Mihilimo 3

1Seuta Sulemani akongaga kuzenga Inyumba yo kumvikila Zumbe Chohile uko Yelusalemu mlanga mo ulugulu lwa Molia, hantu Zumbe Chohile amlailaga Daudi ise dya Sulemani. Hendaga he chiwasa cho kuhetela ngano cha Alauna mntu ywe idikabila dya Yebusi, 2akongaga uzesi mo mwezi wa kaidi mo mhilimo wa kane wo ulongozi wakwe. 3Ivihimo ajesezaga seuta Sulemani mo kuzenga Inyumba ya Chohile vyendaga futi milongo chenda utali na futi milongo mitatu wangalamu. 4Ichumba cho mwingilo chendaga na wangalamu wa futi milongo mitatu na utali wa futi gana na milongo mnane. Ntendele ya kundani ichiwambaza chakwe chagubikagwa kwa zahabu ntana. 5Ukumbi wazungulusizagwa mbawo za miboleshi na kugubikwa kwa zahabu ntana imamatizwe mligano wa mitende na minyolo. 6Seuta Sulemani aihambaga Inyumba ya Zumbe Chohile kwa mayuwe matana ya yombe kulu na zahabu kulawa kwe isi ya Palivaimu. 7Inyumba yose yo kumvikila Chohile kaimamatiza kwa zahabu, misomo yakwe ne ivifigwe ne iviwambaza vyakwe ne izinyivi zakwe. Mwe iviwambaza kawagamba awandima wakwe wadolonye vyumbe vina mawawa wakwinga makelubi. 8Mwe ichumba cha mndani, chikwitangwa Hantu Hakukise, utali wakwe wendaga futi milongo mitatu seivyo wangalamu wakwe wendaga futi milongo mitatu. Ajesezaga zahabu ntana tani milongo midi kugubika iviwambaza vye ichumba icho. 9Mitunga ajeseze yendaga na uzami ukwinga nusu chilo ya zahabu, iviya vyumba vyose vye golofa kamamatiza zahabu. 10Seuta Sulemani adamanyaga matukulu maidi ya vyumbe vina mawawa vikwinga makelubi na kuyamamatiza kwa zahabu na kuyaika Hantu Hakukise. 11Chila chumbe chendaga na mawawa maidi yana utali wa futi mfungate na nusu. Wawa dimwenga dye idikelubi dya nkongo didonta ichiwambaza che ichumba, wawa dya kaidi didontana ne idiwawa dye idikelubi dya kaidi. 12Seivyo wawa dimwenga dye ichumbe cha kaidi didonta ichiwambaza ntendele intuhu ye ichumba ne idituhu didontana ne idiwawa dye idikelubi dya nkongo hagatigati he ichumba. 13Utali wa amawawa ye vyumbe ivyo ni futi mfungate na nusu. Nayachimala nchanjale izinyuso zawo zihinga ko ukumbi. 14Seuta Sulemani niyo asuma paziya dya chitambala ching'aile achisumilaga nyuzi zibuluu na za zambalau na zinkundu na kuzinyinya mlanga mwa amatukulu ayo.

Nguzo mbili za shaba.

1Maseuta 7:15-22

15Seuta Sulemani niyo adamanya nguzo mbili za shaba, chila imwenga nendile ina utali wa futi milongo mine na mnane na kuzisimbila kulongozi kwe Nyumba yo kuvikila, chila nguzo yendaga na ntumba ina utali wa futi mfungate na nusu. 16Kadamanya mahambo ya mikufu mlanga mwe zintumba ze zinguzo izo saviya misilimbo ya makomamanga gana dimwenga. 17Niyo azichimalisa izinguzo izo hebalaza ye Inyumba yo kuvikila, imwenga ntendele ya kwamwenyemzi, intuhu ntendele ya chenya, idya ntendele ya kwamwenyemzi kaitanga Yakini na idya ntendele ya chenya kaitanga Boazi.