Mihilimo 23

1Hadya Daudi eze atende kadalahalisa, niyo amwika mwanawe Sulemani atende seuta ywa Izulaeli.

Ndima za Walawi

2Seuta Daudi niyo awetangaga wakulu wose wa Izulaeli, hamwenga na walavyantambiko na Walawi. 3Walawi wose wagosi wata mihilimo milongo mitatu na kujendeleza niyo wawazwa. Mligano wawo wendaga milongo mitatu na mnane elufu. 4Daudi niyo awasente savino, wantu magana milongo midi na nne elufu watenda wadamanya ndima kwenyumba ya Zumbe Chohile, wantu milongo mtandatu elufu watende watundulia mbuli zijinkile na walamuzi. 5Wantu elufu nne watende wamizi mwe izinchili na wantu elufu nne watende wachemi wakumtogola Zumbe Chohile kwa vimpandwa vya kuchemela adamanye seuta mwenye kwachausa icho. 6Daudi awasentaga Walawi mwe mafyo matatu kuligana ne izinkolo ze idikabila dya Lawi, lukolo lwa Geshoni na lukolo lwa Kohati na lukolo lwa Melali. 7Wana wa Gelishoni wendaga waidi, Ladani na Shimei. 8Ladani endaga na wana watatu, Yehieli na Zetamu na Yoeli. 9Wana wa Shimei wendaga watatu, Shelomoti na Hezieli na Halani. Wano wendaga vilongozi wa lukolo lwa Ladani. 10Wana wa Shimei wendaga ni masekulu wane, Yahati na Zina na Yeusi na Beliya. 11Yahati nuyo endaga umkulu ywawo niyo atimilwa ni Zina, mna Yeushi na Beliya hawendile na wana walozize, wawazagwa saviya lukolo lumwenga niyo wenkigwa ndima imwenga. 12Wana wa Kohati wendaga wane, Amlamu na Ishali na Hebuloni na Uzieli. 13Wana wa Amlamu wendaga ni Haluni na Musa, Haluni na welekwa wakwe niyo asentwa atende mwika viya vikukise, naho welekwa wakwe wavunkiza ubani kulongozi kwa Zumbe Chohile mazuwa yose wakamsankanila na kuwajimbika wantu kwa zina dya Chohile mazuwa yose. 14Mna wana wa Musa, mntu ywa Chohile watajwa saviya wantu we idikabila dya Lawi. 15Wana wa Musa wendaga ni Geshomu na Eliezeli. 16Shebueli endaga nuyo mwana umkulu ywa Geshomu. 17Eliezeli endaga na mwana yumwenga du Lehabiya uyo endaga chilongozi. Mna Lehabiya endaga na wana walozese. 18Wana wa Ishali mkulu ywawo endaga ni Shelomiti chilongozi we idikabila dyose. 19Wana wa Hebuloni wendaga ni wane, mkulu ywawo endaga ni Yeliya ywa kaidi ni Amaliya ywa katatu ni Yahazieli ywa kane ni Yekameamu. 20Wana wa Uzieli wendaga ni waidi, Mika mkulu ywawo, ywakaidi ni Ishiya. 21Melali endaga na wana waidi, Mali na Mushi. Wana wa Mali wendaga waidi, Eliazeli na Kishi 22Eliazali abanikaga hene mwana ywa chilume mna wandele awodu. Wandele awo wasolagagwa ni wehwa zawo wana wa Kishi. 23Wana wa Mushi wendaga watatu, Mali na Edeli na Yelomoti. 24Awo nawo welekwa wa Lawi kuligana ne izinkolo ne izikaya zawo. Chila yumwenga abuzize mihilimo milongo midi na kujendeleza, zina dyakwe nadiwandikwa naho nakasankana na ndima mwe inyumba ya Zumbe Chohile. 25Daudi niyo agamba, “Kwaviya Zumbe Chohile, Chohile ywa Izulaeli, kawenka utondowazi awantu wakwe, uyo nekale Yelusalemu kale na kale. 26Elo Walawi hawaunge kudisamiza vituhu Idihema dikukile hegu iviya vyakwe vyo umviko.” 27Kuligana na malagizo ya udumo alongile Daudi, Walawi wose wabuzize mihilimo milongo midi nendile wawandikwa wadamanye ndima mwe Inyumba ya Zumbe Chohile. 28Ndima zawo nendile ni kuwambiza ndima walavyantambiko welekwa wa Haluni mwe Inyumba ya Chohile kutunduliya izinyuwa ne vyumba, kusunta iviya vikukile vyose na kudamanya ndima zikulanga nyumba ya Chohile. 29Hamwenga ne izimbuli izo, nawakambiza mwe ndima ya koka mikate ikukile, na unga udinyigwe na malavyo ya unga na mandazi heyegwaduswe yokigwe na mavuta ya mizaituni na malavyo yahanganywe na mavuta. Iviya mwe ivihimo vyose vyo kuhimila ulozo no ukulu wakwe, 30chila zuwa mtondo na chisingi nawakaungwa wachimale kulongozi kwa Zumbe Chohile kumhongeza na kumtogola, 31na chipindi chose malavyo ya kutikimya yakalavigwa kwa Zumbe Chohile mwa amazuwa yo Kuhumula na mwezingasu zo mwezi ukatondomoka na ngasu ntuhu zilagizwe. Lagizo dilavigwa Walawi wasankane kulongozi kwa Zumbe Chohile chila nkanana saviya walagizwe. 32Elo yendaga ndima yawo kutunduliya Idihema dikukile na hantu hakukile na kuwambiza walukolo wawo walavyantambiko welekwa wa Haluni mo kuvika mwe Inyumba ya Zumbe Chohile.