Mihilimo 15

Asa avuza wantu wamvikile Zumbe Chohile

1Muye wa Chohile niyo wamwingila Azaliya mwana chilume ywa Odedi, 2niyo afosa akudugana na seuta Asa. Amgamba, “Nitegeleza miye seuta Asa, hamwenga na awantu wako wa Yuda na Benjamini! Zumbe Chohile ehamwenga na weye hegu unajendeleza kutenda naye. Unamlonda nomuwone mna unamleka naye nakuleke. 3Kwa chipindi chitali wantu wa Izulaeli wekalaga hewena Chohile ywa chindedi, hegu walavyantambiko wa kuwahinya, naho nahewana sigilizi. 4Mna kukalaila nkunto wamuwiya Zumbe Chohile, Chohile ywa Izulaeli. Wamlonda na kumuwona. 5Mwa amazuwa ayo hahana mntu adahile kwingila hegu kufosa mpeho kwaviya hakwendaga na utondowazi kwendaga na nkumbizi chila ntendele ye izisi zose. 6Kwamemaga uhigani, si imwenga naitowana na si ntuhu, mzi umwenga utowana na mzi mtuhu, kwaviya Chohile kawatumbwadisa mwe nkunto za chila namna. 7Mna nyuwe msekufachevu. Mtoge ndima mkudamanya namwinkigwe jeleko.” 8Asa eze eve ulosi uwo wo uwoni kulawa kwa Azaliya mwana ywa Odedi, niyo ajelwamoyo. Kausa amatukulu yose mwe isi ya Yuda na Benjamini na matukulu yose kulawa mwe imizi atahile mwe isi ya magulu ya Efulaimu. Naho azenga uhya imazabahu yo kulaviza ntambiko ya Zumbe Chohile yendile kulongozi ko uwa we Inyumba ya Chohile. 9Wantu walozize kulawa ntendele ya Efulaimu na Manase na Simeoni waita wakwikala mo useuta wa Asa kwaviya waona kugamba Zumbe Chohile ehamwenga naye, 10wadugana wose uko Yelusalemu mo mwezi wa katatu wo mhilimo wa mlongo na shano Asa akatenda seuta. 11Mwe idizuwa idyo wamlaviza Zumbe Chohile ntambiko, ng'ombe magana mfungate na ngoto elufu mfungate kulawa mwe ivintu watahile. 12Niyo waika lagano diya wazumile kumvikila Zumbe Chohile, Chohile ywa wababa zawo, kwa myoyo yawo yose na kwa muye wawo. 13Mntu yoyose mbwanga hegu mdalahala, mgosi hegu mvyele, hekumvikila Zumbe Chohile akomwe. 14Welisa kwa zina dya Zumbe Chohile kwa izwi kulu kugamba nawaike idilagano idyo waguta na kuvila magunda na miluli. 15Wantu wose wa Yuda niyo welelwa vitendese kwaviya welisa kwa myoyo yawo yose. Wamlonda Zumbe Chohile kwa myoyo yawo yose niyo wampata na kuwenka utondowazi ntendele zose. 16Seuta Asa niyo amusa weyakwe Maaka kulawa ahantu hakwe ho umalikiya, kwaviya kadamanya tukulu dya Ashela dikwihiza, Asa kaditula na kudihondahonda iditukulu idyo, na kudyoka mwe idikolongo dya Kiduloni. 17Hatahegu Asa hausize hantu ho kuvikila milungu mituhu mwe isi, kasigala kutenda mkanuni kwa Zumbe Chohile mo wikazi wakwe wose. 18Kavivuza ivimpandwa mwe Inyumba ya Chohile viya tati yakwe Abiya na uyo mwenye wavisenta kwa Chohile, vintu ivyo ni vyendaga vya zahabu na chumbu. 19Hakwendaga na nkondo naho mwe isi kubula mwe mihilimo milongo mitatu na shano yo useuta wakwe.