Mihilimo 10

Makabila ya chenya wamlemela Lehoboamu

1Maseuta 12:1-20

1Lehoboamu niyo aita komzi wa Shekemu, kwaviya Waizulaeli wose we ntendele ya chenya waduganaga wakaunga wamtenda seuta ywawo. 2Lehoboamu mwana ywa Nebati, nakaita Misili chani amsumke seuta Sulemani eze eve imbuli iyo niyo auya kukaya. 3Vilongozi wa amakabila ya ntendele ya chenya niyo wasigila ulosi Yeloboamu etangwe, elo, waita hamwenga ne idibunga dyose dya Waizulaeli na kumgamba Lehoboamu, 4“Tati yako achitwisaga ndima ndala. Uneva unachihunguziza izindima izo, nachikusankanile vyedi vitendese.” 5Lehoboamu niyo awahitula, “Ninkani mazuwa matatu nifanyanye imbuli iyo. Mkaheza mwize.” Ivyo niyo wahalawa. 6Seuta Lehoboamu niyo awauza wadalahala wendile wakamwambiza tati yakwe seuta Sulemani umo achei mjima, awauza, “Nigambilani wano awantu niwahitule mbwani?” 7Wadalahala awo wamhitula, “Uneva unawawonela mbazi awantu wano na kuwatenda welelwe umo ukawahitula izimbuli zawo, nawatende wandima wako kalenakale.” 8Mna Lehoboamu niyo abela ulangilizi agambilwe ni wadya awadalahala, kalafya na wabwanga akwile nawo awo wendile walangilizi wakwe. 9Awauza, “Nyuwe mwanigaze wantu wano niwahitule mbwani?” Awauza, “Niwahitule wantu wano wakunga niwahunguzize imizigo yawo?” 10Niyo wamhitula, “Vino nivyo vikungwa uwahitule, ‘Kadole kangu kamambalo ni kanene kujinka ichigudi cha tate.’ 11Wagambe, ‘Tate kawatwisani mizigo izamile mna miye mizigo yangu naizamise. Tate kawatowani na milugwa, mna Miye naniwatoweni na milugwa ya miwa!’” 12Mazuwa matatu yeze yomboke, Yeloboamu na awantu wa amakabila ya chenya niyo wauya kwa seuta Lehoboamu vituhu, saviya awalagize. 13Seuta Lehoboamu niyo abela ulangilizi agambilwe ni wadya wadalahala na kuwakwahila vitendese wadya awantu, 14niyo adamanya saviya agambilwe ni wadya awabwanga. Awagamba, “Tate kawatwisani mizigo izamile, miye naniwatwise izamise. Kawatowani kwa milugwa mna miye naniwatoweni kwa milugwa ina miwa!” 15Ivyo seuta Yeloboamu kalemela kuwetegeleza wantu kwaviya imbuli iyo ilawa kwa Zumbe Chohile chani achintize mbuli amgambile seuta Yeloboamu mwana ywa Nebati kujinkila muoni Ahiya kulawa komzi wa Shilo. 16Mna awantu wa amakabila ya chenya weze wawone kugamba seuta hakuwetegeleza, niyo waguta wakagamba.

“China chihendo chani kwa Daudi no lukolo lwakwe! Hachina ulisi wowose mwa mwana ywa Yese. Chila yumwenga nauye kukaya kwakwe! Mwaseni Lehoboamu ichedu edime mwenye!” Ivyo wantu wa amakabila ya chenya niyo wahalawa. 17Mna Lehoboamu kalongoza wantu wa Izulaeli wendaga wakekala kwe imizi ya Yuda. 18Seuta Lehoboamu amtumaga Hadolamu endaga sekulu mkulu mwe izindima zo kukunkusa, aite kwa awantu wa amakabila ya chenya, mna niyo wamtowa mayuwe wamkoma. Hata ivyo, seuta Lehoboamu kakwela mwe idilingisha dyakwe na kusumkila komzi wa Yelusalemu. 19Kukongela aho awantu wa amakabila ya chenya hawakwivana no utawala wo lukolo lwa Daudi kubula dyelo.