Mihilimo 9

Malikiya ywa Sheba amtalamkila seuta Sulemani

1Maseuta 10:1-13

1Malikiya ywa Sheba eze eve ukumanyikisa kwa Seuta Sulemani niyo atamba kwita komzi wa Yelusalemu kumjeza kwa kumuza milosi midala. Katimilana na wambizi walozize hamwenga na ngamiya zinule mavuta ya kupwepweleka na zahabu ilozize na mayuwe ya yombe kulu. Eze wadugane na seuta Sulemani, niyo amuza imilosi yose nendile ananayo mo umoyo wakwe. 2Seuta Sulemani niyo amhitula izimbuli zakwe zose, hahana yoyose adunduge kumhitula. 3Malikiya ywa Sheba kawone ubala wose wa seuta Sulemani ne idizumba dye chiseuta azengile, 4naho eze akaule inkande imalanywe hemeza ne ivyo amasekulu wekale neivyo awandima wakusankana ne ivyo wavaile na wadya wakwigala vyo kunywa ne izintambiko zo kutikimya mwe Inyumba ya Chohile neivyo wavaile, eze awone ivyo kehelwa. 5Niyo amgamba seuta Sulemani, “Yadya yose nivile mwe isi yangu kukulanga weye izindima zako no ubala wako ni chindedi! 6Mna sizumile izimbuli zawo wanigambile kubula siza siwona mwenye. Mna ivyo nigambilwe ni vijeche du. Ubala wako ujinka viya awantu wanigambile. 7Wantu wako wajimbikwa hamwenga na amasekulu wehaguhi na weye wakwetegeleza ubala wako chila zuwa! 8Ajimbikwe Zumbe Chohile ywako! Awagilwe ni weye na kukutenda seuta ywa Izulaeli. Chohile awaungisa awantu we ino isi naho hakudaha mpwii kuwaleka, ivyo kakusagula weye utende seuta chani ulamule kwa ukanuni na vikuwagila.” 9Niyo amwinka seuta Sulemani zahabu ikubula chilo elufu nne na mavuta ya kupwepweka ya yombe kulu hayalavyagwa kwa seuta Sulemani chipindi chochose. 10Naho wandima wa seuta Hilamu na wa seuta Sulemani wegala zahabu ilaile kwe isi ya Ofili, na mzigo mkulu wa miti ya mikomba na mayuwe ya yombe kulu. 11Seuta Sulemani niyo ajeseza imikomba iyo kudamanyiza ntantilo ze Inyumba ya Chohile na ntantilo ze idizumba dyakwe dye chiseuta. Iviya imiti iyo adamanyizaga vilangu na mazeze ya wachemi. Mbuli saizo nendile hazinati zilaile mweisi ya Yuda. 12Seuta Sulemani kamwinka malikiya ywa Sheba chila chintu ameilemate, na chochose alombeze kujinka viya amwigaile seuta. Elo, malikiya niyo auya kwe isi akatenda hamwenga na awambizi wakwe.

Ugoli wa Seuta Sulemani

1Maseuta 10:14-25

13Chila mhilimo seuta Sulemani nakahokela chilo milongo midi na ntatu elufu za zahabu, 14kwa kongezeza mwe zikodi zendile zikalihwa ni wachuluzi. Maseuta wose wa Alabiya na vilongozi we imikowa ya Izulaeli iviya nawakamwigaila seuta Sulemani mayuwe ya chumbu na zahabu. 15Seuta Sulemani niyo adamanya nchinga nkulu magana maidi, chila imwenga kaimamatiza zahabu isanigwe ikwinga chilo mfungate, 16iviya kadamanya nchinga ndodo magana matatu, chila imwenga kaimamatiza kwa zahabu ikwinga chilo ntatu. Niyo azika mwe nyumba ikwitangwa nyumba ya mbago ya Lebanoni. 17Iviya seuta Sulemani kadamanya chigoda chikulu chitendese cho useuta kachijela malembo ya meno ya na kuchimamatiza zahabu ntana. 18Ichigoda icho chendaga na ntantilo mtandatu na fingili dya zahabu dya kwegamiza iviga, vyose ivyo vilunganywa hamwenga ne ichigoda icho cho useuta na chila ntendele, iviya kwendaga na matukulu maidi ya simba chila ntendele dichimala dimwenga. 19Kwendaga na matukulu mlongo na maidi ya simba mwe chila udumo wa ntantilo, dimwenga chila ntendele. Chigoda saicho hachadamanyagwa mwe useuta wowose udya. 20Vikombe vyo kunywela vya seuta Sulemani vyadamanyagwa kwa zahabu, ne ivimpandwa vyose vyendile mwe Inyumba Imbago ya Lebanoni vyendaga vya zahabu ntana. Mayuwe ya chumbu hayatendaga na yombe mwe chipindi cho useuta Sulemani. 21Seuta Sulemani endaga na meli zitambile kubula Talishishi zikendeshwa ni wandima wa seuta Hilamu. Chila mihilimo mitatu ikaheza nendile zikauya na kumwigaila zahabu na mayuwe ya chumbu na mahembe ya ntembo na ntumbili na dege dikwitangwa tausi. 22Seuta Sulemani endaga mgoli no ubala kujinka maseuta wose mwe isi. 23Maseuta we izisi zose nawakamtalamkila kwetegeleza ubala enkigwe ni Chohile. 24Chila mhilimo seuta Sulemani nendile akahokela majeleko egailwe ni maseuta watuhu, chila yumwenga kamwigaila majeleko, vimpandwa mayuwe ya chumbu na zahabu na suche na viziha na mavuta ya kupwepweleka na falasi na mpundafalasi. 25Seuta Sulemani endaga na madewa elufu nne ya kwikiya falasi na malingisha yakwe, naho nendile ana wakwela falasi elufu mlongo na waidi. Wamwenga awaikaga komzi wa Yelusalemu na awatuhu kwe mizi mituhu. 26Seuta Sulemani endaga akatawala maseuta wose mo umto wa Efulati kubula kweisi ya Filisiti na kubula komhaka wa Misili. 27Mo useta wakwe mayuwe ya chumbu yazweleka chila hantu mo umzi wa Yelusalemu saviya mayuwe, ne izimbao ze mielezi zalozesaga hasi ha awagulu wa Yuda saviya mikuyu mwe makolongo. 28Seuta Sulemani nakegailwa falasi kulawa Misili na kulawa kwe si ntuhu.

Udumo wo utawala wa Seuta Sulemani

1Maseuta 11:41-43

29Ntendwa zidamanywe ni seuta Sulemani kukongela nkongo kubula udumo ziwandikwa mwe ichitabu cha Mbuli Zijinkile cha Muoni Nasani na Mouoni wa Ahiya ywa Shilo na Uwoni wa muoni Ido, iviya wamlanga Yeloboamu mwana ywa Nebati. 30Seuta Sulemani atawalaga uko Yelusalemu isi ya Izulaeli kwa chipindi cha mihilimo milongo mine. 31Abanikaga na kuhambwa mo mzi wa Daudi tati yakwe, na Yeloboamu niyo atenda seuta hantu hakwe.