Mihilimo 6

Seuta Sulemani alonga na wantu

1Maseuta 8:12-21

1Sulemani niyo agamba, “Zumbe, kusagula kwikala mwe ingu dya ziza. 2Haluse sikuzengela nyumba Ikukile, hantu hako nawikale kalenakale.” 3Vikaheza Sulemani awahitukila awantu wose wa Izulaeli wachimale hadya alombeza Zumbe Chohile awajimbike. 4Akagamba, “Ajimbikwe Zumbe Chohile ywa Izulaeli! Achintize idilagano aikiye kwa tate Daudi hadya alongaga naye akagamba, 5‘Kukongela ichipindi nawalavyaga awantu wangu Misili sisagule mzi wowose mwe isi ya Izulaeli saviya hantu hakuzenga Nyumba ya kunivikila, naho sisagule mntu yoyose alongoze awantu wangu wa Izulaeli. 6Mna haluse sisagula umzi wa Yelusalemu utende mzi nanivikilwe, weye Daudi, nolongoze awantu wangu wa Izulaeli.’” 7Ivyo seuta Sulemani niyo ajendeleza kulonga, “Tate Daudi emalanyaga kuzenga nyumba ya kumvikila Zumbe Chohile, Chohile ywa Izulaeli, 8mna Zumbe kamgamba tate Daudi, ‘Kufanyanya vyedi kunizengele nyumba ya kunivikila, 9mna suyo weye nozenge Inyumba iyo. Ni mwanawo ywa chilume nuyo nazenge Inyumba yangu.’” 10“Haluse Zumbe Chohile kachintiza idilagano miye sitenda seuta hantu ha tate Daudi, naho simzengela Zumbe hantu ha kumvikila Zumbe Chohile ywa Izulaeli. 11Mwe Inyumba ya Chohile iyo sidika Idishanduku dye Dilagano, Shanduku idyo mndani mwakwe mna ndagano ya Zumbe Chohile alagane na wantu wa Izulaeli.”

Malombezo ya seuta Sulemani

1Maseuta 8:22-53

12Seuta Sulemani niyo achimala kulongozi kwe imazabahu yo kulaviza ntambiko kwa Zumbe Chohile wantu wose wa Izulaeli wakamsinya, kenula imikono yakwe kulanga akalombeza. 13Seuta Sulemani adamanyaga chilingo cha shaba na kuchika hagatigati ho ukumbi wa kuse. Utali wakwe wendaga futi chenda na wangalamu wa futi chenda, chimo chakwe chendaga futi shano. Niyo akwela mlanga na kufikamadi kulongozi kwe dibunga dyose dya Izulaeli, na kuchulusa imikono yakwe kuhinga kwembingu. 14Niyo alombeza akagamba, “Weye Zumbe Chohile ywa Izulaeli, hahana Chohile mtuhu akwinga weye, kwembingu hegu mwe isi, weye wachintiza lagano dyako na wantu wako na kuwalagisa ungi wako wadya wakwikala kwa kukwiva weye kwa myoyo yawo yose. 15Kuchintiza lagano dyako kwa mndima ywako tate Daudi, yadya ulongile dyelo yalaila. 16Haluse, Zumbe Chohile, Chohile ywa Izulaeli, iviya nakulombeza uchintize idilagano dyako saviya ulongile na tate Daudi mndima ywako kugamba welekwa wakwe nawalongoze mo useuta wa Izulaeli saviya utendendile kulongozi kwangu. 17Ivyo haluse, Zumbe Chohile, Chohile ywa Izulaeli, chintiza yadya yose umgambile mndima ywako Daudi.”

