya na Yahazieli na Yohanani na Yozabadi ywa Gedela, 5na Eluzai na Yelimoshi na Bealiahi na Shemalia na Shefatia ywa Halufi, 6Elikana na Ishia na Azaleli na Yoeseli na Yoshebeamu kulawa kolukolo ywa Kola, 7Yoela na Zebadiya wana wa Yelohamu, ywa Gedoli.

Wantu wamtimile Daudi kulawa mwe idikabila dya Gadi

8Wantu wasiku kulawa kwe idikabila dya Gadi wesenta na kwelunga na Daudi kwedilago dyakwe uko kwedijangwa. Awo wendaga wakankalu wadahi, wemalanye kwa nkondo naho wana udahi wa kujeseza nchinga na maguha. Mwezinyuso nawakatisa saviya simba, nawakachapula kukwela mwa magulu saviya mbala. 9Wendaga wakalongozwa ni Ezeli nakutimilwa ni Obadiya na ywakatatu ni Eliyabu, 10ywa kane ni Mishama na ywa shano ni Yelemiya, 11ywa mtandatu ni Atai na ywa mfungate ni Elieli, 12ywa mnane ni Yohanani na ywa chenda ni Elizabadi, 13ywa mlongo ni Yelemiya na ywa mlongo na imwe ni Makibanai. 14Awo awantu we idikabila dya Gadi wendaga masekulu wa wagomba nkondo. Uyo endaga mdodo kujinka wose alongozaga wagomba nkondo gana na mta udahi kujinka wose kalongoza wagomba nkondo elufu. 15Wano nawo awantu wadeluke umto wa Yolodani mo umwezi wa nkongo umo umto ukatenda umela ntendele zose na kuwatimula wantu ntendele zose za ulailo wa zuwa na uswelo wa zuwa wo mto.

Wantu wamtimile Daudi kulawa Benjamini na Yuda

16Wantu wasiku we idikabila dya Benjamini na we dikabila dya Yuda waitaga kwengome ya Daudi uko akwikala. 17Daudi afosaga kuse na kuwasingila na kuwagamba, “Uneva mwiza enga wambuya mnambize, soni mwikale na suwe! Mna uneva mwiza mnihituke kwa awankondo wangu, hata hegu sibalange, Chohile ywa wakale wetu namanye niyo awakantilani.” 18Vikaheza Muye ukukile wamwingila yumwe ywawo akwitangwa Amasai, mkulu ywa wadya milongo mitatu, agamba,

“Suwe chi wantu wako weye Daudi!

Naho suwe chitendele yako weye mwana ywa Yese!

Uhuda, chindedi, uhuda utende kwako, na uhuda kwa wadya wehamwenga na weye, kwaviya Chohile nakwambize.”

Daudi kawahokela na kuwatenda wakulu mwa awagomba nkondo wakwe.

Wantu wamtimile Daudi kulawa idikabila dya Manase

19Wantu wasiku we idikabila dya Manase wasumkaga na kwelunga na wagomba nkondo wa Daudi chipindi akaita na Wafilisiti kutowana na seuta Sauli. Daudi na awantu wakwe hawawambize Wafilisiti kwaviya masekulu wawo weze walafye niyo wamvuza. Wagamba, “Nachihose ujima wetu uneva Daudi anachihituka na kuya kwa sekulu ywakwe Sauli.” 20Wano nawo awagomba nkondo we idikabila dya Manase wendaga wehamwenga na Daudi umo auyaga Sikilagi, Adina na Yozabadi na Yedieli na Michaeli na Yozabadi na Elihu na Sileta. Kila yumwenga nakalongoza wantu wagomba nkondo wakubula elufu imwenga. 21Wamwambiza Daudi kutowana na abunga ya wankondo wakwe nawakeza kumtowa, kwaviya wose wendaga wakankalu na masekulu wa wagomba nkondo wakwe. 22Zuwa kubula zuwa wantu naweza kumwambiza Daudi, vyaleka dyatenda bunga kulu dya wagomba nkondo saviya dya Chohile.

