Mihilimo 11

Uwoni wa Shemaya

1Maseuta 12:21-24

1Seuta Lehoboamu eze abule komzi wa Yelusalemu, niyo achisanya wagomba nkondo laki imwenga na samanini elufu wakankalu kulawa mwe idikabila dya Benjamini na Yuda akaunga atowane na Waizulaeli, chani awavuze vituhu awantu wa amakabila ya chenya mo utawala wa seuta Lehoboamu mwana ywa seuta Sulemani. 2Mna ulosi wa Zumbe Chohile niyo wamwizila Shemaya mntu ywa Chohile wagamba, 3mgambile seuta Lehoboamu na awantu wose wa amakabila ya Yuda na Benjamini kugamba, 4miye Zumbe Chohile nagamba, “Mnase kutowana na walukolo wenyu, kwaviya ayo yalaile nivyo nungile.” Nyose hitani kaya, niyo weva viya walagizwe ni Zumbe Chohile wauya kaya hawaitile kutowana na seuta Lehoboamu.

Seuta Lehoboamu azenga ngome mwe imizi ya Yuda

5Seuta Lehoboamu niyo ekala uko Yelusalemu na kuzengela ngome imizi ikutimila ya Yuda, 6mizi iyo ni Betelehemu na Etamu na Tekoa, 7na Beti Suli na Soko na Adulamu, 8na Gati na Malesha na Zifu, 9na Adolaimu na Lakishi na Azeka, 10na Sola na Ayaloni na Hebuloni. 11Atogezaga izingome zendile umo mndani niyo asagula masekulu wa wagomba nkondo mwe izihazina za nkande na mavuta ya mizaituni na divai, 12seivyo niyo aika nchinga na maguha. Kweisila iyo kaika imizi ya Yuda na Benjamini itende mo utawala wakwe.

Walavyantambiko na Walawi waita ko mzi wa Yuda

13Walavyantambiko na Walawi wose wa amakabila ya ntndele ya chenya niyo waita ntendele ya kwamwenyemzi ya Yuda. 14Walawi niyo wasama mo luwala lwawo lo kudimila na ntendele ntuhu ze isanga yawo waita kweimizi ya Yuda na Yelusalemu kwaviya Yeloboamu na wanawe wawalemeza wasekumsankanila Zumbe Chohile saviya walavyantambiko. 15Seuta Yeloboamu niyo asagula walavyantambiko wakwe mwenye wasankane hantu henukile hakuvikila milungu na matukulu yesaviya mbuzi na ndama asanile mwenye. 16Wantu wose wa amakabila ya ntendele chenya ya Izulaeli wendile wakaunga wamvikile Zumbe Chohile ywa Izulaeli, niyo wawatimila Walawi uko Yelusalemu kumlaviza ntambiko Zumbe Chohile, Chohile ywa wababa zawo. 17Ivyo vileka useuta wa Yuda utoge, na kwa mihilimo mitatu wamtimila seuta Lehoboamu mwana ywa seuta Sulemani na kwikala saviya wendile wakekala mo ulongozi wa seuta Daudi na seuta Sulemani.

Wantu we ikaya ya Lehoboamu

18Seuta Yeloboamu asolaga mvyele akwitangwa Mahalati, yudya tati yakwe endaga Yelimoti mwana ywa Daudi. Mami yakwe dya Yelimoti naketangwa Abihaili mchiche ywa Eliyabu mwana chilume ywa Yese. 19Lehoboamu na mkaziwe Mahalati wendaga na wana chilume watatu, wakwitangwa Yeushi na Shemaliya na Zahamu. 20Nyumani Lehoboamu niyo amsola Maaka, mchiche ywa Abusalomu, niyo amwelekela wana wane wa chilume, wakwitangwa Abiya na Atai na Ziza na Shelomiti. 21Chahamwenga Seuta Lehoboamu endaga na wavyele mlongo na mnane na vilanga milongo mtandatu na wana chilume milongo midi na mnane na wachiche milongo mtandatu. Mgati mwa wavyele wakwe nakamungisa Maaka mchiche ywa Abusalomu, 22niyo amhingiza mwanawe Abiya mwana Maaka chilongozi mwa wanawe wose, akamsagula eze atende seuta hantu hakwe. 23Kwa kujeseza ubala seuta Lehoboamu niyo awaika wanawe wachilume wasiku wakekale mwe imizi yose ya Yuda na ya Benjamini. Awenkaga vintu vilozize na kuwaloza wavyele walozize.