Mihilimo 1

1Sulemani mwana chilume ywa seuta Daudi, niyo etogeza mo ulongozi wakwe, Zumbe Chohile, Chohile ywakwe nendile kamjimbika na kumtenda atende na nguvu zitendese. 2Seuta Sulemani niyo awetanga masekulu wose wa amabunga ya maelufu na mabunga ya magana, ne vilongozi wose we izinkolo za Izulaeli, na vilongozi we izinkolo zose, 3kawalagiza waite hamwenga naye ahantu ho kuvikila uko Gibeoni. Waita uko kwaviya nuko kwendile ne Idihema Dikukile dya Zumbe Chohile dizengigwe ni Musa mndima ywa Chohile, uko koluwala. 4Hataivyo Idishanduku dye Idilagano dya Zumbe Chohile nendile dikomzi wa Yelusalemu mwe hema dihindigwe ni seuta Daudi umo adiletile kulawa Kiliyati Yealimu. 5Iviya kwendaga na mazabahu ya shaba izengigwe ni Bezaleli, mwana ywa Uli na mwezukulu ywa Huli, yendaga uko Gibeoni kulongozi kwe Idihema Dikukile dya Zumbe Chohile. Seuta Sulemani na awantu wose nawakamvikila Zumbe Chohile uko. 6Seuta Sulemani niyo akwela uko yendile imazabahu ye shaba kulongozi kwa Zumbe Chohile mwe Idihema Dikukile na kulavya ntambiko elufu imwenga za kutikimya mlanga mwe imazabahu iyo.

7Mwe ichilo icho Chohile niyo amlaila Sulemani na kumuza, “Waunga hwike mbwani?” 8Sulemani amhitula, “Kumdamanyiza wedi utendese tate Daudi, na kunitenda niwagile kutenda seuta. 9Haluse Zumbe Chohile, chintiza indagano umwikiye tate Daudi. Kunitenda seuta ywa wantu walozese hewekudaha kuwazika saviya lumbi, 10ivyo nakulombeza ninka ubala na umanyi ivyo hungwa niwalongoze. Hegusivyo, nanidahe vivihi kuwalongoza wantu wako walozize savino?” 11Chohile amhitula Sulemani, “Kudamanya mbuli yedi. Kuleka kulombeza ugoli hegu ntunyo hegu kulombeza file mwe wankondo wako hegu wikazi mtali wako mwenye, mna kulombeza umanyi na fanyanyi kugamba udahe kuwalongoza awantu wangu, wadya walekile hutende seuta, 12nahwinke umanyi na fanyanyi. Ukaleka ayo nahwinke ugoli na ntunyo vitendese naho hahana seuta yoyose endaga hegu nalaile vituhu.”

Ugoli no udahi wa seuta Sulemani

1Maseuta 10:26-29

13Ivyo Sulemani ahalawaga ahantu aho hokuvikila uko Gibeoni, kudya kwendaga ne Dihema Dikukile dya Zumbe Chohile na kuya Yelusalemu. Uko kalongoza Izulaeli.

14Sulemani niyo achisanya malingisha ya nkondo elufu imwenga na magana mane na falasi elufu mlongo umwenga na elufu mbili. Wasiku wawo awaikaga uko Yelusalemu, na wasigale kawaika mwe mizi mituhu yesimile ina vituo vya falasi na malingisha. 15Mwe chipindi Sulemani endaga seuta, zahabu na shaba zendaga zalozaga saviya mayuwe uko Yelusalemu, na mbawo za miti ya mielezi zendaga zalozaga saviya mikuyu mwe izinkongelo ya amagulu ya Yudeya. 16Falasi za Sulemani zalawaga Misili na Kilikiya, wachuluzi wakwe wazigulaga uko, 17wagulaga amalingisha ayo kulawa Misili kwa yombe dya chilo mfungate za mayuwe ya chumbu kwa chila dimwenga, na chila falasi imwenga waigula kwa chilo mbili za mayuwe ya chumbu. Seivyo ivintu ivyo wawatagila maseuta wa Wahiti na Wasiliya.