Mihilimo 2

Kwemalanya kuzenga Inyumba ya Chohile

1Maseuta 5:1-18

1Seuta Sulemani niyo alamula kuzenga Inyumba ya kumvikila Zumbe Chohile, naho kuzenga zumba dyakwe dya chiseuta. 2Kaika wagosi elufu milongo mfungate mwe ndima ya kwinula mizigo kuzengele na wagosi elufu milongo mnane wakusongola mayuwe kwa amagulu na wagosi elufu ntantu na magana mtandatu wakuchimaila indima iyo. 3Sulemani niyo asigila ulosi kwa Hilamu, seuta ywa Tilo amgamba, “Nakulombeza unigaile miti ya mielezi saviya umwigaile tate Daudi azengelaga idizumba dyakwe dye chiseuta. 4Kaula, naunga nizenge nyumba kwachausa cha kumvikila Zumbe Chohile, Chohile ywangu, naitende ni nyumba ikukile chani miye na awantu wangu nachimvikile na kuvunkiza ubani una mpofa yedi na hantu hakwika mikate kulongozi kwakwe mazuwa yose na kulavya ntambiko za kutikimya chila zuwa mtondo na chisingi na mazuwa ya Kuhumula na zuwa dya mnenge ukatontomoka na mazuwa ya ngasu ntuhu za Zumbe Chohile, Chohile ywetu, saviya alagize kwa Izulaeli kalenakale. 5Inyumba ya Chohile hunga nizenge naitende nyumba nkulu vitendese, kwaviya Chohile ywetu ni mkulu kujinka milungu yose. 6Hahana akudaha kumzengela Nyumba ya kuvikila Zumbe Chohile kwaviya mbingu zenye hazikumchinta, hata izimbingu za kulanga vitendese hazikuchinta. Elo, miye ni yuhi vikuleka nimzengele nyumba ukaleka du hantu ha kuvunkiziza ubani kulongozi kwakwe? 7Haluse nigailani mntu mta udahi wa kusongola vimpandwa vya zahabu na kudamanya vintu vya mayuwe ya chumbu vya shaba vya chuma na kusuma suche kwa nyuzi za langi ya zambalau na inkundu na buluu, iviya amanyize kuhamba vyedi. Uyo nambizane na wazesi mwe indima iyo na wazesi we hamwenga na miye uko Yuda na Yelusalemu, wadya wasagulagwa ni tate Daudi. 8Naho nigailani mielezi na mibeloshi na misandali kulawa Lebanoni, kwaviya simanya kugamba wandima wako ni wadahi vitendese mwe kutula mbawo uko Lebanoni. Wandima wangu nawambizane na awandima wako, 9chani wanitwile mbao zilozize, kwaviya inyumba iyo hunga nizenge naitende nkulu naho yakwehela. 10Wandima wako, kugamba maselemala na watula mbawo, nanilavye tani elufu mbili za ngano ibundigwe na tani elufu mbili za shaili na lita laki nne za divai na lita laki nne za mavuta ya mizaituni.” 11Seuta Hilamu ywa Tilo amhitula Sulemani kwa baluwa akamgamba, “Kwaviya Zumbe Chohile, awaunga awantu wakwe, kakutenda utende seuta ywawo. 12Atogolwe Zumbe, Chohile ywa Izulaeli, aumbile imbingu ne isi! Kamwinka Daudi mwana chilume mta umanyi na ubala na akili namzengele Zumbe Chohile Nyumba na kuzenga zumba dya chiseuta. 13Haluse nasigila mzesi mta udahi utendese zina dyakwe ni Hulamu Abi, 14mami yakwe alawa mwe idikabila dya Dani na ise ni mkaya ywa Tilo. Uyo ana umanyi ulozize wa kujeseza zahabu na mayuwe ya chumbu na shaba na chuma na mayuwe na miti, langi za zambalau na buluu na zinkundu na suche za chitani zedi. Naho ni mmanyi ywa kujela malembo na kudolonya midolonyo ya chila namna kutimilana mligano wowose nenkigwe. Uyo nadamanye ndima hamwenga na wazesi wako, wazesi wa sekulu ywangu, tati yako Daudi. 15Ivyo haluse, sekulu ywangu ivintu ivyo ulongile, ngano na shaili na mavuta ya mizaituni ne idivai, hampu chigaile suwe wandima wako saviya ulongile, 16suwe nachitule izimbawo kulawana neivyo vikungwa kulawa uko Lebanoni, vikaheza nachizitalize hamwenga zeleleke mlanga mwa amazi kubula Yopa. Kulaila uko noziguhe uzigale Yelusalemu.”

Uzesi we Inyumba ya Chohile wakonga

1Maseuta 6:1-38

17Seuta Sulemani alagizaga wantu wanyika mwe isi ya Izulaeli wawazwe. Uwazwa uwo ni saudya adamanyaga Daudi tati yakwe. Kwendaga na wajeni wakubula laki imwenga, milongo mishano na ntatu elufu na magana mtandatu. 18Mgati mwawo, milongo elufu mfungate awenkaga ndima ya kwinula mizigo. Milongo mnane elufu wendaga wakasongola mayuwe kwa magulu, elufu ntatu na magana mtandatu wendaga wachimaila chani wantu wadamanye ndima.