Mihilimo 22

1Daudi niyo agamba, “Hano naho ahantu Inyumba ya Zumbe Chohile naizengwe, ne imazahabu yo kulaviza malavyo ya kutikimya ya wantu wa Izulaeli naitendeke aho.”

Kwemalanya kuzenga Inyumba yo kuvikila

2Daudi niyo alagiza wajeni wose nawakekala Izulaeli wachisanyike, niyo aika wazesi watule mayuwe chani wazenge Inyumba ya Chohile. Kasagula wazesi wasongole mayuwe vyedi yakuzenegela Inyumba ya Zumbe Chohile. 3Daudi niyo alavya vyuma vilozize kulawa kwehazina vya kudamanyiza mitunga na bawaba yakunyinyiza izinyivi na hazina ya shaba heikuhimika. 4Iviya kalavya mbawo zlozize za mielezi egailwe Daudi ni wantu wa Sidoni na wantu wa Tilo niyo wamwigaila Daudi miti ya mielezi ilozize. 5Daudi kelongele mwenye agamba, “Nyumba iyo mwanangu Sulemani akunga amzengele Zumbe Chohile naitende ya ugoli ukulise naho ikutogolwa naho ikukile mwe izisi zose. Mna kwaviya achei mbwanga mdodo naho kwaviya hana umanyi ulozize, ni vyedi ni mwandaile.” Elo Daudi niyo aika hazina ilozese ya vimpandwa vya uzesi henati kubanika. 6Daudi niyo amwitanga na mwanawe Sulemani na kumlagiza amzengele nyumba Chohile, Chohile ywa Izulaeli. 7Daudi niyo amgamba Sulemani, “Mwanangu mo moyo wangu nasifanyanya nimzengele Zumbe chohile ywangu nyumba, chani nimtunye. 8Mna Chohile niyo anigamba, ‘Wenye kwitilisa sakame naho kugombesa nkondo. Kwachausa cha sakame ilozize witile kulongozi kwangu hano he isi, honizengele nyumba. 9Mna nopate mwana chilume, uyo nalongoze kwa utondowazi kwaviya nanimwinke utondowazi na wankondo wakwe wose. Zina dyakwe netangwe Sulemani, miye naniwenke utondowazi Waizulaeli na kuhola mo ulongozi wakwe. 10Uyo nuyo nanizengele nyumba kwachausa cha kunivikilau, natende mwanangu nami nanitende tati yakwe, naho welekwa wakwe nawalongoze Izulaeli mazuwa yose.’ 11Haluse, mwanangu Zumbe Chohile ywako atende hamwenga na weye chani udahe kumzengela nyumba saviya alongile. 12Zumbe Chohile akwinke kulamula kwedi na umanyi chani aho nakwinke useuta kuwalongoza Waizulaeli, uzitimile izisigilizi za Zumbe Chohile ywako. 13Unasinyisa na kutimila sigilizi za Zumbe Chohile amlagize Musa mwa Izulaeli nochumilwe. Kwenke moyo naho utoge. Usekogoha hegu kususuhala. 14Kwa kuhikiliza kwangu sika Hazina kwachausa che Inyumba ya Zumbe Chohile, tani elufu gana dimwenga za zahabu, tani milioni imwenga na mligano hewikuwazika wa chuma na shaba, kwaviya vilozesa. Siwandaila kale mbao na mayuwe. Mna waungwa uvyongeze. 15Naho una wandima walozize wakudaha chila ndima, watula mayuwe na wazesi na wakusongola na mafundi, 16wakufula vintu vya zahabu na vintu vya mayuwe ya chumbu na vintu vya shaba na chuma. Haluse konga indima ino! Zumbe Chohile atende na weye!” 17Daudi niyo awalagiza vilongozi wose wa Izulaeli wamwambize Sulemani, akagamba, 18“Togolani, Chohile ywenyu hehamwenga na nyuwe? Togolani hawenkileni utondowazi ntendele zose? Uyo kanidahiza niwahude awekazi wose we isi ino, haluse isi yalongozwa ni nyuwe na Zumbe Chohile. 19Haluse msankanileni Zumbe Chohile ywenyu kwa untu na moyo wose. Elo haliko! Mzengeleni Chohile hantu hakukile chani shanduku dye idilagano dya Zumbe Chohile hamwenga ne viya vyose vikukile vikujesezwa momviko, vikigwe kunyumba kwe nyumba izengigwe kwachausa cha kumvikila Zumbe Chohile.”