Mihilimo 18

Uhuda wa Daudi kwenkondo

2Samwilu 8:1-18

1Yeze yomboke ayo, seuta Daudi niyo awatowa na kuwahuma Wafilisiti, niyo autaha umzi wa Gati ne vijiji vyakwe kulawa mikono ya Wafilisiti. 2Niyo autowa umzi wa Moabu, Wamoabu niyo wakonga kulongozwa ni Daudi, naho nawakalavya kodi kwa Daudi. 3Nyumani Daudi niyo amtowa Hadadezeli seuta ywa Soba mweisi ya Siliya yendile hajihi na Hamasi kadamanya ivyo umo akaita kwekuchimalisa useuta wakwe ko mto wa Fulati. 4Daudi niyo ataha malingisha elufu imwenga na wakwela falasi elufu mfungate, na wagomba nkondo wa kujenda lwa viga magana maidi elufu. Daudi niyo akanta izinyuje ze iviga vya kunyuma vye izifalasi zose za amalingisha, mna niyo asigaza gana dimwenga. 5Elo Washami wa Damesiki weze waite wakamwambize Hadadezeli seuta ywa Soba, Daudi niyo awebunga na kukoma wantu magana milongo midi na midi elufu. 6Daudi niyo aika lago dya mabunga ya wagomba nkondo ko mzi wa Shamu wi Damesiki. Washamu niyo walongozwa ni Daudi na kumliha kodi, waliha maliho kwa Daudi. Chohile nakamwinka Daudi uhuda kokose nakaita. 7Daudi nakaguha nchinga za zahabu nendile zinulwe ni masekulu wa Hadadezeli na kuzigala Yelusalemu. 8Naho Daudi aguha shaba ilozize kulawa komzi wa Tibihati na komzi wa Kuni, iyo yendaga ni mizi ya Hadadezeli. Nyumani Sulemani aijesezaga kuzengela beseni kulu, nguzo na viya vya shaba. 9Tou seuta ywa Hamati eze eve kugamba Daudi kadihuda idibunga dyose ywa wagomba nkondo wa Hadadezeli seuta ywa Soba, 10niyo amsigila mwanawe Hadolamu kwa seuta Daudi chani akamlamse na kumhongeza kwaviya na kagomba nkondo na kumhuda Hadadezeli, kwaviya Hadadezeli agombaga nkondo na Tou nkanana zilozize. Hadolamu amwigailaga Daudi majeleko ya viya vidamanywe kwa zahabu mayuwe ya chumbu na shaba. 11Majeleko ayo, Daudi kazilavya kwachausa cha ndima zesimile za Chohile saviya atendile mwe mayuwe ya chumbu ne zahabu atahile kulawa kwe izisi zose za Edomu na Moabu na Amoni na Filisiti na Amaleki. 12Abishai mwana ywa Seluya awakomaga Waedomu mlongo umwenga na mnane elufu kwedikolongo dyendaga dya munyu. 13Elo aikaga lago dya wagomba nkondo uko Edomu. Waedomu wose niyo walongozwa ni Daudi. Chohile amwinkaga Daudi uhuda kokose etile. 14Daudi niyo alongoza wantu wose wa Izulaeli, kadamanya vikuwagila hehena kusagula kwa chila mntu. 15Yoabu mwana ywa Seluya endaga chilongozi mkulu ywa wagomba nkondo, na Yehoshefati mwana ywa Ahiludi nendika akaika kumbukumbu, 16Sadoki mwana ywa Ahitubu na Ahimeleki mwana ywa Abiatali nendile ni walavyantambiko na Shausha nendile akawandika yakulaila, 17na Benaya mwana ywa Yehoyada nakachimaila wagomba nkondo wamizi wa Daudi mwenye Wakeleti na Wapeleti, wana wa Daudi nendile ni vilongozi wakulu mo ulongozi wakwe.