Mihilimo 8

Kuchumilwa kwa Sulemani

1Maseuta 9:10-28

1Seuta Sulemani kazenga Inyumba ya Chohile ne idizumba dyakwe dye chiseuta kwa mihilimo milongo midi, 2Naho azenga uhya umzi udya enkigwe ni seuta Hilamu, na kuwegala Waizulaeli wakekale umo. 3Vikaheza atahaga umzi wa Hamati Zoba, 4naho auzungulusiza chiwambaza umzi wa Tadimoli mwe dijangwa. Niyo azenga uhya imizi yose mwe isi yendaga ya hazina uko Hamati. 5Iviya Seuta Sulemani azengaga imizi ya Beti Holoni ya kulanga na Beti Holoni ya hasi na kuizungulusiza viwambaza na kuikiya nchili na mihindo, 6naho azenga imizi ya Baaati ne imizi yakwe ye hazina na kwachausa cha amalingisha yakwe ya nkondo na hazina ya kwikiya falasi zakwe. Iviya azengaga chochose aungile komzi wa Yelusalemu na Lebanoni na mweisi yose endile akalongoza. 7Wantu watuhu wose wasigale mgati mwa Wahiti na Waamoni na Wapelezi na Wahivi na Wayebusi, wadya wose wendile sawo Waizulaeli, 8kugamba welekwa wawo wasigale mweisi hewekomigwe ni Waizulaeli, seuta Sulemani awenka ndima za kukunkuswa saviya vili kubula dyelo. 9Mna mwa awantu wose wa Izulaeli, seuta Sulemani hawenkile ndima za kukunkuswa, mna kawaika watende wagomba nkondo na masekulu na wakulu na masekulu wa amalingisha yakwe ye nkondo na wendesha amalingisha ye nkondo. 10Iviya kasagula Waizulaeli watuhu magana maidi na milongo mishano watende wachimaila wa wantu mwe izindima zo kukunkuswa.

11Seuta Sulemani niyo amsamiza mkaziwe endaga mwana ywa Falao ywa Misili kulaila komzi wa Seuta Daudi ywa Izulaeli na kumwigala kwe inyumba ye chiseuta amzengele. Niyo agamba, “Mkazangu hekale mwe idizumba dya seuta Daudi ywa Izulaeli, kwaviya hantu hohose Idishanduku dye Idilagano dyekalaga Hakuka.”

12Seuta Sulemani niyo amlaviza Zumbe Chohile ntambiko za kutikimya mlanga mwe imazabahu azengile kulongozi ko ukumbi we Inyumba yo kuvikila. 13Kalavya izintambiko zo kutikimya saviya vikungwa ni izisigilizi za Musa kwa chila zuwa dya ngasu, zuwa dya Kuhumula na mwe ngasu ya Mwezi Mhya na ngasu ntatu za chila mhilimo na ngasu ya Mikate Heiijeligwe hamila na Ngasu ya Ulozo na Ngasu ya Makumbi. 14Umo akatimila amalagizo yaikigwe ni tati yakwe Daudi, aika luzo lwa ndima za chila zuwa kwa walavyantambiko na Walawi na wambizi wawo wakuwambiza kuchema na kudamanya izindima zawo. Kawapanga awamizi we Inyumba yo kuvikila kwa mabunga kwa chila nchili, kuligana na ivyo alagize Daudi, mntu ywa Chohile. 15Awo hawayalekile amalagizo ya Daudi alagize walavyantambiko na Walawi mwe mbuli yoyose na kuilanga ihazina.

16Indima yose ya seuta Sulemani idamanyika kukongela kwikwa idyuwe dye chegamo dye Inyumba ya Chohile niyo yabindilikila. Elo, Inyumba ya Zumbe Chohile niyo yaheza.

17Vikaheza seuta Sulemani niyo aita Esioni Gebeli na Eloshi yendile mpwani ya Edomu. 18Seuta Hilamu amwigailaga meli zilongozwe ni masekulu asagule mwenye, wantu wendaga na umanyi mwe bahali. Awantu awo, hamwenga na awantu wa seuta Sulemani, watamba kwa sila ya bahali kubula kweisi ya Ofili, waguha zahabu ikubula chilo elufu mlongo na shano na kumwigaila seuta Sulemani.