Mihilimo 11

Daudi Atenda Seuta ywa Izulaeli (2 Samwilu 5:1-10)

1Vikaheza wantu wa Izulaeli wechisanya kwa Daudi uko Hebuloni na kumgamba, “Kaula, suwe chilukolo lumwenga na weye. 2Aho nkongo, hata Sauli endaga seuta ywetu, weye wendaga ukawalongoza Waizulaeli kwe nkondo, na Zumbe Chohile ywako akwelisizaga kugamba weye niweye nowadime awantu wakwe Waizulaeli na kutenda chilongozi ywawo.” 3Ivyo, wadalahala wose wa Izulaeli wambasaga seuta Daudi uko Hebuloni. Niyo Daudi aika lagano nawo, wamjidila mavuta atenda seuta ywa Izulaeli, saviya Zumbe alongile kujinkila kwa Samwilu.

Daudi ahuda Yelusalemu

4Ivyo seuta Daudi na wagomba nkondo wa Waizulaeli wose waita na kuwebunga umzi wa Yelusalemu. Udya wamanyikaga saviya Yebusi, wendaga ukekalwa ni Wayebusi, na wachei wakwikala uko. 5Wakaya wa Yebusi niyo wamgamba Daudi hajeze kwingila mo mzi uwo, mna Daudi niyo aditaha idilago dya Sihoni, na kuwitanga, “Mzi wa Daudi.” 6Daudi niyo agamba, “Mntu ywa nkongo nalongoze awagomba nkondo kuwebunga Wayebusi nuyo natende sekulu ywa wagomba nkondo!” Elo Yoabu, yudya mami yakwe naketangwa Zeluya, alongozaga inkondo na kutenda sekulu ywa wagomba nkondo. 7Kwaviya Daudi aitaga na kwikala mwe dilago idyo ivyo wetangwa, “Mzi wa Daudi” 8Kauzenga umzi uwo, akakongela hantu hendaga ntendele ya ulailo wa zuwa yo lugulu, Yoabu niyo azenga uhya intendele isigaile yo mzi. 9Daudi niyo ajendeleza kutenda na nguvu, kwaviya Zumbe Chohile mta udahi nehamwenga naye.

Wagomba nkondo wakankalu wa Daudi (2 Samwilu 23:8-39)

