Mihilimo 14

Seuta Asa Awahuda Wagomba nkondo wa Waisiopiya

1Seuta Abiya abanikaga niyo ahambwa mwe izimbila zo mzi wa Daudi. Mwanawe Asa niyo atenda seuta hantu hakwe, mo utawala wa Asa kwendaga na utondowazi mwe isi kwa mihilimo mlongo umwenga. 2Asa kamuwagila Zumbe Chohile, Chohile ywakwe, kwakudamanya yadya yachumile na yedi. 3Niyo ausa izimazabahu ze chijeni zo kulaviza ntambiko na ntendele za kuvikila milungu, katula izinguzo za amayuwe yo kuvikila na kukantakanta ziya izinguzo za amatukulu ya mlungu ywa Ashela. 4Kawalagiza wantu wa Yuda wadamanye yadya yakumuwagila Zumbe Chohile, Chohile ywa wababa zawo, na kutimila mahinyo na malagizo yakwe. 5Kwaviya ausaga ahantu hose hakuvikila milungu mituhu na mazabahu za kuvunkiziza ubani kulawa mwe imizi yose ya Yuda, useuta wakwe wendaga na utondowazi mo utawala wakwe. 6Niyo azenga ngome mwe imizi yose ya Yuda umo mwechipindi cho utawala wakwe, kwa mihilimo ilozize hakwendaga na nkondo, kwaviya Zumbe Chohile kamwinka utondowazi. 7Kawagamba awantu wa Yuda, “Nachitogezeni imizi kwa kuizengela ngome na kwika minala, na nchili zikudaha kuvugalwa na mihindo. Isi ichei mwe mikono yetu kwaviya chidamanya yadya yakumuwagila Zumbe Chohile, Chohile ywetu. Kachidima na kuchikiya wamizi chila ntendele.” Ivyo niyo wazenga na kuchumilwa. 8Seuta Asa endaga na wagomba nkondo laki ntatu kulawa Yuda, wata nchinga na maguha na wantu watuhu laki mbili na samanini elufu kulawa kwe idikabila dya Benjamini wakatenda na nchinga na mita. Wose wendaga wagosi wakankalu wahinyigwe vyedi. 9Mwisiopia akwitangwa Zela niyo amwebunga Yuda na wagomba nkondo miliyoni imwenga na malingisha magana matatu ya nkondo kajendeleza kubula hantu hakwitangwa Malesha. 10Asa afosaga kwebungana naye, mwe dikolongo dya Sefata haguhi na Malesha. 11Asa niyo amlombeza Zumbe Chohile, Chohile ywakwe, “Hoi Zumbe Chohile, hahana mtuhu saweye akudaha kwambiza bunga dya wagomba nkondo wahwele na wajeche. Chambize weye Zumbe Chohile, Chohile ywetu, kwaviya chakwikiya msuhi weye, na kwachausa chako chiza kugomba nkondo na dino idibunga dikulise, weye Zumbe Chohile, usekumleka mntu yoyose akuhude.” 12Zumbe Chohile niyo awahuda wagomba nkondo wa Isiopia kulongozi kwa Asa na kulongozi kwa wagomba nkondo wakwe wa Yuda umo wakawebunga. Niyo wagomba nkondo wa Isiopia wasumka, 13Asa na wagomba nkondo wakwe niyo wawagulusiza hale kubula Gelali. Niyo wakoma Waisiopia walozese hasigale hata yumwenga. Kwaviya Zumbe Chohile na awagomba nkondo wakwe kugamba wantu wa Yuda nawahuda. Wagomba nkondo wa Yuda watahaga vintu vilozese. 14Vikaheza wabalanga imizi yose ikuzunguluka Gelali, kwaviya awantu wendile mwe imizi iyo wengilagwa ni nkama ya Zumbe Chohile. Wagomba nkondo watahaga ugoli wose ulozize wendaga mwe imizi iyo. 15Iviya webungaga amalago ya wadimi, na kutaha mabunga makulu ya ngoto na ngamiya. Wakaheza wauya Yelusalemu.