Mihilimo 12

Wagomba nkondo wa Misili wayebunga isi ya Yuda

1Maseuta 14:25-28

1Seuta Lehoboamu eze atenda na ulongozi utogile, uyo na awantu wakwe niyo waleka kutimila izisigilizi za Zumbe Chohile. 2Mo mhilimo wa shano Lehoboamu akatenda ni seuta, kwaviya nawambela Zumbe Chohile niyo wakantilwa. Seuta Shishaki ywa Misili niyo awebunga umzi wa Yelusalemu, 3akatenda na malingisha elufu imwenga na magana maidi na wakwela falasi elufu milongo mtandatu na wagomba nkondo hewekuwazika na Walibiya na Wasuki na Waisiopiya wezaga naye kulawa Misili. 4Seuta Shishaki niyo aitaha imizi izengelwe ngome ya Yuda kubula Yelusalemu. 5Muoni Shemaya ambasaga seuta Lehoboamu ne ivilongozi we imizi ya Yuda wechisanyaga uko Yelusalemu wamsumkaga seuta Shishaki. Awagamba, “Uno ni ulosi wa Zumbe Chohile kwenyu, ‘Mnileka ivyo haluse nawalekani mwa seuta Shishaki.’” 6Seuta ne ivilongozi wa Izulaeli niyo wanyanyahala kugamba wakola masa, na kugamba, “Ivyo akudamanya Zumbe Chohile vyawagila.” 7Zumbe Chohile eze awone kugamba wanyanyahala, niyo alonga vituhu na muoni Shemaya, “Kwaviya wanyanyahala saniwakome, mna nanisunguze kuwakombola. Mzi wa Yelusalemu saniukantile kwa maya yangu niubalange kujinkila Shishaki, 8mna nawamsankanile Shishaki chani wamanye ichindedi mo kunisankanila miye na kuwasankanila amaseuta watuhu wa mweisi.” 9Ivyo Shishaki seuta ywa Misili niyo awebunga umzi wa Yelusalemu na kutaha ihazina yose yendile mwe iyumba vyo kwikiya ugoli mwe Inyumba ya Chohile ne idizumba dye chiseuta. Kataha chila chintu hamwenga na zahabu na nchinga ziya zidamanywe ni seuta Sulemani. 10Ukaleka izo izinchinga seuta Lehoboamu adamanyaga nchinga za shaba na kuzika zamilwe ni wadya wakuchimaila izinchili ze idizumba dye chiseuta. 11Chila nkanana Seuta akaita kwe Inyumba ya Chohile, wamizi nawakengila na kuzinula izinchinga izo wakaheza wazivuza kwe chumba zikwamilwa. 12Kwaviya seuta Lehoboamu nendile kanyanyahala kwa Zumbe Chohile, maya ya Zumbe niyo yasela na hamkomile. Mbuli niyo zachuma mwe isi ya Yuda.

Udumo wo utawala wa seuta Lehoboamu

13Seuta Lehoboamu kalongoza kwa utogi mwe Yelusalemu na kweongezeza nguvu saviya seuta, endaga na mihilimo milongo mine na umwenga umo akatenda seuta, na kulongoza kwa mihilimo mlongo umwenga na mfungate uko Yelusalemu, umzi udya Zumbe asagule mgati mwa makabila yose ya Izulaeli avikilwe umo. Mami yakwe Lehoboamu endaga aketangwa Naama kulawa kwe isi ya Amoni. 14Seuta Lehoboamu adamanyaga yehiye, kwaviya haungile kulonda vikumuwagila Zumbe Chohile. 15Ntendwa zose za seuta Lehoboamu na ulukolo lwakwe ziwandikwa mwe chitabu cho lukumbusa cha muoni Shemaya na lukumbusa lwa muoni Ido. Seuta Lehoboamu na seuta Yeloboamu wendaga na nkondo ijendeleze mgati mwawo. 16Seuta Lehoboamu niyo abanika na kuhambwa mwe mbila za chiseuta mo umzi wa Daudi na mwanawe Abiya niyo atenda seuta hantu hakwe.