18“Mna weye Chohile, wadaha wikale mweisi mgati mwe wantu? Mbingu ne izimbingu zikulanga vitendese hazikukuchinta wadaha vivihi kwikala mwe Inyumba ya Chohile ino huzengele? 19Mna Zumbe Chohile, miye mndima ywako nakulombeza unitegeleze na kuchintia idilombezo dyangu hulombeza kwako. 20Idime Inyumba ya Chohile ino chilo na msi. Hano naho ahantu usagule uvikilwe, ivyo unive heza hano he Inyumba ya Chohile kukuvikila na kulombeza. 21Wive amalombezo yangu miye mndima ywako na malombezo ya awantu wako wa Izulaeli umo wakalombeza kuhinga ahantu hano. Wive kulaila uko kwembingu, hantu ho wikazi wako uchive na kuchilekeila amasa yetu.” 22“Wantu wakalahwa ni weyawe niyo waungwa welise, waneza na kwelisa kulongozi kwe imazabahu yako mndani mwe Inyumba ya Chohile, 23weye Zumbe Chohile wive uko kwembingu na kuwakantila awandima wako. Wakantile wadya wana mlema saviya vikungwa na kuwalekeile wadya hewena mlema.” 24“Uneva awantu wako wa Izulaeli wanahudwa ni wankondo wawo kwaviya wakukola masa, wanahituka na kukweila na kwiza kwe Inyumba ya Chohile na kunyanyahala wakalombeza walekeile, 25uweve kulaila kwembingu. Walekeile amasa yawo na uwavuze kudya kwe isi uwenkile wowo na wababa zawo.” 26“Uneva fula haikunya kwaviya wakukola masa, wanalombeza wakahinga ahantu hano na kweila amasa yawo, 27hampu Zumbe, uweve kulaila kwe imbingu na kuwalekeila amasa ya wandima wako, awantu wa Izulaeli, na kuwahinya yadya yachumile, elo Zumbe, uwanyeseze fula mwe isi yako, idya uwenkile awantu wako itende ulisi wawo. 28Uneva kunatenda na gumbo hegu unyonje ukwitangwa tauni, na unyazi mwe isi hegu unyonje wa mimeya hegu sije hegu kwebungwa ni wankondo wawo, hegu kuna unyonje hegu manyonje yoyose mgati mwawo, 29hampu wive malombezo yoyose nayalombezwe ni mntu yoyose hegu wantu wako wose wa Izulaeli, chila mntu anamanya izinkunto zo umoyo wakwe anachulusa imikono yakwe kuhinga mwe ino Inyumba ya Chohile, 30wive amalombezo yawo. Damanya kwa chila yumwe ywetu saviya vikumuwagila, weve kulaila kwembingu walekeile, ni weye du umanyize izifanyanyi ze imyoyo ya awantu, 31ivyo awantu wako nawakutunye na kutimila izisila zako chipindi chose nawekale muno mwe isi uwenkile wababa zetu.” 32“Uneva wajeni sawo Waizulaeli waneza kulawa si ya hale kwachausa cha kukuvikila na kwachausa cho ukulu wako ne izinguvu zako no wamizi wako, waneza mwe ino Inyumba ya Chohile, 33wive amalombezo yawo kulawa kwembingu kudya ukwikala, wetegeleze na kudamanya yadya wakukulombeza uwenke, chani wantu wose mwe isi wadaha wakumanye na kukwiva, saviya wakudamanya awantu wako wa Izulaeli. Vileke wamanye kugamba Inyumba ya Chohile nizengile ni kwachausa cha kuvikila weye.”

34“Awantu wako wanaita kwe nkondo wakagombe nkondo na wankondo wawo kokose nawatende, wanalombeza wakahinga komzi uno usagule ne ino Inyumba ya Chohile huzengele kwachausa cha kukuvikila, 35wetegeleze amalombezo yawo kulawa kwembingu. Weve na kuwenka uhuda.” 36“Uneva awantu wako wakukola masa kwaviya hahana mntu hekukola masa, weye unaweihiwa na kuwaleka wahudye na kutahigwa na kwigalwa hale vitendese hegu hajihi, 37uneva mweisi iyo ya hale wananyanyahala na kweila kwa moyo wawo wose, wanalombeza wakagamba, ‘Chikukola masa chaga na kudamanya yehiye.’ 38Uneva wanatenda wakanuni umo mwe isi ya awankondo wawo na kweila kwa moyo wose na kulombeza wakahinga mweisi yawo uwenkile wababa zawo, umzi uno usagule ne ino Inyumba ya Chohile huzengele, 39elo, kulawa kwembingu ko wikazi wako, wive amalombezo yawo, uwenke uwagila wawo na kuwalekeile awantu wako masa yawo watendile.”

40“Haluse, weye Zumbe Chohile ywangu,

chikaule na wive amalombezo yetu nachilombeze ahantu hano. 41Haluse weye Zumbe Chohile,

inuka wingile ahantu hako ho kuhumula,

weye hamwenga ne Idishanduku dye Dilagano dye izinguvu zako,

weye Zumbe Chohile wakombole walavyantambiko wako na awantu wako watende na mbwedo kwachausa cha wedi wako.

42Elo Zumbe Chohile,

usekumlemela seuta ywako usagule.

Kumbuka ungi unanawo kwa mndima ywako Daudi.”