Ludongo lwa wagomba nkondo wa Daudi

23Umo Daudi akatenda uko Hebuloni, wagomba nkondo walozize wahinyigwe vyedi welunga na wagomba nkondo wakwe chani wamwambize kutaha useuta wa Sauli, saviya Zumbe alongile. 24Wagomba nkondo wawandikwe kulawa mwe idikabila dya Yuda wendaga wagosi Elufu mtandatu na magana mnane, wakatenda na viziha vyawo hamwenga na nchinga zawo na maguha wemalanye vyedi kwa nkondo. 25Wagomba nkondo kulawa mwe idikabila dya Simeoni wendaga Elufu mfungate na gana dimwenga wagosi wahinyigwe vyedi. 26Wagomba nkondo kulawa mwe idikabila dya Walawi wendaga Elufu nne na magana mtandatu, 27hamwenga na Yehoyada sekulu ywo ulukolo lwa Aloni, wendaga wagosi Elufu ntatu na magana mfungate. 28Welekwa wa Sadoki, wendaga wabwanga wadahile kugomba nkondo, na wakulu wa wagomba nkondo milongo midi na waidi, 29Wagomba nkondo kulawa mwe idikabila dya Benjamini, we dikabila dyakwe Sauli wendaga wantu elufu ntatu, wasiku wawo wasigalaga kwa Sauli kubula hadya waitile kwa Daudi. 30Wagomba nkondo kulawa mwe idikabila dya Efulaimu wendaga elufu milongo midi na magana mnane wakankalu naho wamanyikise. 31Wagomba nkondo kulawa mwe inusu ye idikabila dya Manase wendaga wantu elufu mlongo na mnane wawandikwa amazina yawo chani wawike Daudi atende seuta. 32Vilongozi kulawa mwe idikabila dya Isakali wendaga magana maidi hamwenga na walukolo wawo nendile wakawalongoza. Vilongozi awo wendaga na umanyi wa mbuli za mihilimo na chiya chikungwa chidamanywe ni Waizulaeli. 33Wagomba nkondo kulawa mwe idikabila dya Zabuloni, wendaga elufu milongo mishano wadahi wemalanye kugomba nkondo, wakatenda na viziha vya chila namna vileke wamwambize Daudi kwa ukanuni wose. 34Wagomba nkondo kulawa mwe idikabila dya Nafutali, wendaga masekulu elufu imwenga, hamwenga na wantu elufu milongo mitatu na mfungate wemalanye na nchinga na maguha. 35Wagomba nkondo kulawa mwe idikabila dya Dani, wemalanye kwa nkondo wendaga elufu milongo midi na mnane na magana mtandatu wahinyigwe vyedi kugomba nkondo. 36Wagomba nkondo kulawa mwe idikabila dya Asheli wendaga elufu milongo mine wemalanye kwa nkondo. 37Iviya Wagomba nkondo kulawa mwa amakabila ya ulailo wa zuwa wa Yolodani kugamba wantu wa Lubeni na Gadi ne inusu ye idikabila dya Manase wendaga elufu gana na milongo midi wakatenda na chila chiziha wemalanya kwa nkondo. 38Wagomba nkondo wose awo, wemalanya vyedi kwa nkondo, Waitaga uko Hebuloni, wakamtende Daudi seuta ywa Izulaeli yose. Waizulaeli wose wasigale walunganaga wakaunga Daudi atende seuta ywawo. 39Wantu awo wekalaga kwa mazuwa matatu wakatenda hamwenga na Daudi, wakadya na kunywa kwaviya walukolo wawo wawaikiyaga nkande na vya kunywa. 40Naho, wadya wendaga haguhi nawo na hata wadya wendaga hale saviya kulawa kwa amakabila ya Isakali na Zabuloni na Nafutali, wezaga na kuwegaila nkande wenulaga kwa mpunda na ngamiya na mpundafalasi na majeku, wawegailaga unga na mikate ya tini na zabibu zinyaile na divai na mavuta ya mizeituni. Naho wawegailaga ng'ombe na ngoto zilozize wachinje wadye. Kwaviya kwendaga na chinyemi mwe isi yose ya Izulaeli.