Mihilimo 7

Kusentwa kwe Inyumba ya Chohile

1Maseuta 8:62-66

1Seuta Sulemani eze abinde amalombezo yakwe, moto usela kulawa kwembingu woka izintambiko ziya zilavigwe, na ung'azi wo ukuka wa Zumbe Chohile umemeza Inyumba ya Chohile. 2Kwaviya ung'azi wo Ukuka wa Zumbe Chohile na umema mwe Inyumba yo kuvikila, walavyantambiko wadunduga kwingila mndani. 3Wantu wa Izulaeli weze wawone umoto ukasela kulawa kwembingu na ung'azi umemeza Inyumba yo kuvikila, niyo wafikamadi wenama kubula mwe sanga, wakamvikila Chohile wakagamba,

“Uyo ni wedi na ungi wakwe ni kalenakale.”

4Seuta Sulemani na awantu wose niyo walavya izintambiko zawo kwa Zumbe Chohile. 5Seuta Sulemani amlavizaga Zumbe Chohile ng'ombe milongo midi na mbili elufu na ngoto laki imwenga na milongo midi elufu. Ivyo seuta Sulemani na awantu wakwe niyo waisenta Inyumba yo kuvikila. 6Walavyantambiko niyo wachimala chila yumwenga hantu hakwe saviya walagizwe, seivyo Walawi nawo wendile ne vimpandwa vyawo vyo kuchemela vyadamanyangwa ni seuta Daudi kwachausa cha kumtogola Zumbe Chohile, wachemaga wakagamba, “Ungi wakwe wekala kalenakale!” Viya walagizwe ni Daudi. Walavyantambiko watowa magunda kuno Waizulaeli wase wakatenda wachimala. 7Seuta Sulemani niyo asenta ntendele ya hagatigati yo uwa, yendile ikulongozi kwe Inyumba yo kuvikila ya Zumbe Chohile, uko endile akalaviza izintambiko zo kutikimya na mavuta ya malavyo ya utondowazi, kwaviya imazabahu yo kulaviza ntambiko ye shaba, kwaviya imazabahu nendile haikuchinta kwika malavyo ayo yose na malavyo ya uvuni na ya mavuta yo kutikimya.

8Seuta Sulemani na awantu wose wa Izulaeli wavina ingasu ya makumbi kwa mazuwa mfungate. Kwendaga na fyo kulu dya wantu kulawa hale uko kwe chomboko cha Hamasi ntendele ya chenya kubula umhaka wa Misili kwe ntendele ya kwamwenyemzi. 9Mwe idizuwa dya mnane wechisanyaga hamwenga kwaviya nendile wakavina kwachausa cha kwisenta imazabahu kwa mazuwa mfungate niyo wavina naho kwa mazuwa matuhu mfungate. 10Vikaheza mwe idizuwa dya milongo midi na ntatu dyo mwezi wa mfungate, seuta Sulemani kawalaga awantu kwezikaya zawo. Wendaga welelwa kwa udya ujimbiko Zumbe Chohile awenkile awantu wakwe wa Izulaeli, na kwa Daudi na kwa Sulemani.

Chohile amlaila vituhu Seuta Sulemani

1Maseuta 9:1-9

11Seuta Sulemani eze abinde kuzenga Inyumba yo kumvikila Zumbe Chohile ne idizumba dye chiseuta, kachumilwa mwe yadya yose aungile kudamanya mwe ivyo, 12Zumbe Chohile niyo amlaila seuta Sulemani nechilo. Amgamba, “Siva amalombezo yako, naho sisagula ahantu hano hantende Nyumba yangu ya kunilaviza ntambiko. 13Hegu fula haikunya hegu ninawegailani sije zidye ulozo wenyu hegu manyonje kwa awantu wangu, 14uneva wantu wangu wananilombeza na kunyanyahala na kuhituka kwa yadya yehiye wendile wakadamanya, naniweve kulawa kwembingu na kuwalekeila amasa yawo, naniihonye isanga yawo. 15Nyumba ino naniikaule na kwetegeleze amalombezo nayalombezwe ahantu hano, 16kwaviya siisagula na kuikukiza Inyumba ino itende ya kunivikila kalenakale. Naniidime na kuyamila mwe ichipindi chose. 17Uneva unanisankanila kwa moyo wako wose saviya tati yako Daudi adamanye, na kwetegeleza na kudamanya yadya hukulagiza, 18nanitogeza ndagano diya nilagane na iso Daudi hadya namgambaga mazuwa yose Waizulaeli nawalongozwe na awelekwa wako. 19Mna weye na awantu wako mnaleka kunitimila na kulemela ulongozi wangu ne izisigilizi niwenkileni na kutimila milungu mituhu na kuivikila, 20naho naniwauseni mwe isi ino niwenkile. Iviya Inyumba ino nizumile itende ya kunivikila naniilemele na kuitenda chintu cha kubelwa na kutilwa ni wantu we izisi zose.” 21“Hatahegu ino Inyumba ya Chohile vino haluse yatunyiswa, mna umo yakalaila ayo, awantu wose wakujinka hano nawehelwe na kuza, ‘Nimbwani Zumbe kadamanya mbuli saino kwe isi ino na mwe Inyumba ino?’ 22Awantu nawahitule, ‘Ni kwachausa cha kumleka Zumbe Chohile ywawo, awalavize watati zawo kulawa Misili. Niyo watimila milungu mituhu na kuivikila na kuisankanila ivyo Chohile kawegaila nkunto zose izo.’”