Mihilimo 21

Daudi awaza wagomba nkondo wa Izulaeli

2Samwilu 24:1-25

1Shetani nendile akawahiga Waizulaeli kamdantiliza Daudi awaze awagomba nkondo wose wa Izulaeli. 2Elo, Daudi niyo amlagiza Yoabu sekulu ywa wagomba nkondo na wadya ivilongozi wa mabunga ya wagomba nkondo watuhu, “Hitani mkawawaze wagomba nkondo wose wa Izulaeli, kukongela Belisheba kubula Dani. Ukajika mnigambile nimanye umligano wawo.” 3Mna Yoabu niyo agamba, “Zumbe Chohile nawajenyeze Waizulaeli nkanana gana kujinka ivyo weli haluse! Sekulu ywangu seuta, wano wose gamba ni wantu ukulongoza, haluse kwambwani waunga udamanye mbuli ikunga iwakoze masa Waizulaeli?” 4Mna diya alongile seuta Yoabu kadizumila singo upande. Elo Yoabu niyo aita kwe isi yose ya Izulaeli, niyo auya Yelusalemu. 5Yoabu niyo amwigaila seuta Daudi mligano wa wantu wose wa Izulaeli, nendile kuna wagosi milioni imwenga na elufu gana dimwenga wadahile kujeseza mabamba, naho mwe isi ya Yuda kwendaga na wantu laki nne na milongo mfungate wata kujeseza mabamba. 6Mna Yoabu hawawazize Walawi na Wabenjamini, kwaviya lagizo diya dya seuta hadimwelele. 7Chohile hawagizwe ni imbuli iyo, elo niyo awatowa Waizulaeli. 8Daudi niyo amgamba Chohile, “Sikolesa masa kwa ntendwa ino nidamanye! Mna nakweila nilekeila miye mndima ywako, kwaviya sidamanya mbuli ya chihezi.” 9Ivyo Chohile niyo alonga na Gadi, muoni ywa Daudi amgamba, 10“Hita kamgambe Daudi vino, Chohile agamba, ‘Nakwinka mbuli ntatu, usagule imwenga miye nahutendele.’” 11Gadi niyo ambasa Daudi kumgamba, Chohile agamba vino, “Sagula dimwenga ukunga, 12kutende na gumbo dya mihilimo mitatu hegu myezi mitatu ya kuhutwa ni wahigani wako awo nawakuhude kwa mabamba yawo, hegu mazuwa matatu ayo Zumbe Chohile nawebungeni kwa bamba dyakwe, awegaileni manyonje yehiye mwe isi naho mndima ywa kwembingu ywakwe najinke akome mwe isi yose ya Izulaeli, Haluse sagula hamhitule mbwani uyo anisigile.” 13Daudi niyo amhitula Gadi, “Singila mwe nkama nkulu! Mna leka nitoigwe ni Zumbe Chohile kwaviya uyo kamema mbazi. Mna nisekutoigwa ni mntu.” 14Elo Zumbe Chohile niyo awegaila Waizulaeli manyonje yehiye yalekile wantu wa Izulaeli milongo mfungate elufu wabanike. 15Ukajika Chohile niyo egala mndima ywa kwembingu akawebunge awantu wo umzi wa Yelusalemu, mna umo henati kudamanya ivyo, Zumbe Chohile niyo ahituila fanyanyi zakwe amgamba yudya mndima ywa kwembingu ajesize ubanasi, “Leka, vyajika!” Mndima ywa kwembingu nendile kachimala hajihi no lwazo lo kuhwagila mhunga lwa Olinani Myebusi. 16Daudi niyo enula meso yakwe, amwona yudya mndima ywa kwembingu ywa Chohile kachimala kwembingu na mwe isi kachulusa idibamba dyakwe komzi wa Yelusalemu aubalange. Aho Daudi na wadalahala wose nendile wavala majuniya niyo wagwa chifudifudi. 17Daudi niyo amgamba Chohile “Togola, suyo miye nilagize wagomba nkondo wawazwe? Ni miye sikoila masa na kudamanya wavu mkulu. Mna wano awantu ni saviya ngoto wabalanga bwani? Nakweilisa weye Chohile, Chohile ywangu, maya yako yahingize kwangu no lukolo lwa tate, mna amanyonje yano yehiye yasekuwapata awantu wako.” 18Aho mndima ywa kwembingu ywa Zumbe Chohile amgamba Gadi kamgambe Daudi aite akamzengele mazabahu Zumbe Chohile kolwazo lo kuhwagila mhunga lwa Olinani Myebusi. 19Daudi niyo adiva idilagizo dya Zumbe Chohile, kakwela kolugulu kuligana na ulosi agambilwe ni Gadi mwe zina dya Chohile. 20Olinani nendile akahwaga ngano eze ahituke na kumuwona yudya mndima ywa kwembingu, uyo na wanawe wane wendile hamwenga naye niyo wefisa. 21Daudi eze ambase Olinani, Olinani enule meso amwona Daudi, Olinani niyo afoseza kolwazo lo kuhwagila niyo aita kulongozi, amfikila madi afunamiza umtwi wakwe kubula hasi ho msanga. 22Daudi niyo amgamba Olinani, “Ninka luhenyo mo lwazo lwako lo kuhwagila mhunga chani nimzengele mazabahu Zumbe Chohile, chani unyonje uno we tauni uchindwe mwa wantu. Nitagila kwa idiyombe dyakwe.” 23Olinani niyo amgamba Daudi, “Luguhe ulwazo luno sekulu ywangu seuta, ujese saviya ukunga mwenye. Kaula, nalavya njeku kwachausa cha malavyo ya kutikimya, na vimpandwa vya kuhwagila kwachausa cha nkuni, hamwenga na ngano vitende ntambiko ya unga. Vyose ivyo nahwinke.” 24Mna seuta Daudi niyo amgamba, “Bule, nanivigule kwa yombe dyakwe dyose, sanimlavize Zumbe Chohile chintu chako hegu kumlaviza malavyo ya kutikimya siyaguile.” 25Elo Daudi niyo amwinka Olinani kwa kumhimila vihande magana mtandatu vya zahabu kulihila ulwazo ulo. 26Daudi niyo amzengela Zumbe Chohile mazabahu ya kulaviza ntambiko hantu aho na kumlaviza malavyo ya kutikimya na malavyo ya utondowazi. Kamlombeza Zumbe Chohile, Chohile niyo azumila idilombezo dyakwe kwa kwigala moto kulawa kwembingu kuyatikimya yadya amalavyo mwe mazabahu. 27Vikaheza Zumbe Chohile niyo amlagiza yudya mndima ywa kwembingu aleke, uyo niyo asomeka idibamba dyakwe mwe yala. 28Chipindi icho Daudi eze awone kugamba Chohile kazumila idilombezo dyawe kolwazo lo kuhwagila mhunga lwa Olinani Myebusi niyo alavya ntambiko zakwe aho. 29Hema dikukile dya Zumbe Chohile dyadamanyagwa ni Musa kwenyika ne mazabahu ya malavyo yo kutikimya, chipindi icho vyendaga vichei hadya ahantu ho kuvikila uko Gibioni. 30Mna Daudi hajezize kwita uko Gibioni vileke amlombeze ulangilizi Zumbe Chohile kwaviya nakogoha idibamba dya yudya mndima ywa kwembingu ywa Zumbe Chohile.