Mihilimo 24

Ndima za walavyantambiko

1Vino nivyo yapangigwe amabunga ya welekwa wa mlavyantambiko Haluni. Haluni nendile ana wana wane, Nadabu na Abihu na Eliazali na Itamali. 2Nadabu na Abihu wabanikaga tati yawo henati kubanika naho nendile hawana wana ivyo Eliazali na Itamali walukolo wawo niyo watenda walavyantambiko. 3Seuta Daudi awasentaga welekwa wa Haluni mwe mabunga kuligana na ndima zawo. Nakambizwa indima iyo ni Sadoki mwelekwa ywa Eliazali na Ahimeleki mwelekwa ywa Itamali. 4Kwaviya vilongozi wa chigosi mwa welekwa wa Itamali wendaga waloza wawapanga welekwa wa Eliazali mwe vilongozi mlongo umwenga na mtandatu na welekwa wa Itamali mwe vilongozi mnane. 5Ndima zawo zose wapangagwa kwa tegatega kwaviya mgati mwawo kwendaga na wakusankana mwe Inyumba ya Zumbe Chohile na walavyantambiko mwe izinkolo zose mbili kugamba lukolo lwa Eliazali na lukolo lwa Itamali. 6Shemaya mwana ywa Nasaneli mta kuwandika endaga Mlawi, awandikaga amazina yawo kulongozi kwa seuta Daudi na masekulu wakwe. Mlavyantambiko Sadoki na Ahimeleki mwana ywa Abiatali na vilongozi wa welekwa wa walavyantambiko na Walawi. Welekwa wa Eliazali watoilagwa tegatega nkanana mbili na welekwa wa Itamali nkanana imwenga. 7Tegatega dya nkongo dimgwela Yoalibu, dya kaidi dimgwela Yedaya, 8ywakatatu Halimu dya kane Seolimu, 9dya shano Malikiya dya mtandatu Miyamini, 10dya mfungate Hakosi dya mnane Abiya, 11dya chenda Yeshuwa dya mlongo Shekaniya, 12dya mlongo na imwe Eliashibu dya mlongo na mbili Yakimu, 13dya mlongo na ntatu ni Hupa dya mlongo na nne Yeshebeabu, 14dya mlongo na shano Biliga dya mlongo na mtandatu Imeli, 15dya mlongo na mfungate Hezili dya mlongo na mnane Hapisesi, 16dya mlongo na chenda Patahiya dya milongo midi Yehezikeli, 17dya milongo midi na imwe Yakini dya milongo midi mbili Gamuli, 18dya milongo midi na ntatu Delaya dya milongo midi na nne Maaziya. 19Luno ni ludongo lwa mabunga yawandikagwa kuligana ne izindima zawo mo kwingila mwe Inyumba ya Zumbe Chohile kudamanya ndima mwe viya walagizwe ni Haluni babawo, saviya alagizwe ni Zumbe Chohile ywa Izulaeli.

Ludongo lwa Walawi watuhu

20Welekwa watuhu wa Lawi wendaga ni kulawa kwa Amlamu ni Shubaeli na Yedaya. 21Wana wa Lehabiya chilongozi ywo ulukolo endaga Ishibia. 22Welekwa wa Ishio chilongozi endaga Shelomoti na Yahati. 23Wana wa Hebuloni nendile ni Yeliya na Amaliya na Yahazieli na Yakameamu. 24Wana wa Uzieli chilongozi endaga Mika, mwelekwa ywa Mika nendile ni Shamile. 25Ishiya mlukolo ywa Mika mwelekwa ywakwe ni Zekaliya. 26Wana wa Melali nendile ni Mali na Mushi wana wa Yaziya ni Beno. 27Wana wa Melali nendile ni Yaziya na Beno na Shohamu na Zakuli na Ibuli. 28Wana wa Mali ni Eliazali uyo hendaga na wana. 29Mwana ywa Kishi nendile ni yumwenga du Yelamaeli. 30Mushi nendile ana wana watatu, Mahili na Edeli na Yelemoti. Awo wendaga welekwa wa Walawi kuligana ne izinkolo zawo. 31Awo nawo watowaga tegatega saviya walukolo wawo wana wa Haluni kulongozi kwa seuta Daudi na Sadoki na Ahimeleki na wakulu we izinkolo za watati zawo walavyantambiko na Walawi wakasinya. Wantu we izikaya za mwelekwa ywa nkongo wenkigwa ndima zikuligana na awantu we izikaya za awavunazawo.