Mihilimo 13

Nkondo mgati mwa Abiya na seuta Yeloboamu

1Maseuta 15:1-8

1Mo mhilimo wa mlongo na mnane chipindi cho utawala wa seuta Yeloboamu ywa Izulaeli, Abiya niyo atenda Seuta ywa Yuda, 2katawala kwa mihilimo mitatu akekala uko Yelusalemu. Mami ywakwe naketangwa Maaka mchiche ywa Ulieli ywa mzi wa Gibeya. Kwendaga na nkondo mgati mwa Abiya na seuta Yeloboamu. 3Abiya emalanyaga kugomba nkondo endaga na wagomba nkondo wakankalu elufu magana mane, na Yeloboamu endaga na wagomba nkondo wakankalu elufu magana mnane. 4Wagomba nkondo wa seuta Abiya wachimalaga kolugulu lwa Semalaimu lwi mgati mwa magulu ya Efulaimu, seuta Abiya niyo amwitanga Yeloboamu na awantu wa Izulaeli wedikabila dya chenya akamgamba, “Nitegelezani!” 5“Hamvimanyize kugamba Zumbe, Chohile ywa Izulaeli, adamanyaga lagano hedikuvunika na Daudi, akamwinka na welekwa wakwe useuta mwe Izulaeli walawa mo ulukolo lwa Daudi mazuwa yose? 6Yeloboamu mwana ywa Nebati, Nebati endaga mndima ywa Sulemani mwana ywa Daudi amhitukaga sekulu ywakwe seuta Sulemani. 7Nyumani niyo achisanya bunga dya wantu manyakwili hewena dyodyose naho wahezi hewekuwagila chintu, niyo wamluvya Lehoboamu mwana ywa Sulemani adamanya yadya wakunga wowo, uyo kadunduga kuwachinda kwaviya endaga achei mbwanga mdodo. 8Haluse mwafanyanya kugamba mwadaha kuhiga useuta wa Daudi na welekwa wakwe enkigwe ni Zumbe Chohile? Kwaviya du mna wagomba nkondo walozize na matukulu ya zahabu ya ndama mdamanyizwe ni Yeloboamu yatende milungu yenyu! 9Muwausa walavyantambiko wa Zumbe Chohile, wana wa Aloni na kuwabalaza Walawi wandima wa Chohile na kwesaguila walavyantambiko wenyu wenye saviya wakudamanya wantu we izisi ntuhu. Yoyose akwiza kwenyu kwekukiza ana njeku hegu ndolome mfungate atenda mlavyantambiko ywa vintu vya milungu.” 10“Mna suwe chichei chamsankanila Zumbe Chohile ywetu naho hachinati chimleke. Naho chichei na walavyantambiko welekwa wa Aloni wakumsankanila Zumbe Chohile wakambizwa ni Walawi. 11Chila zuwa mtondo na chila chisingi walavyantambiko wamlaviza ntambiko njima za kutikimya na kumvunkiziza ubani una mhempe wedi, naho wavidongeleka mlanga mwe meza ikukile, mikate ya kwikwa kulongozi kwa Zumbe na kutunduliya ichiya cho kwikiya ta na kuwasha izita chila zuwa chisingi. Suwe chatimila amalagizo ya Zumbe Chohile, Chohile ywetu, mna nyuwe mumleka. 12Zumbe Chohile nuyo chilongozi ywetu naho walavyantambiko wakwe wehano na magunda, wemalanya kuyavila chani wachinke chilagiso chigombe nkondo na nyuwe. Nyuwe Waizulaeli wa amakabila ya chenya, msekugomba nkondo na Zumbe Chohile ywa wababa zenyu! Hamdahe kuhuda!” 13Aho Yeloboamu kegala wagomba nkondo wakwe kuwebunga wagomba nkondo wa Yuda kulawa ntendele ya kunyuma, kuno wasigaile wasinyana kwa kulongozi. 14Wagomba nkondo wa Yuda eze wahituke kunyuma wawona kugamba wazungulukwa. Wamwila Zumbe Chohile awambize, Walavyantambiko niyo wavila amagunda yawo. 15Wagomba nkondo wa Yuda niyo watowa luhugu lwa nkondo wakalongozwa ni Abiya, niyo wawebunga, weze wadamanye Chohile niyo amhuda Yeloboamu na wagomba nkondo wa Izulaeli. 16Waizulaeli wa amakabila ya chenya wawasumka wantu wa Yuda Zumbe Chohile kawetenda wantu wa Yuda wawahude Waizulaeli wa amakabila ya chenya. 17Abiya na wagomba nkondo wakwe wawebunga vitendese Waizulaeli wa amakabila ya chenya niyo wawahuda wakoma wagomba nkondo wa Izulaeli laki shano wendaga wagomba nkondo wakankalu vitendese mwe isi ya Izulaeli. 18Ivyo wagomba nkondo wa Yuda wawahudaga Waizulaeli kwaviya nawaika msuhi wawo kwa Zumbe Chohile, Chohile ywa Wababa zawo. 19Abiya kamgulusa Yeloboamu na kumhoka mizi misiku ya Beteli na Yeshana na Efuloni hamwenga ne izikaya zihaguhi ne imizi iyo. 20Yeloboamu hajezaga kupata nguvu mwe chipindi cho utawala wa Abiya. Nyumani Zumbe Chohile niyo amtowa na kumkoma. 21Mna Abiya niyo ajendeleza kutenda na nguvu. Endaga na wakazize mlongo na wane na kweleka wana milongo midi na waidi na wachiche mlongo umwenga na mtandatu. 22Mbuli ntuhu adamanye Abiya, ivyo alongile na ivyo adamanye, viwandikwa mwe chitabu cho lukumbusa chiwandikwe ni muoni Ido.