10Wano ni wagomba nkondo wakankalu wa Daudi. Hamwenga na awantu wasigale wa Izulaeli wamwambize, kutenda seuta, saviya Zumbe amgambile, na wamwikiye kutenda seuta mta udahi. 11Wagomba nkondo wakankalu wa Daudi wendaga ni Yashobeamu ywo ulukolo lwa Wahakimoni, uyo endaga sekulu ywa amaseku milongo mitatu wa awagomba nkondo awebungaga wantu magana matatu na kuwakoma wose kwa guha. 12Vikaheza mwe wadya awakankalu “Watatu” endaga Eliazali mwana ywa Dodo, Mholi. 13Zuwa dimwenga Eliazali endaga hamwenga na Daudi uko Pasidamimu. Wafilisiti wechisanyaga kwa nkondo, Uko kwendaga na nkonde imemile shaili, Waizulaeli nendile wakawasumka Wafilisiti. 14Mna wowo niyo wachimala chigosi mgatigati mwe inkonde na kuwachinda Awafilisiti wakaigombela inkonde iyo. Zumbe Chohile amwinkaga uhuda mkulu. 15Zuwa dimwenga wadya awagomba nkondo awakankalu watatu mgati mwe wadya milongo mitatu waitaga ko luwe kudya Daudi endaga akekala kwe mpanga ikwitangwa Adulamu, chipindi icho wagomba nkondo wa Wafilisiti nawaika lago mwe dibwandasi dya Lefaimu. 16Mwe chipinddi icho Daudi endaga mwe lago ditogile, na idibunga dya wankondo dya wa Filisiti dyendaga komzi wa Beselehemu. 17Daudi endaga na nchilu vitendese, niyo agamba, “Nabesa napatile mntu aninke mazi ninywe kulawa mwe disima dya Betelehemu mwe inchili yo mzi!” 18Elo wadya wagomba nkando wakwe watatu wakankalu wafifinya mgati mwe dilago dya Wafilisiti, wakuteka mazi mwe disima diya Betelehemu, na kumwigaila Daudi. Mna hayanywele, akaleka aho kayetila hasi saviya malavyo kwa Zumbe. 19Niyo agamba, “Saniyanywe! Ni saviya kunywa sakame ya wano wantu wahosize ujima wawo!” Ivyo hayanywele. Uwo nuwo ukankalu wadamanye wano wakankalu milongo mitatu. 20Abishai, mkuluwe dya Yoabu endaga chilongozi ywa wadya milongo mitatu. Kenula idiguha dyakwe na kukoma wantu magana matatu, elo, niyo atenda mntu amanyikise, mna siyo saviya wadya awatatu. 21Ivyo endaga mntu amanyikise mwe wadya wakankalu milongo mitatu na kutenda chilongozi ywawo, mna hendaga amanyikise saviya wadya wakankalu watatu. 22Benaya mwana ywa Yehoyada kulawa komzi wa Kabuzeeli, naye endaga mgomba nkondo mkankalu, adamanyaga mbuli zikutisa, mbuli nkulu adamanye ni kukoma wagomba nkondo waidi wakankalu kulawa Moabu, naho zuwa dimwenga kukatenda na balafu, engilaga mwe bome na kukoma simba. 23Naho akomaga Mmisili yumwenga, mntu mtali vitendese mta futi mfungate na nusu, akatenda kenula guha kulu vitendese saviya mtoho. Benaya amwebungaga akatenda ana nkome iyodu, kamhoka idiguha Umisili uyo mo mkono wakwe, na kumkoma nediguha idyo. 24Zino nizo izimbuli adamanyaga Benaya mwana ywa Yehoyada, mwe wadya “Wakankalu milongo mitatu.” 25Endaga mntu amanyikise mwa wadya wagomba nkondo wakankalu “Milongo Mitatu,” Mna hamanyikise sawadya watatu. Na Daudi kamsagula atende mwamizi mkulu ywakwe mwenye. 26Wano nawo wagomba nkondo wakankalu wa Daudi, Asaheli mlukolo ywa Yoabu, Elihanani mwana ywa Dodo kulawa komzi wa Betelehemu, 27Shamosi Mhaloni, na Helesi Mpeloni, 28Ila mwana ywa Ikeshi kulawa Tekowa na Abiezeli kulawa Anatoti, 29Sibakai Mhushasi, na Ilai Mwahohi, 30Mhalai Mnetofashi, 31Itai mwana ywa Libai kulawa Gibeahi mwa Benjamini, Benaiahi kulawa Palasoni, 32Hulai kulawa mwe zisokwe za Gashi na Abieli ywa Alibashi, 33Azimaweshi Mbahaluni, na Eliyaba Mshaliboni, 34wana wa Yesheni Mgiloni na Yonasani mwana ywa Shagee Mhalali, 35Ahiamu mwana ywa Sakali Mhalali, na Elifali mwana ywa Uli, 36na Hefeli Mmekalashi na Ahiya mpeloni, 37Hezilo Mkameli na Naalai mwana ywa Ezibai, 38Yoeli mkuluwe dya Nasani na Mibihali mwana ywa Hagili, 39Zeleki Mwamoni na Nahalai Mbeloti, mwinula viziha ywa Yoabu mwana ywa Seluya, 40Ila na Gelebu wendaga Wahiti, 41Uliya Mhiti, na Zabadi mwana ywa Ahilai, 42Adina mwana ywa shiza Mlubeni sekulu ywa Walubeni na wadya milongo mitatu endaga nawo, 43Hanani mwana ywa Maaka na Yoshafati Mmisini, 44Uziya Muashitelashi, Shama na Yeieli wana wa Hosamu Mwaloeli, 45Yediyaeli mwana ywa Shimli, na mkuluwe endaga Yoha Mtizi, 46Elieli Mmahawi, Yelibai na Yoshaviai wana wa Elinaamu, na Isamu Mmoabu, 47Elieli na Obedi na Yaasieli Mmesobai.