Mihilimo 19

Daudi awahuda Waamoni na Waashulu

2Samwilu 10:1-19

1Ayo yeze yajike Nahashi seuta ywa Waamoni niyo abanika, mwanawe akwitangwa Hanuni niyo atenda seuta hantu hakwe. 2Elo Daudi niyo agamba, “Nanimdamanyize yedi Hanuni mwana ywa Nahashi kwaviya ise anidamanyizaga yedi.” Elo Daudi niyo egala wantu waita wakumhongeza kwachausa che ifile ya tati yakwe. Niyo waita kwa Hanuni chani wakamwinke hai uko kwe isi ya Waamoni. 3Mna vilongozi wa Waamoni niyo wamgamba seuta, “Togola wafanyanya kugamba ni kwachausa cha ntunyo ya tati yako hambwe Daudi kegala wantu weze wakwinke hai? Wantu wano sawo wazuza wegalwe chani waizuze isi vileke eze aibalange?” 4Elo Hanuni niyo awaguha wadya wegalwe ni Daudi awamoga izindevu naho izisuche zawo niyo azitatula hagatigati kwa kunyuma kujinka ichigudi, niyo awalavya waite zawo, 5Daudi eze agambilwe ivyo wadamanyizwe awalosi wakwe egale, umo wakauya Daudi kasigila wantu wawasingile kwaviya wantu awo wegalwe ni Daudi mwe nkongo nawakaonesa soni. Seuta niyo awagamba, “Ikalani komzi wa Yeliko kubula aho namhotele ndevu naho namuwiye.” 6Waamoni weze wawone wamwihiza Daudi. Hanuni na Waamoni wegala mayuwe ya chumbu chilo milongo mitatu na nne chani wakodishwe malingisha na wakwela falasi kulawa Mesopotamiya na Alamaka na Soba. 7Elo niyo wakodisha malingisha ya kugombela nkondo milongo mitatu na mbili elufu, seuta ywa Maaka na wantu wakwe niyo waika lago hajihi na hantu hakwitangwa Madeba. Waamoni nawachisanyika kulawa kwemizi yawo yose wemalanya kwa nkondo. 8Daudi eze eve izimbuli izo niyo amwigala Yoabu ne idibunga dyose dya wagomba nkondo wakankalu. 9Waomoni niyo wafosa wepanga mwe nchili yo mzi wa Laba, mna wadya maseuta wezile kuwambiza nawechedu kwechibugabuga. 10Yoabu eze awone nkondo imzunguluka kulongozi na kunyuma niyo asagula wagomba nkondo wasiku wakankalu vitendese wa Izulaeli awaika wagombe nkondo na Waalamu. 11Wagomba nkondo wasigaile Yoabu niyo awaika walongozwe ni mlukolo ywakwe Abishai niyo wemalanya wagombe nkondo na Waamoni. 12Yoabu niyo amgamba Abishai “Hegu Waalamu wanihuma nguvu weye nonambize, mna hegu Waamoni wakuhuma nguvu nanize hwambize. 13Haluse kwenke moyo! Chitowane chigosi kwachausa cha wantu wetu ne imizi ya Chohile ywetu, Chohile ywetu achidamanyize diya akuwona ni dyedi kwakwe.” 14Elo Yoabu na wantu wakwe niyo wajendeleza kugomba nkondo na wantu wa Waalamu, Waalamu niyo wasumka. 15Waamoni weze wawone Waalamu wasumka nawo niyo wamsumka Abishai mlukolo ywa Yoabu niyo wengila komzi. Elo, Yoabu niyo auya Yelusalemu. 16Waalamu weze wawone kugamba wahumwa ni Waizulaeli niyo wegela wantu waite wakawalete Waalamu watuhu wendile kwentendele ya kaidi yo mto wa Efulate. Wagomba nkondo awo nendile wakalongozwa ni Shofaki, sekulu ywa wagomba nkondo dya Hadadezeli. 17Daudi eze eve imbuli iyo, niyo awachisanya wagomba nkondo wose wa Waizulaeli, wadeluka umto wa Yolodani akudugana nawo. Kawapanga mabunga agombe nkondo nawo. Daudi eze akonge kugomba nkondo na Waalamu nawo niyo watowana naye. 18Mna Waalamu niyo wawasumka Waizulaeli. Daudi akomaga Waalamu elufu mfungate wakwendesha malingisha na wagomba nkondo wakujenda lwa viga elufu milongo mine naho amkomaga Shofaki chilongozi ywa bunga dya wagomba nkondo dya Waalamu. 19Maseuta wendile wakalongozwa ni Hadadeli weze wawone kugamba wahumwa ni Waizulaeli, niyo wadamanya wivano wa utondowazi na Daudi, elo niyo walongozwa ni Daudi. Waalamu hawazumile vituhu kuwambiza Waamoni.