Mihilimo 10

File ya Sauli na wanawe (1 Samwilu 31:1-13)

1Ivyo Wafilisti webungana na Waizulaeli mo lugulu lwa Giliboa. Waizulaeli walozize wakomwaga uko, vikaheza wadya wasigaile, hamwenga na Seuta Sauli hamwenga na wanawe wa chilume, wanyilika. 2Mna awankondo wa Filisiti wawagwila Sauli na wanawe wamgwila, wakaheza wawakoma Yonasani na Abinadabu na Maliki. 3Ikondo iyo yendaga nkulu vitendese aho endile Sauli, wata mita eze wamwone wamlasa mfulo na kumlumizisa. 4Ivyo Sauli niyo mgamba yudya mntu amwinuile ichiziha chakwe, “Somola isime yako unitunge nibanike, chani wano wantu hewevinilwe wanase kunibela.” 5Yudya mntu eze awone kugamba Sauli kabanika, naye etunga ne sime yakwe, abanika. 6Ivyo Sauli na wanawe nivyo wose wabanika, na hahana mwelekwa ywakwe atendile seuta. 7Wadya Waizulaeli wakwikala mwedibwandasi dya Yezieli, eze wawone kugamba wankondo wawo wanyilika naho kugamba Sauli na wanawe wechilume wabanika, wasama imizi yawo na kusumka. Vikaheza Wafilisiti waita wakwikala mwe imizi iyo. 8Idizuwa dikutimila Wafilisiti eze waite wakatahe ivintu vya wadya wakomigwe, niyo wabwila iviimba vya Sauli na wanawe wechilume vyumbala ko lugulu lwa Giliboa. 9Wamvula izisuche ze nkondo, niyo wamkanta umtwi na kuuguha hamwenga ne iviziha vyakwe, wakaheza wasigila walosi mwe isi yose ya Ufilisiti wakalonge mbuli iyo kwe imilungu yawo na awantu wawo. 10Niyo waika iviziha vyakwe mwe imwe ye izinyumba ze imilungu yawo na kuutungika umtwi wa sauli mwe inyumba ya mnungu ywawo Dagoni. 11Umo awantu wose wa Yabeshi mwe isi ya Gileadi weze weve imbuli iyo idamanywe ni Wafiisiti mwa Sauli, 12wantu makankalu wose waita wakuinula ivimba vya Sauli na wanawe na kuvigala Yabeshi. Wavihamba uko hasi hemti ukwitangwa mwaloni na kufunga kwa mazuwa mfungate. 13Sauli abanikaga kwaviya hendaga mkanuni kwa Zumbe. Kamlemela kutimila viya alagizwe ni Zumbe, niyo aita kwe kulagulwa kwe mgangana, 14akaleka kumuza Zumbe. Ivyo Zumbe kamkoma nakwinkiza useuta kwa Daudi mwana ywa Yese.