Mihilimo 4

Vimpandwa vye Inyumba yo kuvikila

1Maseuta 7:23-51

1Seuta Sulemani kadamanyaga mazabahu ya shaba yendaga na utali wa futi milongo mitatu iviya wangalamu wakwe wendaga futi milongo mitatu na chimo cha mlongo umwenga na shano. 2Niyo adamanya mtangi wa mazi witangwe bahali dina mkungilo wa wangalamu wa futi mfungate na nusu na utali wa futi mlongo na shano na mzingo wa futi milongo mine na shano. 3Hasi ho mkungilo uwo kwendaga na nchanjale mbili za matukulu ya njeku kudizunguluka iditangi idyo, nchanjale imwenga nendile ina njeku mlongo umwenga. Matukulu ayo wayasanila chalumwe ne iditangi idyo. 4Mtangi uwo wikwa mlanga mwe matukulu mlongo umwenga na mbili ya njeku matatu yasinya kuhinga ntendele ya chenya, matatu yasinya kuhinga uswelo wa zuwa na ntatu kwamwenyemzi na ntatu ulailo wa zuwa. 5Unene wo mkungilo wo mtangi uwo wendaga inchi ntatu. Mkungilo wakwe wendaga saviya mkungilo wa chikombe na saviya luwa dya yungiyungi dimwagule. Mtangi uwo naukadaha kwingila lita elufu milongo mtandatu za mazi. 6Adamanyaga nkalango mlongo za kusuntila vihande vye izinyama zilavigwe ntambiko za kutikimya, shano mgati mwa izo azikaga ntendele ya kwamwenyemzi ye Inyumba yo kuvikila na shano ntendele ya chenya. Iditangi dijesezwa ni Walawi kwesunta. 7Adamanyaga viya mlongo vya zahabu vya kwikiya ta saviya alagizwe niyo avizika mwe ichumba ichikulu che Inyumba ya Chohile, viya vishano ntendele ya chenya na vishanao ntendele ya kwamwenyemzi. 8Kadamanya meza mlongo za zahabu, azika mo ukumbi we Inyumba ya Chohile, shano ntendele ya kulume na shano ntendele ya kumoso, seivyo kadamanya mabakuli gana ya zahabu. 9Niyo adamanya ukumbi kwachausa cha walavyantambiko na ukumbi mtuhu kwa kuse. Izinyivi ze zinchili ze izinkumbi zigubikwa kwa shaba. 10Aikaga iditangi idyo ntendele ya kwamwenyemzi ye Inyumba ya Chohile hajihi ne impembe ntendele ya ulailo wa zuwa. 11Iviya, Hulamu aumbaga nyungu, na makoleo na wabakuli. Ivyo Hulamu na wandima wakwe nivyo wabindilize indima idya seuta Sulemani amwinkile aidamanye mwe Inyumba ya Chohile. 12Nguzo mbili na mabakuli na ntumba mbili mlanga mwe izinguzo izo na nyavu mbili zagubikila izintumba zikigwe mlanga mwe izinguzo izo, 13yadya amakomamanga magana mane kwachausa che izinyavu mbili, nchanjale mbili za makomamanga kwa chila lwavu yaikwa mahambo mwe izinyavu zikigwe mlanga mwe izinguzo izo, 14mikokoteni mlongo ya kwinuila izinkalango mlongo, 15udya umtangi ukwitangwa bahali na amatukulu ye izinjeku mlongo na mbili hasi hakwe, 16iviya izo izinkalango na machepe na mabakuli hamwenga na viya vituhu vyose vijeseze. Vintu vyose Hulamu Abi amdamanyize seuta Sulemani kwachausa che Inyumba ya Chohile vidamanywa kwa shaba isuntigwe. 17Seuta Sulemani alagizaga ivintu ivyo vidamanywe mwe mpwani yo mto Yolodani hantu he ulongo wa mufi ntendele ya hagatigati ha Sukosi na Seleda. 18Ivintu adamanyaga seuta Sulemani vyendaga vilozesa ivyo uzami wakwe we shaba hawamanyikaga.

19Iviya seuta Sulemani adamanyaga ivimpandwa vyendaga mndani mwe Inyumba ya Zumbe Chohile, mazabahu ya zahabu ya kuvunkiziza ubani na meza ya kwikiya mikate ikulavigwa kulongozi kwa Zumbe Chohile, 20viya vya kwikiya ta vya zahabu ntana hamwenga ne izita zakwe chani zake kulongozi kwa Ahantu Hakukise saviya vilagizwe, 21midolinyo ya maluwa yahakigwe zahabu, na ta na machepe vyose vikatenda vya zahabu ntana, 22na mikasi ya zahabu na mabakuli na visahani vya kokela ubani na wazaye wa shaba wa kuguhila moto. Izinyivi za kuse ze Inyumba ya Chohile ne izinyivi za Hantu Hakukise zadamanyagwa kwa zahabu. Ivintu vyose ivyo vyadamanyagwa kwa zahabu ntana.