Mihilimo 29

Malavyo ya kuzengela Inyumba ya Chohiloe

1Seuta Daudi niyo awagamba wadya awantu wadugane, “Mwanangu Sulemani uyo asagulwe ichedu ni Chohile achei mdodo naho indima ino ni nkulu haizwele. Nyumba akunga azenge siyo ya mntu, mna ni ya Zumbe Chohile. 2Sihikiliza kwa udahi wangu wose kwika hazina ye Inyumba ya Chohile ywangu, zahabu na chumbu cha na shaba na chuma na miti. Simalanya mayuwe ya shohamu na yakumemezeza mayuwe ya njumu na mayuwe ya langi zesimile na mayuwe yalozize ya malumalu, vyose ivyo sivichisanya. 3Ukaleka ivintu ivyo vyose inyumba ya Chohile miye mwenye nalavya zahabu na chumbu kwachausa cha kuyungisa Inyumba ya Chohile ywangu, 4kugamba tani gana dimwenga na mlongo na shano za zahabu kulawa Ofili na tani magana mfungate zilenguke za kugubika izinkwambiza ze Inyumba, 5na kwachausa cha kudamanyiza viya vyesimile vya zahabu na mayuwe ya chumbu navidamanywe ni mafundi wasani. Elo ni yuhi mtuhu akunga alavye vintu kwa Zumbe Chohile vino dyelo?”

6Aho wakulu we izinkolo ne ivilongozi wa amakabila ya Izulaeli na wakulu wa wagomba nkondo wa maelufu na magana na wakulu wakuchimaila izindima za seuta niyo walavya kwa kunga wenye. 7Walavyaga kwa chausa che izindima mwe nyumba ya Chohile, tani gana dimwenga na milongo mfungate za zahabu na tani magana matatu na milongo mine za chumbu na tani magana mtandatu na milongo midi za shaba na tani elufu ntatu na magana mane za chuma. 8Wadya wendaga na mayuwe ya yombe kulu wayalavyaga yajelwe mwe mpamba ye Inyumba ya Chohile wakachimailwa ni Yehieli kulwa lukolo lwa Gelishoni. 9Wantu niyo welelwa kwaviya walavya kwa kunga wenye, kwaviya kwa moyo wawo wose wamlaviza Chohile kwa kunga wenye, seuta Daudi niyo eleleswa.

Daudi amtogola Chohile

10Daudi niyo amtogola Chohile kulongozi ko mdugano wose akagamba, “Utogolwe kale na kale weye Zumbe Chohile ywa tati yetu Yakobo. 11Ukulu ni wako weye Zumbe Chohile, una nguvu naho kulenguka naho wahuda naho wi mumbi. Vyose vikwembingu na mwe isi ni vyako. Weye Zumbe Chohile useuta ni wako naho kukuzwa walongoza mwe ivintu vyose. 12Ugoli na ntunyo vyalaila kwako vyose wavilongoza. Udahi na nguvu vimo mkono wako, wawakweza na kuwatogeza wantu wose. 13Haluse chakuhongeza na kutogola zina dyako kulu weye Zumbe Chohile ywetu.”

14“Mna miye ni yuhi, naho wantu wangu ni wahi, vikuleka chikwinke chintu? Kwaviya vyose vyalaila kwako, chikulaviza vyako mwenye. 15Suwe chiwajeni kulongozi kwako naho chiwatafi chajinka saviya naweli wababa zetu, mazuwa yetu mwe isi yenga chizuli, hano hachikudaha kwenega file. 16Weye Chohile ywetu, ulozo wose uno chilavize chani chikuzengele nyumba kwachausa cho ukulu we idizina dyako walaila mo mkono wako naho vyose ni vyako. 17Miye simanya kugamba Chohile ywangu, weye wajeza myoyo ya wantu, wenawe wawagilwa ni ukanuni wawo. Miye mo ukanuni wangu sikulaviza ivintu vino vyose kwa kunga kwangu mwenye, haluse nawona wantu wako we hano wakakulaviza kwa ungi wawo na chinyemi. 18Weye Zumbe Chohile, Chohile ywa Ibulahimu na Isaka na Yakobo, wababa zetu, ika imbuli ino yo kwelavya kwako mwe imyoyo ya wantu wako itende mikanuni kwako. 19Mjimbike mwanangu Sulemani chani atoze malagizo yako ne izisigilizi zako ne imiko yako kwa moyo wose, adamanye yose chani adahe kuizenga Inyumba ino yo ukulu nimalanyize ivintu.”

20Niyo seuta Daudi awagamba wantu wose wadugane, “Mtogoleni Zumbe Chohile ywenu.” Niyo wantu wose wadugane wamtogola Zumbe Chohile ywa wababa zawo, wafika madi na kumvikila Zumbe Chohile na kumwinka ntunyo seuta Daudi. 21Wamlaviza ntambiko Zumbe Chohile. Zuwa ditimile wamlaviza malavyo ya kutikimya, njeku elufu imwenga na ndolome elufu imwenga na wana ngoto elufu imwenga, hamwenga na malavyo yawo ya vintu vya kuywa na ntambiko ntuhu kwachausa cha Waizulaeli wose. 22Ivyo wantu wadyaga na kunywa na kuvina mwe idizuwa idyo kulongozi kwa Zumbe Chohile.

Naho kwa nkanana ya kaidi niyo wamjidila mavuta Sulemani mwana ywa Daudi chani atende seuta ywawo. Kwa zina dya Zumbe Chohile na Sadoki atende Mlavyantambiko. 23Ivyo Sulemani niyo ekala mwe chiti cho useuta cha Zumbe Chohile atende seuta hantu ha tati yakwe. Kachumilwa vitendese, Waizulaeli wose niyo wamwetegeleza. 24Vilongozi wose na wagomba nkondo, hata wana chilume watuhu wa Daudi, wazumila kumtunya Sulemani kugamba nuyo seuta. 25Zumbe Chohile kamtenda Sulemani atende seuta akutunyiswa kujinka maseuta watuhu wose walongozaga Izulaeli umo yeye henati.

Udumo wo Ulongozi wa Daudi

26Daudi mwana ywa Yese endaga seuta mwe isi yose ya Izulaeli, 27kalongoza kwa mihilimo milongo mine. Kalongoza akekala Hebuloni kwa mihilimo mfungate na kalongoza akekala Yelusalemu kwa mihilimo milongo mitatu na ntatu. 28Abanikaga akatenda ni mdalahala, mta nguvu zakwe na mta ugoli na kutunywa, mwanawe Sulemani niyo atenda seuta mwa ahantu hakwe. 29Ulugano lwa seuta Daudi kukongela aho nkongo kubula ko udumo luwandikwa mo lukumbusa lwa wawoni watatu, Samwilu na Nasani na Gadi. 30Hamwenga ne izimbuli zose zo ulongozi wakwe ne izinguvu endile nazo, na mbuli zose zimlaile mwenye na Waizulaeli ne iziseuta zimzunguluke.