Mihilimo 20

Daudi ataha umzi wa Laba

2Samwilu 12:26-31

1Mwe nkongelo yo mhilimo wao Waizulaeli umo maseuta wakafosa kwita kwe nkondo Yoabu awalongoza wa wagomba nkondo wakankalu kuuzunguluka na kuwebunga umzi wa Laba na kuubalanga. Mna Daudi niyo ekala Yelusalemu. Yoabu autowa umzi wa Laba na kuubalanga. 2Daudi niyo aguha nkofiya ya mnungu ywawo Milikomu yendile mlanga mo mtwi wakwe, niyo abunkula kugamba inkofiya iyo nendile uzami wakwe ni chilo milongo mitatu na mine naho mndani mwakwe nendile mna mayuwe ya yombe kulu. Daudi niyo aiguha yuwe dya yombe kulu dyendile mndani ahambila inkofiya yakwe yo useuta. Naho niyo ataha vintu vilozize kulawa mo mzi uwo. 3Niyo awaguha awantu wo umzi uwo awaika wadamanye ndima zikudamanywa kwa misumeno na sululu na hoya. Ivyo niyvo Daudi aitendile imizi yose ya Waamoni. Vikaheza Daudi na awantu wakwe niyo wauya komzi wa Yelusalemu.

Nkondo na mazintu ya Wafilisiti

2Samwilu 21:15-22

4Ayo yeze yajike niyo kwatenda na nkondo na Wafilisiti komzi wa Gezeli, aho naho Sibeki mntu ywa Shushati amkomaga Sipai yumwenga mgati mazintu ya Walefai, Wafilisiti niyo wahudwa. 5Niyo kwatenda na nkondo vituhu na Wafilisiti, Elihanani mwana ywa Yaili amkomaga Lahimu mlukolo ywa Goliyati, Mgiti uyo umhini we idiguha dyakwe nendile ukenga mti wa mfumati. 6Niyo kwatenda na nkondo vituhu ko mzi wa Gati, uko kwendaga na zintu tali vidala mta madole milongo midi na mane, kugamba chila mkono madole mtandatu na chila chiga madole mtandatu, uyo naye endaga mwelekwa ywa mazintu ya Walefai. 7Uyo eze awahulute Waizulaeli, Yonasani mwana ywa Simeya mlukolo ywa Daudi niyo amkoma. 8Ayo amazintu amatatu yakomagwa ni Daudi na awagomba nkondo wakwe yendaga welekwa wa amazintu ya Gati.