Mihilimo 5

1Seuta Sulemani eze abinde indima yose kwachausa che Inyumba ya Zumbe Chohile, niyo avingiza mndani ivintu viya tati yakwe Daudi avisentaga kwachausa cha Zumbe Chohile, kugamba, mayuwe ya chumbu na zahabu na vimpandwa vituhu vyose na kuvijela mwe hazina ye Inyumba ya Chohile.

Idishanduku dye Dilagano dyengizwa mwe Inyumba ya Chohile

1Maseuta 8:1-9

2Vikaheza seuta Sulemani niyo awetanga vilongozi wose wa makabila na nkolo za Waizulaeli wadugane uko Yelusalemu, chani wadikweze Idishanduku dye idilagano dya Zumbe Chohile kulawa komzi wa Sayuni, mzi wa Daudi wadigale kwe Inyumba ya Chohile. 3Wantu wose niyo wadugana kulongozi kwa seuta Sulemani mwe ingasu ya amaheha ikudamanyika mwezi wa mfungate. 4Vilongozi wose weze wadugane, Walawi niyo wadinula Idishanduku dye Idilagano, 5wadigala kwe Inyumba ya Chohile. Walavyantambiko na Walawi iviya wasamiza Idihema Dikukile dya Zumbe Chohile ne ivimpandwa vyose vikukile vyendile mndani mwakwe. 6Seuta Sulemani na awantu wose wa Izulaeli wadugana kulongozi kwe Idishanduku dye Dilagano na kulavya ntambiko za ngoto na ng'ombe zilozize hezikuwazika. 7Vikaheza walavyantambiko niyo wadingiza Idishanduku dye Dilagano dya Zumbe Chohile na kudika mndani mwa Hantu Hakukise, hasi ha mawawa ya viya ivyumbe. 8Vyumbe ivyo vitandamula amawawa yawo mlanga mwa ahantu dikigwe na kugubika Idishanduku hamwenga ne imitengo yo kudihagatila. 9Izimbulo ze mitengo nazikaoneka kulongozi kwe ichumba Chikukise mna nendile haikuoneka kwa kuse. Mitengo iyo iyuko kubula dyelo. 10Mndani mwe Idishanduku nendile hamna chintu chituhu chochose ukaleka vibawo vidi vya amayuwe vyaikagwa mndani ni Musa kudya kolugulu lwa Sinai, hantu Zumbe Chohile aikaga lagano na wantu wa Izulaeli umo wakalawa Misili.

Ung'azi wa Zumbe Chohile

11Ivyo walavyantambiko wose niyo wahalawe ahantu Hakukile, niyo wekukiza vileke wazumilwe ni Chohile ukaleka mabunga yawo walaile. 12Walawi wose wendaga wachemi, kugamba, Asafu na Hemani na Yedushuni na wana wawo wa chilume, wachimalaga ntendele ya ulailo wa zuwa we imazabahu yo kulaviza ntambiko, wavala chitambala ching'aile kuno wakatowa magunda na malimba na mazeze. Wendaga hamwenga na walavyantambiko gana na milongo midi wakatowa magunda. 13Watowa magunda na wachemi wachemaga na watowa vimpandwa vituhu ywa kuchemela kwa izwi dya lungole wamtogola Chohile wakachema,

“Kwaviya uyo ni ywedi

na ungi wakwe wekala na suwe kalenakale.”

Naho Inyumba ya Chohile imemezwa ni ingu dina ung'azi wa Zumbe Chohile. 14Walavyantambiko wadunduga kujendeleza kumvikila Zumbe kwachausa che idingu, kwaviya Ukuka wa Zumbe Chohile umemeza Inyumba ya Chohile.