Mihilimo 16

Yuda wasopana na Izulaeli

1Maseuta 15:17-22

1Mo mhilimo wa milongo mitatu na mtantatu wo useuta wa Asa mwe isi ya Yuda, seuta Baasha ywa Izulaeli ayebungaga isi ya Yuda na kukonga kuuzengela ngome umzi wa Lama chani achinde wantu wasekwingila hegu kufosa mwe isi ya seuta Asa ywa Yuda. 2Ivyo Asa niyo aguha mayuwe ya chumbu na zahabu kulawa mwe hazina vikigwe ivintu ivyo mwe Inyumba ya Zumbe Chohile na mwe nyumba ye chiseuta na kuvigala Damesiki, kwa seuta Beni hadadi ywa Siliya na ulosi uno, 3“Chidamanye wivano, saviya watati zetu wendaga. Yano amayuwe ye chumbu ne izahabu sikwigaila weye. Haluse mhituke seuta Baasha ywa Izulaeli chani ause awagomba nkondo wakwe mwe isi yangu.” 4Benihadadi niyo azumila ulosi wa seuta Asa na kuwalagiza amasekulu wakwe wa wagomba nkondo wayebunge imizi ya Izulaeli na kuihuda. Wataha imizi ya Iyoni na Dani na Abeli Maimu ne mizi yose ya Nafutali yendaga na hazina za nkande. 5Seuta Baasha eze eve yadya yalaile, niyo aleka indima yo kuuzengela ngome umzi wa Lama na kuchimalisa indima yakwe. 6Vikaheza seuta Asa kawagamba awantu wose we isi ya Yuda wasamize amayuwe yose ne izimbawo Baasha nendile akajeseza kuzengela uko Lama, na kuvijeseza kuzengela imizi ya Geba na Mizipa.

Muwoni Hanani

7Mwe chipindi icho muoni Hanani kambasa seuta Asa amgamba, “Kwaviya kumwikiya msuhi kwa seuta ywa Siliya ukaleka kumwikiya msuhi Zumbe Chohile, Chohile ywako, wagomba nkondo wa seuta wa Siliya wachupuluka. 8Togola, kujala wadya Waisiopia na Walibiya ivyo wendaga na bunga kulu dya wagomba nkondo na malingisha yalozize na wakwela falasi walozize? Mna kwaviya nakwika msuhi kwa Zumbe Chohile, kakudahiza kuwahuda. 9Zumbe Chohile awadima awantu mwe isi yose, chani awenke nguvu wadya wose imyoyo yawo ikwika msuhi kwakwe. Kudamanya uhezi, ivyo kukongela haluse na kujendeleza nawebungwe ni nkondo.” 10Milosi iyo imtenda Asa amwihiwe muoni Hanani na kumjela mwe chifungo. Mwe ichipindi icho Asa niyo akonga kuwadamanyiza yehiye wantu wasiku.

Udumo wo Utawala wa Asa

1Maseuta 15:23-24

11Ntendwa zose za Asa kukongela nkongo kubula udumo wakwe, viwandikwa mwe ichitabu cho lukumbusa cha Maseuta wa Yuda na Izulaeli. 12Mo mhilimo wa milongo mitatu na chenda umo Asa endaga seuta, ahumisaga unyonje wa viga, mna hata ivyo Asa hamuwiye Zumbe Chohile kumlombeza wambizi mna kalonda wambizi kwe waganga. 13Eze yomboke mihilimo midi Asa niyo abanika, 14niyo ahambwa mwe mbila ya luwe esongwele mwenye mo mzi wa Daudi. Wamgoneza mndani mwe mbila na kumjela mavuta ya kupwepweleka na mavunkizo ya kupwepweleka, wakaheza niyo wajimba zoto kwa kulomboleza ifile yakwe.